Umubare w’imanza zicibwa hifashishijwe ikoranabuhanga waratumbagiye mu 2020

Yanditswe na Tuyishimire Raymond
Kuya 13 Mutarama 2021 saa 03:31
Yasuwe :
0 0

Inzego z’ubutabera mu Rwanda zagaragaje ko ikoranabuhanga ryagize umumaro ukomeye cyane muri iki gihe cy’ingamba zo kwirinda Coronavirus, kuko ryatumye umubare w’imanza zaciwe wiyongera cyane.

Umuvugizi w’Inkiko, Mutabazi Harisson, yabwiye IGIHE ko nubwo mu nkiko zo Rwanda hari hasanzwe hakoreshwa ikoranabuhanga rikomatanyije rya IECMS, byiyongereye mu gihe cya Covid-19.

Ibyo bigaragarira mu mubare w’imanza zaciwe hifashishijwe ikoranabuhanga wazamutse ku buryo bugaragara.

Yavuze ko muri rusange imanza zaciwe hifashishije ikoranabuhanga zisaga 430 000 kuva muri Mutarama kugeza muri Nzeri 2020. Inyinshi muri izi manza zari iz’inshinjabyaha kuko akenshi imbonezamubano bitari byoroshye kuzica hifashishijwe ikoranabuhanga.

Nubwo bigaragara ko ikoranabuhanga ryafashije kwihutisha imanza no korohereza bamwe urugendo bakoraga bajya mu rukiko, haracyagaragara imbogamizi zitandukanye.

Mutabazi yavuze ko inkiko zo mu Rwanda zigihura n’imbogamizi z’ibikoresho bidahagije bifasha mu ihuzanzira ndetse n’umuyoboro wa internet ukigenda gake .

Ati “Imbogamizi zikunze kugaragara ni izijyanye n’ibikoresho byo kwifashisha kugira ngo ikoranabuhanga rikore neza. Ni ukuvuga ko niba ari nko kuburanisha binyuze ku mashusho (video conference) , ibikoresho ntabwo bihagije, urabona ko ari ibintu byaje bitunguranye bitari mu igenamigambi risanzwe. Hari igihe murandasi nayo itagenda neza rimwe na rimwe ndetse n’abakozi bashinzwe gutanga ubufasha mu ikoranabuhanga nabo ntabwo ari benshi”.

Icyakora yavuze ko zimwe muri izo mbogamizi zatangiye gushakirwa umuti. Ati“Ibyerekeye n’imbogamizi z’ikorabuhanga byagiye bivugutirwa umuti, ubu baragenda babikemura. Ibikoresho byatangiye kuboneka harimo nka mudasobwa ziri mu bikoresho by’ibanze n’ibindi tukaba twizera ko nabyo mu gihe cya vuba bizakemuka.”

Me Nkundabarashi Moïse usanzwe wunganira abantu mu nkiko, nawe ashimangira ko ikoranabuhanga ryabaye igisubizo muri iki gihe cya COVID-19, kuko ryatumye abo baburanira badahagarika kuburana kubera icyorezo cya Coronavirus.

Ati “Ikoranabuhanga ryabaye igisubizo muri iki gihe cya Coronavirus kubera ko hari ibibazo bikomeye byo gukomeza kuburana kandi hatabayeho kwanduzanya."

Yakomeje agira ati “Byabaye igisubizo kuko byafashije gukomeza kuburana nubwo byakozwe mu buryo bw’ikoranabuhanga butandukanye n’uburyo twari dusanzwe dukoramo, binatuma hari ababona ubutabera”.

Nkundabarashi yavuze ko ikoranabuhanga ryatumye hari abamenya ibyemezo by’inkiko maze bararekurwa abandi bamenya ibyemezo bafatiwe hifashishijwe ikoranabuhanga , ibintu avuga ko byari bigoye iyo ritaza gukoreshwa.

Icyakora yavuze ko nubwo ikoranabuhanga ryafashije benshi kumenya ibyemezo by’inkiko, hakiri imbogamizi zitandukanye.

Ati “Ibihe bagombaga kumara baburana hari aho byagendaga byiyongera ahanini bitewe n’uko ikoranabuhanga ryabaga ritateguwe ku buryo ryahita ritangira gusubiza ibibazo byabo bantu bafunze by’agateganyo”.

“Hari ahantu hamwe na hamwe usanga ikibazo cya internet gikomeye. Kuri Skype hari aho usanga murandasi atari nziza ugasanga umuburanyi atumvikana n’urukiko ariko hari inkiko usanga zifite uburyo bukoreshwa hifashishijwe amashusho (Video conference) yo iyo ikoreshwa, nta kibazo kiba gihari.”

Me Nkundabarashi asanga ubu buryo bw’ikoranabuhanga bwagakomeje no mu gihe cyose COVID-19 yaba itagihari.

Mu rwego rushinzwe Imfungwa n’Abagororwa (RCS) nabo bishimira ko muri iki gihe cya Coronavirus, ikoranabuhanga ryatumye amaburanisha akomeza.

Umuvugizi wa RCS, SSP Uwera Gakwaya Pelly, wabwiye IGIHE ko ikoranabuhnga ryagabanyije umubare munini w’abajyaga mu nkiko rimwe na rimwe byashoboraga kubaviramo kwandura COVID-19.

Ati “Kera twatwaraga abantu benshi mu nkiko ariko ubu ntabwo ariko tukibigenza, baburanira aho bafungiye. Byagabanyije amafaranga yakorereshwaga cyane mu gihe imfungwa n’abagororwa bagiye mu rukiko.”

Yakomeje agira ati ”By’umwihariko cyane cyane muri iki gihe cya COVID-19, byatumaga bashobora kwandura kubera umubare w’abajya hanze”.

Usibye kuba ikoranabuhanga ryaragabanyije amafaranga yakoreshwaga, Gakwaya yavuze ko byagabanyije umubare munini w’abatorokaga .

Ati”Urabona bajyaga hanze bagapanga gutoroka bigateza umutekano muke, mu by’ukuri twungutse byinshi.”

U Rwanda kuva mu mwaka 2016 rwatangije gahunda y’ikoranabuhanga rikomatanyije rya IECMS, rigamije korohereza abantu mu gutanga ikirego ndetse no guhererekanya amakuru ku kirego. Byitezwe ko gukoresha ikoranabuhanga mu nkiko mu mwaka wa 2024 bizaba bigeze ku 100%.

Umuvugizi w'Inkiko Mutabazi Harrisson yavuze ko ikoranabuhanga ryafashije cyane mu kwihutisha imanza mu gihe isi yari ihanganye na Covid-19
Me Nkundabarashi Moïse yasabye ko na nyuma ya Covid-19, ikoranabuhanga ryazakomeza kwifashishwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .