Impaka mu Rugwiro ubwo MDR yavugaga ko u Rwanda ruyobowe n’abanya-Mutara

Yanditswe na Ferdinand Maniraguha
Kuya 12 Ugushyingo 2020 saa 07:14
Yasuwe :
0 0

Ubumwe n’ubwiyunge ni imwe mu ngingo zagoranye kugerwaho mu Rwanda nyuma ya Jenoside yakorewe Abatutsi kandi zari ingenzi mu kubaka u Rwanda rushya. Umwiryane n’urunturuntu byari mu bice byose bigize ubuzima bw’igihugu ku buryo iterambere ryari kure nk’ukwezi ibyo bitarashakirwa umurongo.

Perezida n’abo bakorana babaga barebana y’ingwe, Minisitiri n’abamwungirije badacana uwaka ku buryo umwanya washiriraga mu matiku kurusha gushakira hamwe icyubaka igihugu.

Byatumye mu 1998 ubwo ibiganiro byo mu Rugwiro byatangizwaga bigamije gushakira hamwe ejo hazaza h’u Rwanda, ingingo y’ubumwe bw’abanyarwanda ari imwe mu zahawe umwanya ukomeye.

Ubwo abitabiriye ibiganiro baganiraga, abari bitabiriye inama basanze ishyaka MDR Parmehutu ryashinzwe na Grégoire Kayibanda ryaragize uruhare mu gusenya ubumwe bw’abanyarwanda.

Byarakaje abagize MDR, ishyaka ryari rimaze imyaka irindwi ryiyuburuye nyuma y’iyemerwa ry’amashyaka menshi mu 1990. Ni ishyaka ryari rifitanye isano na MDR Parmehutu yo kubwa Kayibanda.

Tariki 23 Gicurasi 1998, MDR yohereje inyandiko abari bitabiriye inama, ifite umutwe ugira uti “Umusanzu wa MDR mu gushaka ibisubizo by’ibibazo byugarije u Rwanda”.

Ku kijyanye n’ubumwe bw’abanyarwanda, MDR yavuze ko na mbere y’uko abazungu baza mu Rwanda nta bumwe bwari buhari kuko abatutsi bari baratsikamiye abahutu bigakomeza mu gihe cy’ubukoloni. Iryo shyaka ryavuze ko abazungu na Kiliziya Gatolika nta ruhare bagize mu gusenya ubumwe bw’abanyarwanda, ahubwo ko ubwami ari bwo bwasenye ubumwe bw’abanyarwanda.

U Rwanda mu maboko y’abanya-Mutara?

Bavuze ko Parmehutu yatangiye ari ishyaka ryiza, rikaza gutakaza umurongo mu 1964 ubwo ryasigaraga ari ryo ryonyine ryemewe mu gihugu bityo ko ibyo ryakoze mbere byari byiza.

Muri iyo nyandiko, MDR yazanye ingingo nshya, nkuko bigaragara muri raporo y’ibyavugiwe mu nama zo mu Rugwiro. Yavuze ko irondakarere rigikomeje mu Rwanda kuko igihugu kiyobowe n’abantu baturuka mu Mutara.

Bagize bati “MDR ibona uduce twa Nduga, Rukiga na Bushiru twarometswe ku Mutara, iwabo w’abatutsi bayoboye igihugu. MDR kandi isanga mu bibazo bitanya abanyarwanda hariyongereyeho ikibazo cy’indimi, Igifaransa n’Icyongereza bikoreshwa ngo abatabizi bahezwe mu mirimo.”

Iryo shyaka kandi ryavuze ko gushyira abayobozi mu myanya no mu mirimo bikorwa mu bwiru kandi bigateranya abanyarwanda kuko bishingira ku ndimi n’aho abasaba akazi bakomotse.

Kumva ibibazo bikomeye byari bizamuwe na rimwe mu mashyaka akomeye mu gihugu, inama yo mu Rugwiro ntiyari gukomeza bidahawe umurongo.

Abitabiriye bongeye kuganira bahana ibitekerezo, baza guhuriza ku kuba ishyaka MDR Parmehutu ryaravutse rishingiye ku bwoko ngo ryigarurire abahutu.

Bagaragaje ko abanyarwanda batakundiye Parmehutu kubera ko yari izanye demokarasi na Repubulika kuko abanyarwanda batari babizi dore ko abagera kuri 95 % batari bazi gusoma, bityo icyatumye bariyoboka cyane ari inyito ya Parmehutu ishingiye ku bwoko abenshi biyumvagamo.

Abitabiriye kandi bavuze ko kuba MDR igaragaza ko abazungu na Kiliziya Gatolika nta ruhare bagize mu bibazo by’u Rwanda, ari ugushaka kubagusha neza gusa, kandi ko kutabivuga ari ikibazo kuri ejo hazaza.

Hatanzwe ingero zitandukanye z’uburyo abazungu baciyemo ibice abanyarwanda harimo nko kuba baraje bavuga ko abatutsi ari bo bazi ubwenge kurusha abahutu, kwifashisha abatutsi bangisha abahutu ubwami, kuba Parmehutu yaravukiye mu bukarani bwa Kiliziya i Kabgayi ibifashijwemo n’abakoloni. Icyo gihe hanavuzwe amazina y’abapadiri bagize uruhare mu gushinga iryo shyaka.

Ku kibazo cy’irondakarere MDR yari yazamuye no kuba u Rwanda ruyobowe n’abakomoka mu Mutara, abitabiriye inama basabye MDR gutanga ingero zigaragaza ko abayoboye u Rwanda bakomoka mu Mutara.

Byabaye mu gihe igihugu cyari kiyobowe na Perezida Pasteur Bizimungu wakomokaga ku Gisenyi, Rwigema wari Minisitiri w’Intebe akomoka i Gitarama.

Babajije Rwigema Pierre Célestin wari Minisitiri w’Intebe kandi ari muri MDR, niba mbere yo kumushyira muri Guverinoma yarabanje kwimukira mu Mutara. Icyo kibazo cyanabajijwe abandi bayobozi barimo abaminisitiri, abadepite n’abandi bayobozi bari bahari, niba barabanje kwimukira mu Mutara ngo bahabwe imyanya muri Leta.

Hanabijijwe abayobozi bari aho niba barabanje kubazwa niba bazi Icyongereza mbere yo gushyirwa mu myanya. Ibisubizo byabonetse byagaragaje ko ibyo MDR yavugaga atari byo kuko basanze muri Guverinoma harimo abantu bakomoka mu duce twose tw’igihugu.

Nyuma yo gusesengura ibibazo byose MDR yari yagaragaje, abitabiriye inama bavuze ko iryo shyaka ryifata nk’aho ritari muri Leta, ndetse ryifata nk’aho nta ruhare rifite mu makosa yagiye akorwa mu Rwanda n’uruhare mu kuyashakira ibisubizo.

Bagaragaje ko MDR igikomeye ku ngengabitekerezo n’amahame bya Parmehutu ya kera, yemezaga ko u Rwanda ari urw’abahutu gusa badakwiriye gusangira ubutegetsi n’abatutsi.

Nyuma yo kunengwa, abari bahagarariye MDR mu nama bashyikirije biro politiki y’ishyaka ibyagaragajwe n’ibyo banenzwe, babiganiraho bafata indi myanzuro bisubiraho ku byo bari banditse mbere.

Mu yindi nyandiko yashyikirijwe abitabiriye inama zo mu Rugwiro, iryo shyaka ryavuze ko ryamaganye ibitekerezo bicamo ibice abanyarwanda ari nabyo byabaye kuri Parmehutu ya Kayibanda. Yamaganye ivangura ryaranze Parmehutu ubwo yirukanaga abatutsi mu gihugu, kuko bihabanye na demokarasi.

MDR yemeje ko nubwo Parmehutu yitwaga ko ivugira abahutu, urebye ntacyo yabamariye ahubwo byari indirimbo gusa kuko hari abahutu bakomeje gukena no kubaho nabi.

Mu nyandiko ya kabiri, iryo shyaka ryavuye ku izima ryemera ko abakoloni na Kiliziya bagize uruhare mu kubiba amacakubiri ku banyarwanda.

Muri iyo nama, MDR yemeye gusubira mu mahame yayo n’ibiyiranga, ikavanamo igituma abantu bayitiranya na Parmehutu. Iryo shyaka kandi ryiyemeje gukosora ibyo ryanenzwe no gufatanya na Guverinoma n’izindi nzego mu kubaka ubumwe bw’abanyarwanda.

Icyakora, nubwo MDR yari yemeye kwisubiraho, umwiryane n’amacakubiri imbere mu ishyaka byarakomeje, ibice bimwe bishyigikiye amahame ya Parmehutu ya kera, abandi bashyigikiye MDR nshya.

Kugeza mu 2002 ishyaka MDR ryari rikirangwamo ibibazo kugeza ubwo Guverinoma yiyemeje kunga impande zitavugaga rumwe ariko biranga. Byatumye uwo mwaka hashyirwaho Komisiyo idasanzwe y’Inteko Ishinga Amategeko igomba kwiga ikibazo cya MDR.

Raporo ya Komisiyo yagaragaje ko iryo shyaka ryari ryaracengewe n’ivangura. Ryagaragaje ko hari harashinzwe udutsiko twari tugamije gukangurira abaturage kuzashyigikira MDR mu matora ya Perezida n’ay’abadepite mu 2003, hashingiwe ku iturufu y’ubwoko.

Muri Mata 2003, Inteko yasabye Guverinoma gusesa ishyaka MDR, byemezwa n’inama y’abaminisitiri yateranye muri Gicurasi uwo mwaka.

Inkuru bijyanye: Irunduka ry’Ishyaka MDR, ryazuwe na Twagiramungu akarisiga mu mwiryane

Bamwe mu bayobozi ba MDR mbere ya Jenoside yakorewe Abatutsi ubwo bari mu nama kuri Stade Amahoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .