Impunzi zirenga 150 zavuye muri Libya zabonye ibindi bihugu bizakira mu gihe cya Covid-19

Yanditswe na Muhonzire Sylvine
Kuya 18 Mutarama 2021 saa 09:04
Yasuwe :
0 0

Minisiteri Ishinzwe Ibikorwa by’Ubutabazi (MINEMA) yavuze ko icyorezo cya Coronavirus kitabangamiye ibikorwa byo kwakira impunzi no kuzishakira ibindi bihugu bizakira, kuko impunzi 156 zavuye muri Libya zabonye ibindi bihugu bizakira mu mezi icumi ashize.

Muri bo, 87 bajyanywe gutura muri Suède, 46 muri Norvège, 18 muri Canada naho abandi batanu batuzwa mu Bufaransa.

Kuva mu mwaka wa 2019 kugeza ubu, u Rwanda rwakomeje kwakira impunzi n’abandi bashaka ubuhungiro bari babayeho nabi mu gihugu cya Libya, nyuma yo kuhamara imyaka bashaka uko bakwerekeza ku mugabane w’u Burayi, baciye mu nyanja ya Méditerranée ariko bikanga.

Covid-19 itangira, u Rwanda ntirwahagaritse icyo gikorwa cyo kubakira, kuko kuva muri Werurwe ubwo iki cyorezo cyageraga mu gihugu rumaze kwakira abagera kuri 209.

Amasezerano arebana no kuzana izi mpunzi yashyizweho k’ubufatanye bwa Guverinoma y’u Rwanda, Umuryango wa Afurika yunze Ubumwe (AU) n’Ishami ry’Umuryango w’Abibumbye ryita ku mpunzi, UNHCR.

Ku ikubitiro haje impunzi 500 muri Nzeri 2019, zituzwa mu nkambi ya Gashora iherereye mu Karere ka Bugesera, mu ntara y’u Burasirazuba.
Umunyamabanga Uhoraho muri MINEMA, Olivier Kayumba, yabwiye The New Times ko hashyizweho gahunda yo gukurikiza amabwiriza ajyanye no kwirinda Covid-19 muri iyo nkambi kugira ngo hirindwe ikwirakwira ryayo.

Yagize ati “Turi gukurikiza amabwiriza yo kwirinda Covid-19 nkuko twabisabwe na Minisiteri y’Ubuzima, binyuze mu gushyiraho ahantu abantu bakarabira hahagije, gutanga udupfukamunwa no gushishikariza abantu kutwambara igihe cyose bagiye ahantu hahurira abantu benshi.”

Kayumba yavuze ko kandi ahantu hose hatangirwa serivisi, hari ibinyemetso by’aho abantu bagomba guhagarara cyangwa kwicara kugira ngo hubahirizwe gahunda yo guhana intera.

Kuva u Rwanda rwatangira ibikorwa byo kwakira impunzi n’abashaka ubuhungiro baturutse muri Libya, MINEMA ivuga ko rumaze kwakira abagera kuri 515, naho abarenga 200 bakaba barabonye ibihugu bibakira cyane cyane iby’i Burayi.

Impunzi zisaga 150 zavuye muri Libya zabonye ibindi bihugu bizakira mu mezi icumi ashize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .