00:00:00 IGIHE NETWORK KN KINYARWANDA EN ENGLISH FR FRANCAIS

Impungenge ku gihombo Leta iterwa no gusenya ibice by’Umujyi wa Kigali byubatswe kera

Yanditswe na Kanamugire Emmanuel
Kuya 7 July 2022 saa 07:15
Yasuwe :

Bamwe mu bagize Komisiyo ya Sena y’Iterambere ry’Ubukungu n’Imari, bagaragaje impungenge z’uko Leta ishyirwa mu gihombo n’uko hari ingengo y’imari ishyirwa mu bikorwa byo gusenya no kongera kubaka bimwe mu bice by’Umujyi wa Kigali byubatswe kera.

Babigarutseho mu biganiro iyi komisiyo yagiranye n’ubuyobozi bw’Umujyi wa Kigali kuri uyu wa 7 Nyakanga 2022, hagamijwe kumenya ibikorwa mu kwihutisha iterambere rirambye ryawo.

Ibice bimwe na bimwe by’Umujyi wa Kigali byaravuguruwe, ibindi birasenywa hubakwa amasoko ya kijyambere, amahoteli akomeye n’ibindi ku buryo utapfa kumenya uko hari hameze mbere.

Nubwo inyubako nshya zituma Umujyi urushaho gusa neza, hari abavuga ko no gusenya izishaje zikavanwaho burundu bidakwiriye kuko bitera igihombo mu buryo ubu n’ubu ndetse ko iterambere no kwaguka kwawo bitavuze gusenya ibice byubatswe kera.

Mu mijyi yo mu bindi bihugu bivugwa ko usanga bitondera ikintu cyo gusenya ibice byubatswe kera ahubwo babireka maze ku ruhande hakubakwa ibindi bijyanye n’igihe.

Ibyo bice bishaje ni byo ba mukerarugendo bakunda gusura ndetse bikagira n’uruhare mu gutuma amateka atazimangana.

Visi Perezida wa Komisiyo ya Sena ishinzwe Iterambere ry’Ubukungu n’Imari, Senateri Nyinawamwiza Laetitia, yavuze ko Umujyi wa kera ukwiye kongererwa ibikorwaremezo aho gusenywa.

Ati “Hari umujyi nabayemo, habaga ‘Vieux Namur’ na ‘Nouveau Namur’, ubwo wa mujyi wa kera ntibawusenye, wenda bakawongerera ibikorwaremezo ariko imijyi mishya ikubakwa ikamera neza.”

Agaruka ku bigenda bikorwa mu Mujyi wa Kigali byo gusenya ’quartiers’ za kera yagaragaje impungenge ko byaba bishyira Leta mu gihombo nubwo hatagaragajwe ingano yacyo.

Ati “Aho ingengo y’imari ntituyishyira muri ya mijyi ishaje dusenya? Urumva ko turi gushyira Leta mu gihombo. Mbifata nk’igihombo niba tugenda twongera imihanda tudahanga imishyashya, dusenya, dutanga ingurane. Ubwo ni ko n’ibindi bikorwaremezo bikurikiraho, byaba iby’amazi, amashanyarazi na ’fibre optique’. Ubwo rero nkumva hariho ikintu cyo gusesagura no gukoresha nabi ingengo y’imari.”

Yasabye ko inzozi zo guhindura Kigali kuba “Umujyi w’Ubuzima”; “Umujyi w’icyerekezo”; “Umujyi wa rubanda” zashyirwa mu bikorwa, agaragaza ko kuba hari uduce tutagira amazi bituma hari ibidashoboka ko byagerwaho.

Abantu ntibicaye hejuru y’ibiyaga batabizi?

Mu myubakire yo mu Mujyi wa Kigali, ni itegeko ko buri muntu acukura ibyobo bifata amazi hafi ye.

Senateri Nyinawamwiza yavuze ko abantu bagenda batura begeranye amazi yo muri ibyo byobo ashobora guhura bikaba byateza ingaruka.

Ati “Niba buri nzu ifite icyobo cy’amazi, nta hantu ayoborwa, ntituzisanga twubatse hejuru y’ibiyaga. Ntekereza ko icyo kibazo na cyo kiri mu byihutirwa abantu bareba."

Senateri Nyinawamwiza Laetitia (iburyo) yagaragaje ko leta yaba iterwa igihombo no gusenya ibice by'Umujyi wa Kigali byubatswe kera

Ibibazo mu ishyirwa mu bikorwa ry’igishushanyombonera cya Kigali

Ubuyobozi bw’Umujyi wa Kigali buvuga ko igishushanyombonera cyawo cyavuguruwe hashingiwe ku bitekerezo by’abaturage kugira ngo ube uw’ibyiciro byose kandi abaturage bawibonamo.

Senateri Mureshyankwano Marie Rose yanenze uburyo gishyirwa mu bikorwa, avuga ko bigenda buhoro ndetse agaragaza ko bikiri ingorabahizi kugira ngo umuntu abone icyangombwa cyo kubaka.

Ati “Hagiye gushira imyaka ibiri igishushanyombonera kivuguruwe ariko iyo ureba uko kigenda gishyirwa mu bikorwa tubona bisa n’aho bigenda buhoro. Mu myubakire ubona bigenda gake cyane, abafitemo ubutaka bagahitamo kubusiga bakajya kubaka muri ya mijyi yo ku ruhande. Nkeka ko kubaka bya bibanza bafite muri Kigali bitajyanye n’ubushobozi bwabo.”

Umuyobozi Wungirije w’Umujyi wa Kigali ushinzwe Imiturire n’Ibikorwaremezo, Dr Mérard Mpabwanamaguru, yavuze ko biterwa n’uko hari abantu baka impushya zo kubaka ahataragenewe kubaka cyangwa bakazisaba ahantu hadatunganyijwe.

Yavuze ko igishushanyombonera cy’Umujyi wa Kigali kigomba kuzashyirwa mu bikorwa mu byiciro bitatu. Ahari mu cyiciro cya mbere ni muri CBD (Central Business District), ni ukuvuga mu bice bya Muhima, Nyarugenge no hejuru mu Gitwa. Hari kandi ku mihanda iva ku Kibuga cy’Indege cya Kigali yinjira mu Mujyi rwagati no ku muhanda uva Rond Point ujya mu Majyepfo.

Yakomeje ati "Imbaraga ziri gushyirwa mu bice biri mu cyiciro cya mbere bitabujije ko no mu bindi bice ahubakwa cyubahirizwa. Umuntu ufite ubutaka butabyazwa umusaruro muri icyo gice asahobora kubwamburwa bugahabwa undi."

Ku bari mu cyiciro cya kabiri n’icya gatatu bafite inzu zimeze nabi ku muhanda bahabwa uruhushya rwo kuzivugurura bakaba bazikoresha ibyo zakorerwagamo mbere cyangwa ibindi byemewe n’igishushanyombonera muri ako gace.

Ikiba kigamijwe ngo ni ukugira ngo umujyi ugire isura nziza ariko ibyo bakora biba ari iby’agateganyo kugeza igihe na bo bazagerwaho.

Visi Perezida wa Komisiyo, Senateri Nyinawamwiza, yasabye ko umuturage yafashwa kugira ngo hatabaho kumubeshya byatuma agwa mu gihombo.

Ati "Niba hasigaye igihe gito mukaba muzagaruka n’ubundi mukamusenyera, ni nko kubeshya umuturage. Ubwo ni ishoramari bwoko ki aba akoze? Umuturage mu bumenyi n’ubushobozi bwe akoze ishoramari ritarambye, akeneye gufashwa."

Perezida wa Komisiyo, Senateri Nkusi Juvénal, yavuze ko igice cya Kiyovu na cyo gikwiye kuvugururwa mu rwego rwo kuzigama ubutaka bwo guturaho.

Ati "Nyuma y’imyaka 50 mu Kiyovu na ho hakwiye kuvugururwa kugira ngo n’agaciro kaho kazamuke. Abahafite barishoboye ubasabye gushyiramo imbaraga bakubaka inzu z’amagorofa atanu cyangwa 10 bishyize hamwe byashoboka. Ntabwo uduce dukennye ari two twari dukwiye kurebwa gusa n’ahandi hose hakwiye kugerwaho."

Umujyi wa Kigali uvuga ko ku himurwa abantu hakubakwa inzu ndende zakira imiryango myinshi icyarimwe nibura ahahoze imiryango 10 iyo hamaze kubakwa hatuzwa igera kuri 28.

Senateri Nkusi yavuze ko mu Kiyovu havuguruwe ubutaka nk’ubwo bushobora gutuzwaho imiryango igera kuri 40.

Senateri Mureshyankwano Marie Rose yavuze ko ishyirwa mu bikorwa ry'igishushanyombonera cy'Umujyi wa Kigali rigenda buhoro
Perezida wa Komisiyo ya Sena y’Iterambere ry’Ubukungu n’Imari, Senateri Nkusi Juvénal, yavuze ko Kiyovu ikwiye kuza mu bice by'Umujyi birebwa n'amavugurura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .