00:00:00 IGIHE NETWORK KN KINYARWANDA EN ENGLISH FR FRANCAIS

Imbamutima za Uwingeneye wamaze umwaka aterura umugabo we waryamye ari muzima bugacya yagagaye

Yanditswe na Nsanzimana Erneste
Kuya 5 Ukuboza 2022 saa 07:58
Yasuwe :

Umugabo witwa Havugimana Nsanzineza Jean Bosco wo mu Murenge wa Macuba mu Karere ka Nyamasheke, yaryamye ari muzima bucyeye asanga amaguru yagagaye, kuva uwo munsi yahise atakaza ubushobozi bwo kwivana ahantu hamwe ngo yigeze ahandi.

Havugimana w’imyaka 38, ingingo ze zose zakoraga neza nta hantu na hamwe ababara. Amasaha make mbere y’uko amugara yari yiriwe ahembera ibishyimbo.

Uwo munsi ibintu byarahindutse umugore atangira guca inshuro wenyine agatunga abana n’umugabo. Ubu bumuga bwabateje ubukene, abana bamwe bava mu ishuri kubera kubura ibikoresho by’ishuri ndetse bamwe mu baturage batangira gusaba Uwingeneye guta uyu mugabo akajya kwishakira undi.

Uwingeneye na Havugimana bafitanye abana bane babyaranye mu myaka 16 bamaze babana. Avuga ko akunda umugabo we bityo ko adashobora kumusiga ngo ajye gushaka undi cyane ko noneho nta n’uwo yaba amusigiye.

Ati "Ntabwo namuta kubera ko buriya ntagira secyangwa nyina, ni jye papa we nkaba na mama we, ngomba kubana na we kugeza ashaje. Turakundanye nta kibazo. Hari n’abambwira ngo nimute njye gushaka undi mugabo nkababwira ko bitakunda".

Uwingeneye Immaculée yagerageje kuvuza umugabo we mu bitaro bya Kibogora, Kibuye na Ruhengeri ariko kugeza n’ubu nta kirahinduka. Abaganga babwiye Havugimana ko umugongo we wagize ikibazo, bityo ko ariyo mpamvu amaguru ye adakora. Umwaka wose ushize umugore amuterura akamujyana hanze, aho amusize akaba ariho amusanga n’imvura yagwa ikahamunyagirira.

Kuri uyu wa 3 Ukuboza 2022, ubwo hizihizwaga umunsi mpuzamahanga w’abafite ubumuga, Havugimana ni umwe mu bantu bafite ubumuga bahawe inyunganirangingo. Umugore yavuze ko bimushimishije kuba umugabo we atazongera kunyagirirwa hanze yabuze uko yijyana mu nzu kugama.

Ati "Namusigaga mu nzu nkajya guca inshuro nagaruka aho namusize nkaba ari ho musanga. Nta kintu na kimwe yakoraga iyo imvura yagwaga; namusize hanze yahamunyagiriraga. Ubwo abonye akagare ubuzima bwe bugiye guhinduka azajya abasha kwivana ahantu hamwe nk’iyo mvura ntizongera kumunyagirira hanze azajya yijyana mu nzu".

Mu karere ka Nyamasheke habarurwa abafite ubumuga barenga 10.000 muri bo abagore barenga 6000.

Uwineza James, Umuhuzabikorwa w’Inama y’Igihugu y’abantu bafite ubumuga mu Karere ka Nyamasheke yashimye ubushake bwa Leta y’u Rwanda mu gufasha abantu bafite ubumuga gusa avuga ko bagihura n’imbogomizi zitandukanye zirimo no kutabona insimbarangingo n’inyunganirangingo bityo ko hakenewe uruhare rwa buri wese kugira ngo abantu bafite ubumuga babashe gukora biteze imbere.

Ati "Turasaba ko habaho impinduka mu myumvire haba mu nzego za Leta, iz’abikorera no mu miryango itari iya Leta kugira hashakwa iterambere ridaheza".

Umuyobozi w’Akarere ka Nyamasheke wungirije ushinzwe imibereho myiza, Mukankusi Athanasie yavuze ko hari abantu bake bagifite umuco mubi wo guhisha mu ngo abantu bafite ubumuga, abasaba kubicikaho kuko ari icyaha kandi ko hari amategeko abihanira.

Ati "Turashimira abafatanyabikorwa badufashije tukabonera abaturage bacu insimburangingo n’inyunganirangingo, ariko nk’akarere natwe tubishyizeho umutima muri uyu mwaka twashyize mu mihigo abarenga 177 tuzaha insimburangingo n’inyunganirangingo ku bufatanye na HVP Gatagara ku buryo twumva uko ingengo y’imari izagenda iboneka ari ko tuzagenda twongera kugira ngo zigere kuri benshi bashoboka".

Aka karere kari kabaruye abantu 19 bakeneye amagare y’abantu bafite ubumuga ariko abayahawe ni babiri gusa abandi baracyategereje. Mu Rwanda igare ry’abantu bafite ubumuga rigura amafaranga ari hejuru y’ibihumbi 100 Frw bigatuma ritigonderwa na buri wese.

Uwingeneye yimye amatwi abamusaba guta umugabo we kubera ubumuga bwamutunguye
Umuyobozi wungirije w'Akarere ushinzw eimibereho myiza y'abaturage, Mukankusi avuga ko ubuyobozi buzakomeza gufasha abafite ubumuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .