Imirimo y’uru rwego ruzwi nka MVA-R (Mécanisme de Vérification Ad-hoc Renforcé) iratangirizwa mu muhango uhuriza mu mujyi wa Goma abahagarariye u Rwanda, RDC na Angola kuri uyu wa 5 Ugushyingo 2024 nk’uko byemejwe na guverinoma ya RDC.

Uru rwego rwavuguruwe ubwo hatangiraga ibiganiro kuri gahunda yo gusenya FDLR ndetse no gukuraho ingamba z’ubwirinzi u Rwanda rwashyizeho, nyuma y’ibitero uyu mutwe w’iterabwoba wagabye mu majyaruguru yarwo muri Werurwe, Gicurasi na Kamena 2022.

Nk’uko byemejwe n’intumwa z’ibihugu byombi ku rwego rw’abaminsitiri zahuriye mu biganiro i Luanda, inshingano z’ingenzi rufite ni izo kugenzura uko FDLR izasenywa n’uko u Rwanda ruzakuraho izi ngamba z’ubwirinzi.

Imirimo ya MVA-R igiye gutangira nyuma y’aho inzobere mu iperereza z’ibihugu bitatu, zihuriye i Luanda tariki ya 30 n’iya 31 Ukwakira 2024, zikemeranya ku bikorwa bigize gahunda yo gusenya FDLR.

Biteganyijwe ko tariki ya 16 Ugushyingo intumwa zo ku rwego rw’abaminisitiri na zo zizahurira i Luanda, zisuzume raporo yateguwe n’inzobere mu iperereza, aho na zo zishobora kwemeza raporo y’ibikorwa byo gusenya uyu mutwe w’iterabwoba.

Umuhango wo gutangiza uru rwego urabera mu mujyi wa Goma, hafi y'u Rwanda