Julie d’Andurain ushinjwa guhakana Jenoside, yikuye muri Komisiyo yiga ku ruhare rw’u Bufaransa mu Rwanda

Yanditswe na Ferdinand Maniraguha
Kuya 14 Ugushyingo 2020 saa 03:00
Yasuwe :
0 0

Umwarimu akaba n’umushakashatsi Julie d’Andurain yivanye muri Komisiyo y’u Bufaransa icukumbura ku ruhare rw’icyo gihugu muri Jenoside yakorewe Abatutsi, nyuma yo kwamaganwa n’abashakashatsi batandukanye kubera ko yagaragaye ahakana iyo Jenoside.

Amashyirahamwe y’abashakashatsi mu Bufaransa bamaze iminsi baracitsemo ibice, bamwe bagaragaza ko Julie d’Andurain adakwiriye kuba muri Komisiyo igamije kugaragaza ukuri kandi atemera ko ibyabaye mu Rwanda ari Jenoside.

Mu itangazo ryashyizwe hanze n’iyo Komisiyo kuri uyu wa Gatandatu tariki 14 Ugushyingo, rivuga ko Andurain ari we wafashe umwanzuro wo kwivanamo.

Perezida w’iyo Komisiyo, Vincent Duclert, yabwiye AFP ati “Uku kwivanamo ku bushake bivuze ko Andurain atazongera kwitabira inama za Komisiyo, ndetse atazagira uruhare kuri raporo ya nyuma.”

Duclert yavuze ko raporo ya nyuma bazayishyikiriza Perezida w’u Bufaransa, Emmanuel Macron tariki 5 Mata 2021, na we akayitangaza ku mugaragaro.

Andurain ni umwe mu nzobere 15 zashyizweho na Perezida Emmanuel Macron mu Ukwakira 2019 muri Komisiyo igizwe n’abantu 15 barimo abanyamateka, impuguke mu by’amategeko n’abandi.

Uyu mugore asanzwe ari umwarimu w’amateka muri Kaminuza ya Metz, inzobere mu mateka y’igisirikare mu kinyejana cya 18, akaba n’umuntu ukorana bya hafi na Minisiteri y’Ingabo mu Bufaransa dore ko yayikozemo imyaka umunani.

Yatangiye gushidikanywaho mu kwezi gushize ubwo ikinyamakuru Canard Enchaîné cyandikaga inkuru icukumbura uruhande Andurain aherereyemo nyuma yo kubona inyandiko ye mu ijambo ry’ibanze ry’igitabo cyiswe ‘Dictionnaire des Operations Extérieures de l’Armée Française’ kivuga ku butumwa Ingabo z’u Bufaransa zagiye zijyamo mu mahanga guhera mu 1963 harimo n’ubutumwa zagiyemo mu Rwanda mu 1994 bwiswe ‘Opération Turquoise’.

Inkuru ya Canard yagaragaje ko Andurain adakwiriye kuba muri Komisiyo bitewe n’uko muri iyo nyandiko iri mu gitabo, yagaragaje ko atemera ko mu Rwanda habaye Jenoside yakorewe Abatutsi ahubwo ngo ni isubiranamo ry’amoko, kandi ko Jenoside zitanganya agaciro, ashaka kugaragaza ko hari izikomeye izindi zikaba zoroheje.

Inkuru bijyanye: Urunturuntu mu bashakashatsi bo mu Bufaransa nyuma y’uwashyizwe muri Komisiyo yiga kuri Jenoside kandi ayihakana

Julie d’Andurain amaze iminsi ku gitutu cy'abashakashatsi mu Bufaransa, bamusabaga kwivana muri Komisiyo kuko yagaragaje uruhande abogamiyeho ku buryo bishobora kugira ingaruka kuri raporo ya nyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .