Iki gisasu cyaguye muri iyi nkambi mu gihe havugwaga imirwano hagati y’umutwe witwaje intwaro wa M23 n’ihuriro ry’imitwe ya Wazalendo mu duce turimo Ndumba na Kashingamutwe duherereye i Sake muri teritwari ya Masisi.

Gikurikiye icyaguye muri iyi nkambi mu ntangiriro za Gicurasi 2024, kikica impunzi 35. Icyo gihe M23 n’ingabo za RDC zashinjanye kukirasa.

Umuvugizi wa M23 ku rwego rwa politiki, Lawrence Kanyuka, yatangaje iyi mirwano yatewe n’igitero ihuriro ry’ingabo za Leta ya RDC zagabye muri Ndumba ituwe cyane n’abaturage.

Kanyuka yagize ati “Turamenyesha abantu muri rusange ko guhera muri iki gitondo cyo ku wa Kane tariki ya 12 Nzeri 2024, ingabo zishyize hamwe na Leta ya Kinshasa zateye agace gatuwe cyane ka Ndumbe (Sake) no mu bice bituranye.”

Yakomeje ati “ARC [M23] tuzakomeza kurinda no kurwanirira abenegihugu bagenzi bacu n’ubunyamwuga kandi dushikamye.”

Ntabwo haramenyekana aho uruhande iki gisasu cyaturutseho, nta n’icyo Leta ya RDC iravuga kuri iki kibazo.

Inkambi ya Mugunga yongeye kugwamo igisasu nyuma y'amezi ane