00:00:00 IGIHE NETWORK KN KINYARWANDA EN ENGLISH FR FRANCAIS

Inzego icyenda zihanzwe amaso mu cyerekezo gishya cyo guteza imbere ubukungu bw’u Rwanda

Yanditswe na Ayera Belyne
Kuya 11 June 2024 saa 04:43
Yasuwe :

Minisiteri y’Ubucuruzi n’Inganda (MINICOM) ikomeje kwiga kuri politiki nshya yo guteza imbere inganda no kongera umusaruro wazo izagenderwaho mu myaka 10 iri imbere.

Ni politiki biteganyijwe ko nimara kwemezwa, izibanda ku guteza imbere inganda hagamijwe kongera agaciro k’umusaruro uboneka mu gihugu mu bintu binyuranye.

Hashingiwe ku cyerekezo u Rwanda rwihaye rwo kuba rwakongera umusaruro w’ibikorerwa mu gihugu rukanongera umusaruro w’ibyoherezwa hanze y’igihugu, ruri kwiga uburyo rwateza imbere inganda zigatanga umusaruro uhagije.

Minisiteri yagaragaje ko hari ibiri gushyirwa imbere, bigamije kunozwa kugira ngo byongererwe agaciro, bitange umusaruro ufatika mu nzego zinyuranye.

Ibikomoka ku mbuto, imboga n’indabo

Imbuto, imboga n’indabo ni bimwe mu byinjiriza igihugu amadevise. Kuva mu mwaka wa 2017, umusaruro w’izoherejwe mu mahanga wikubye inshuro 25 bitewe n’amasoko mpuzamahanga yiyongereye.

Imibare igaragaza ko mu 2017 hoherezwaga toni 40 ku kwezi, mu gihe mu 2024 bigeze kuri toni zisaga 1000 ku kwezi.

Imboga, imbuto n’indabo byinjije asaga miliyoni 42,8$ muri 2021/2022, naho muri 2022/2023 hiyongeraho arenga miliyoni 16$. Naho kuva muri Nyakanga 2023 kugeza muri Gashyantare 2024 u Rwanda rwohereje mu mahanga ibifite agaciro ka miliyoni 46$.

Rwiyemezamirimo Sina Gérard avuga ko ubu u Rwanda rumaze kwagura isoko ry’imbuto n’imboga, yaba ku Isi kandi ko gushyira imbaraga mu guteza imbere inganda bitanga icyizere.

Ati “Ibi biduha icyireze ko n’izindi nganda zizaza zizatanga umusaruro uhagije cyane, ko bitanga akazi ku Banyarwanda benshi bikanaturinda gukoresha ibyavuye hanze gusa ahubwo twe tukohereza.”

Indabo ni bimwe mu byoherezwa hanze byinjiriza u Rwanda menshi

Gutunganya impu

Mbere ya 2014, ubucuruzi bw’impu bwari imari ikomeye mu Rwanda gusa nyuma byaranze kubera ko ibihugu byo mu muryango wa Afurika y’iburasirazuba (EAC) byangiwe gucuruza impu hanze. Ibi kandi byahuriranye n’uko uruganda rutunganya impu rwari rumwe mu Rwanda rwari rufunzwe.

Kuva icyo gihe uwazigurishaga hanze yishyuraga amadorari 0.52 ku kilo kimwe, byatumaga abacuruzi bisanga mu gihombo cyane ko akenshi boherezaga izidatunganyije.

Muri Gicurasi 2024, MINICOM ifatanyije n’Urwego rw’Igihugu rushinzwe iterambere (RDB) byashyizeho Ihuriro rya Kigali Leather Cluster ryahawe inshingano zo gukurikana ibikorwa byo kwitegura uruganda ruzajya rutunganyirizwamo impu mu kuzongerera agaciro.

Umuyobozi wa Kigali Leather Cluster, Kamayiresi Jean d’Amour, yavuze ko bari bafite imbogamizi ku mpu zijya mu bihugu by’abaturanyi ku buntu kandi mbere zaragurwaga, bikinjiza amadevize.

Yakomeje ati “Abenshi bari barabivuyemo kubera ko nta nyungu yari irimo ariko ubu bamaze kugaruka. Twishyize hamwe, ubu tugera ku 3000. Turasaba ko batworohereza uruhu rukongera kugira agaciro.”

Ugereranyije no mu myaka icumi ishize, impu zataye agaciro. Ikilo cyigeze kuva ku 1500 Frw, kigera ku 2000 Frw. Kuri ubu kigeze kuri 200 Frw.

MINICOM irateganya gushyira imbaraga muri uru rwego mu kuzamura agaciro k’impu no gutunganya ibizikomokaho.

Impu ni bimwe mu byakwinjiriza u Rwanda amafaranga menshi mu gihe kuzitunganya byatezwa imbere

Icyayi

Icyayi ni kimwe mu bihingwa ngengabukungu u Rwanda rufite kandi cyirwinjiriza atari make nk’uko ikigo cy’igihugu gishinzwe uteza imbere ibyoherezwa mu mahanga bikomoka ku buhinzi n’ubworozi NAEB, cyabitangaje.

Cyatangaje ko umusaruro w’icyayi mu mwaka wa 2023 wiyongereye, cyinjiriza igihugu agera kuri miliyoni 107,7$, zingana n’arenga miliyari 139,5Frw.

Umusaruro wacyo ugeze ku rwego rwiza kuko usanga inganda zitunganya icyayi mu Rwanda zitabira amarushanwa ndetse usanga cyihagazeho ku isoko mpuzamahanga. Ibi byahaye imirimo abagera ku bihumbi 51.

Kugeza ubu, inganda zitunganya icyayi mu Rwanda ni 19, bisobanuye ko ziramutse ziyongereye byatanga umusaruro mwinshi, bikongera ubukungu ndetse bikanatanga akazi kuri benshi.

Icyayi cyinjirije u Rwanda miliyari 139,5 Frw mu 2023

Imiti n’inkingo

Kugeza ubu, u Rwanda rufite ikigo African Pharmaceutical Technology Foundation, ishami rya BionTech, n’ibindi byitezweho kuzamura ikorwa ry’inkingo n’imiti muri Afurika.

Ni icyerekezo gishya u Rwanda rufite kandi rwifuza guteza imbere ibijyanye nabyo mu guharanira ko ibihugu bya Afurika byagira uruhare mu kwikorera inkingo cyangwa kuzibona bitagoranye.

Uretse ibyo kandi, u Rwanda ruri gushyira imbaraga mu buvuzi, hubakwa ibikorwaremezo ndetse no kongera umubare w’abakora muri urwo rwego.

Gutunganya imyenda

Mu myaka umunani ishize, u Rwanda rwatangiye gahunda yo guteza imbere inganda zitunganya imyenda, hagamijwe guteza imbere ibikorerwa mu gihugu bizwi nka ‘Made in Rwanda’.

Ibi byatumye abatari bake babona akazi muri izi nganda ndetse binatuma ibiva hanze bigabanuka.

Imyenda ikorerwa mu Rwanda imaze gukundwa n’abatari bake harimo n’abanyamahanga. Ibi bituma iyi myenda yongera agaciro ndetse bikanatuma yinjiriza igihugu amafaranga menshi.

U Rwanda ruramutse rushyize imbaraga mu kwagura inganda zitunganya imyenda, byatuma haboneka imyenda yoherezwa mu mahanga, bikarushaho kuyiteza imbere ndetse bikazamura ubukungu bw’igihugu.

Ibinyabiziga

U Rwanda ruri mu bihugu bya Afurika bifite inganda ziteranyirizwamo imodoka kuko kuri ubu hateranyirizwa amoko ane y’imodoka za Volkswagen.

Uruganda rukora imodoka za Howo narwo rurateganya gufungura amarembo mu Rwanda kubera politiki iteza imbere ishoramari.

MINICOM igaragaza ko hakenewe kongera umubare w’ibinyabiziga birimo ibikoresha amashanyarazi bijyanye n’icyerekezo cy’igihugu cyo kubungabunga ibidukikije.

Imodoka za Volkswagen ziteranyirizwa mu Rwanda

Ubukerarugendo

Ubukerarugendo ni kimwe mu byinjiriza u Rwanda amadevise menshi guhera mu myaka icumi ishize, aho uru rwego rwagiye rwiyongeraho inyungu ya 10% buri mwaka, hashingiwe ku gipimo cy’impuzandengo.

U Rwanda rufite umwanya mwiza ku ruhando mpuzamahanga mu guteza imbere ubukerarugendo, ariko bigaragazwa ko mu gihe bwatezwa imbere kurushaho byarufasha gukurura ba mukerarugendo umunsi ku wundi.

Abasura u Rwanda kandi hari ubwo bakenera bimwe mu bikorerwa mu Rwanda. Iyi Minisiteri igaragaza ko guteza imbere inganda zibikora byakongera amadevize basigira igihugu.

Ibikorwa by'ubukerarugendo mu Rwanda na byo bikomeje gutera imbere

Serivisi

Serivisi zitangwa mu Rwanda zishimirwa n’Abanyarwanda ndetse n’abanyamahanga, bigatuma barushaho gukomeza gushora imari mu Rwanda.

Ibi ni bimwe mu byongerera ubukungu u Rwanda kubera ko iyo bashoye imari muri iki gihugu, batanga umusoro.

Abashoramari benshi babenguka u Rwanda barushima mu bijyanye no koroherezwa muri serivisi zinyuranye zirimo kwandikisha ishoramari.

Biteganyijwe ko mu myaka 10 iri imbere, uru rwego nirukomeza gutera imbere, bizarufasha guteza imbere ubukungu butajegajega.

Abashoramari bashyiriweho ikigo kibaha serivisi zose, bidasabye ko bajya ahandi

Ubuhanzi

Mu bikomeje guteza imbere ubukungu bw’igihugu harimo n’ubuhanzi nk’ubugeni, umuziki, imideli n’ubusizi.

Ubuhanzi bumaze gutera intambwe, cyane ko usanga abashora imari mu muziki bifuza gukorera ibitaramo bitandukanye mu Rwanda ndetse bagatumira abahanzi b’Abanyarwanda, bakitabira ibitaramo bitandukanye mu bihugu byo hanze.

Ibi bitanga icyizere ko ubuhanzi buramutse butejwe imbere, nta kabuza bwagira uruhare mu kongera ubukungu bw’igihugu ndetse n’iterambere ry’Abanyarwanda, by’umwihariko urubyiruko.

Mu Rwanda hatangiwe ibihembo bya Trace Awards byitabiriwe n'ibyamamare bitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .