00:00:00 IGIHE NETWORK KN KINYARWANDA EN ENGLISH FR FRANCAIS

Jordan Foundation ikomeje kongera icyizere ku bana batabona: Abarenga 30 baravujwe barakira

Yanditswe na IGIHE
Kuya 20 Ukuboza 2022 saa 09:27
Yasuwe :

Ubuyobozi bw’umuryango wita ku burezi n’ubuzima bw’abana bakiri bato bafite ubumuga bwo kutabona, Jordan Foundation, bwatangaje ko bwujuje ikigo cyagutse kizajya cyakira abagera kuri 400.

Jordan Foundation ni umuryango washinzwe na Bahati Vanessa nyuma yo kwibaruka umwana (Jordan) ufite ubumuga bwo kutabona, agamije gufasha n’abandbafite ubumuga nk’ubwo.

Washinzwe mu 2016 ukaba umaze gufasha abana bagera ku 140 binyuze mu bikorwa by’ubuvuzi n’uburezi mu mashuri abanza ku bana batabona mu Murenge wa Gatsata. Aba mbere bageze mu mwaka wa gatanu nk’uko byatangajwe na Eulade Manzi, umuhuzabikorwa wa Jordan Foundation ubwo hatangwaga indangamanota hasozwa igihembwe kuri uyu wa Mbere.

Manzi yavuze ko abana bakirwa bavuzwa ku bufatanye n’Ibitaro bya Kabgayi kandi ko hamaze kugezwayo abagera ku 120 muri bo 36 bakaba barakize bagasubizwa mu miryango yabo.

Yakomeje avuga ko hamwe no kuba umubare w’abana bakirwa ugenda wiyongera, byabaye ngombwa ko hubakwa ikigo cyagutse mu Karere ka Gasabo, Umurenge wa Rutunga cyamaze kuzura.

Ati “Twatangiranye n’abana 20 ariko uko imyaka ishira bakagenda biyongera ku buryo ubu tumaze kuzuza ikigo ‘Jordan Special School’ i Rutunga ; kugeza ubu twiteguye kwakira abana bagera kuri 400.”

Agaruka ku bikorwa uyu muryango umaze kugeraho, Manzi yavuze ko watanze umusanzu ukomeye mu burezi bw’abana bafite ubumuga batari bafite amashuri yo kwigiramo.

Ati “Abo 140 dufite, amahirwe yo kwiga yari yarabacitse kuko batari bafite aho bigira. Bigishwa amasomo yihariye kandi bafite n’abarimu bihariye. Mu Rwanda hari ikibazo cyo kubona abarimu bigisha abana nk’aba ariko muri Jordan Foundation babigisha bahereye ku myaka itatu. Mu Rwanda ni twe dufite abanyeshuri bo mu kiburamwaka batabona.”

Mu mbogamizi bagihura na zo harimo iz’ubukene mu miryango y’abana no kuba bisaba ko bitabwaho mu buryo bwihariye.

Ikindi ni uko bakorerwa ivangura n’ihezwa muri sosiyete kuko baba batumva ko bazagira ahazaza heza nk’abandi nk’uko Muragijimana Agnes ufite umwana muri Jordan Foundation na we yabigarutseho.

Ati “Ni ikibazo gikomeye kubyara umwana akaza ameze kuriya [atabona], abantu benshi baguca intege. Benshi bambwiraga ko umwana nabyaye ntacyo azageraho, ko ari uwo mu nzu ariko hari impinduka zigaragara zabayeho. Muzana yaratinyaga iyo yabaga ageze mu bantu benshi ariko ubu hari ibyo umubaza akagusubiza nta bwoba afite. Iyo ari mu bandi bana aba yishimye. Impinduka ziragaragara.”

Undi mubyeyi ukomoka mu Karere ka Rusizi ufite abana babiri b’impanga batabona muri Jordan Foundation, yavuze ko nyuma yo kubageza muri uyu muryango bafite ibyo bungutse haba mu bumenyi, mu mico n’imyifatire. Ati “Bazi kubara mu rurimi rw’Icyongereza kandi bazi no gusenga.”

Maniriho Emmanuel na we ufite umwana w’imyaka irindwi muri Jordan Foundation yagize ati “Uyu muryango ni uwo gushimirwa cyane, ubu ni ubutwari bukomeye bagize bwo kwita ku bana bacu dore ko ubushobozi bwacu buke ntibwatuma tubarera neza ugereranyije n’uko bitabwaho muri iki kigo.”

Abana bafashwa na Jordan Foundation ubwo bahabwaga indangamanota kuri uyu wa Mbere
Aba bana bahawe indangamanota bari kumwe n'ababyeyi babo
Uretse kuba aba bana bigishwa amasomo yihariye baranavuzwa ku bufatanye bwa Jordan Foundation n'Ibitaro bya Kabgayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .