Imyaka 61 irashize: Mbonyumutwa yakubiswe azira iki?

Yanditswe na Ferdinand Maniraguha
Kuya 1 Ugushyingo 2020 saa 06:58
Yasuwe :
0 0

Imyaka 61 irashize, havuzwe ko Mbonyumutwa Domique wabaye Perezida w’inzibacyuho mu Rwanda yakubiswe urushyi n’insoresore z’Abatutsi, bigateza imvururu mu gihugu hose, bigatuma Abatutsi bicwa abandi bakameneshwa mu gihugu.

Ni inkuru n’ubu itarasobanuka neza, kuko nubwo hari ababyemera hari abandi babihakana bavuga ko gukubitwa k’umuntu nka Mbonyumutwa wari sous-chef muri Ndiza (Gitarama), bitari gutuma Abatutsi bahigwa mu gihugu hose.

Byabaye ari ku Cyumweru tariki 1 Ugushyingo 1959, muri Kiliziya Gatolika bizihizaga Umunsi Mukuru w’Abatagatifu bose.

Muri iyo minsi mu gihugu hari harimo umwuka mubi wa politiki, Ababiligi bifashishije amashyaka y’Abahutu bashakaga gukuraho umwami bagashyiraho Repubulika. Hari Abanyarwanda benshi batumvaga impamvu ya Repubulika n’uburyo bagiye kwibagirwa ingoma ya cyami bari bamaranye imyaka myinshi.

Amashyaka ya Politiki niyo yari abishyushyemo cyane ku isonga hari MDR Parmehutu yashakaga Repubulika na UNAR yashakaga Ubwami.

Mbonyumutwa Dominiko yabarizwaga mu Ishyaka rya MDR-Parmehutu. Kuri icyo cyumweru Mbonyumutwa yakubisweho, yari avuye mu Misa mu Byimana.

Misa irangiye, Mbonyumutwa yagiye gusura Padiri Marara wabaga kuri iyo Paruwasi, avuyeyo atashye ari mu nzira nibwo yahuye n’abasore b’Abatutsi baramukubita.

Umusaza Karekezi Pascal umwe mu bakubise Mbonyumutwa, mu 2017 yabwiye IGIHE ko nta wari wabatumye kumukubita ahubwo ngo byatewe n’uburyo yari “ashyigikiye ko bazasenyera abantu. Aho kugira ngo umuco w’igihugu azawukurikize, yari yarafashe uw’Ababiligi wo kugira ngo u Rwanda ruzabe Repubulika kandi Repubulika icyo yabyaye warakibonye.”

Inzobere mu mateka y’u Rwanda Nizeyimana Innocent yabwiye IGIHE ko yigeze kuganira na Boshya Léonard, umwe mu bafatanyije na Karekezi gukubita Mbonyumutwa.

Boshya yavuze ko bari basanzwe bazi Mbonyumutwa na we abazi. Ngo yabasanze ahantu basangiraga agacupa, abiyenzaho ababaza niba bakiri mu kiriyo cy’umwami wabo (Mutara III Rudahigwa) wari umaze iminsi atanze, ndetse ko nabo mu minsi mike bazamukurikira.

Nkuko Nizeyimana abivuga, Boshya yagize ati “Amaze kuducishamo amaso, aratubwira ngo muracyari ku kiriyo cy’umwami wanyu se mwa Batutsi mwe? Namwe mu gihe gito tuzamubakurikiza.”

Boshya avuga ko byabarakaje cyane, bahagurukira rimwe baramufata bamukubita hasi ariko “ubwoba buhita buza kuko twari tuzi ko ari umutware. Gukubita umutware rero muri biriya bihe ntibyari byoroshye. Ubwoba bwaratwishe duhita tumurekura. N’urwo rushyi bavuga ntarwo twamukubise, gusa twamutuye hasi duhita dukwira imishwaro.”

Boshya n’umuryango we bahise bahungira i Burundi, mu gihe Karekezi we avuga ko yagumye mu Rwanda kugeza mu 1961 ubwo yahungaga.

Nyuma y’uko gukubitwa kwa Mbonyumutwa, hakwirakwijwe ibihuha ko yishwe, abari mu Ishyaka rya Parmehutu hirya no hino basaba abayoboke babo kwihorera.

Uwari Visi Guverineri wa Ruanda - Urundi, Jean Paul Harroy, yemeza ko muri izo mvururu, hasenywe inzu z’Abatutsi zisaga ibihumbi umunani. Iperereza ryakozwe n’Umuryango w’Abibumbye icyo gihe rivuga ko hapfuye ababarirwa muri 200, nubwo Harroy yavuze ko bashobora kuba barenga, kubera ko hari abashyingurwaga mu ibanga bagahita bahunga. Ni kimwe n’abakomeretse, Loni yatangaje 317 ariko Harroy akavuga ko hari abahungaga bakomeretse batabazwe.

Gukubitwa kwa Mbonyumutwa niko kwakongeje imvururu?

Nizeyimana Innocent ntiyemera ko uko gukubitwa ariko kwatumye Abatutsi bibasirwa mu gihugu, ahubwo avuga ko ari imbarutso y’umugambi wari usanzwe uhari.

Ati “Ikubitwa rya Mbonyumutwa ryarakabirijwe rihinduka urwitwazo rwo kwirukana Abatutsi mu Rwanda kuko yari gahunda yabo ndende yo gusigira igihugu abagombaga gusigara bakorera inyungu zabo.”

“N’iyo Mbonyumutwa adakubitwa, ntihari kubura indi mpamvu ituma Abatutsi birukanwa bakanahohoterwa nk’uko byagenze, kugira ngo Ababiligi basigire ubutegetsi abashobora gukomeza kubungabunga inyungu zabo muri kano karere.”

Mu gitabo Musangamfura S yise ‘Le parti MDR-Parmehutu. Information et propaganda, Memoire se licence, Ruhengeri, 1987’ ku rupapuro rwa 91 avuga uburyo no mu bice bitegereye Ndiza icyo gihe hatangiye ubukangurambaga bwo kwihorera ku Batutsi.

Nko mu Ruhengeri, ngo uwari Sous Chef Balthazar Bicamumpaka yabwiye abaturage ko nibatirwanaho bazashira kuko Abahutu mu Nduga na Marangara babamaze, avuga ko Mbonyumutwa yarangije gupfa, ko na Gregoire Kayibanda arembejwe n’inkoni mu Bitaro i Kabgayi.

Nizeyimana avuga ko uko byagenda kose, nubwo Mbonyumutwa yari yakubiswe, bitagombaga kuba impamvu ituma Abatutsi mu gihugu hose bibasirwa.

Ati “Hagombaga guhanwa abakoze urwo rugomo nyine, bagashakishwa bakabihanirwa, cyane ko bari bazwi. Ariko guhita bahiga bukware Abatutsi bose mu gihugu n’abatavuka hafi aho, abadafitanye isano n’abo bakekwaga n’abatarigeze bamenya Mbonyumutwa, bigaragara ko ari umugambi wari umaze igihe kirekire ahubwo harabuze imbarutso yo kuwushyira mu bikorwa.”

Karekezi avuga ko nyuma yo gukubita Mbonyumutwa, nta wagiye kubarega mu rukiko cyangwa ngo aze gushaka abo basore abe aribo bihoreraho.

Muri Mutarama 1961 nibwo Mbonyumutwa yatorewe kuba Perezida, nyuma y’icyiswe ‘Coud d’Etat y’i Gitarama’ ubwo MDR Parmehutu yatangazaga ko ubwami buvuyeho u Rwanda ruhindutse Repubulika.

Mbonyumutwa yabaye Perezida w’u Rwanda kuva ku wa 28 Mutarama 1961 kugeza ku wa 26 Ukwakira 1961.

Mu 1965 yabaye umudepite aza gusuzugura MDR Parmehutu ubwo yari umudepite (ata umurongo) birangira ahejwe muri politiki. Yapfuye tariki 26 Nyakanga 1986, aguye mu Bitaro bya Ghent mu Bubiligi.

Inkuru bijyanye: Ikiganiro na Karekezi wakubise urushyi Mbonyumutwa wabaye Perezida wa mbere w’u Rwanda

Nyuma yo gukubitwa kwa Mbonyumutwa (hagati) imvururu zariyongereye mu gihugu abo mu ishyaka rye bamenesha Abatutsi
Kayibanda, Mbonyumutwa n'abandi bari ibikomerezwa muri MDR Parmehutu ubwo hemezwaga ko ubwami buvuyeho
Kerekezi yavuze ko Mbonyumutwa bamukubise kuko yari ashyigikiye ubugizi bwa nabi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .