Icyizere ntaho cyagiye! Imbamutima z’Abanyarwanda mu mwaka mushya wa 2021

Yanditswe na Ntabareshya Jean de Dieu, Ferdinand Maniraguha
Kuya 1 Mutarama 2021 saa 07:17
Yasuwe :
0 0

Nta mvura idahita koko! Wa mwaka w’amarira, umwaka w’impungenge aho umunsi wacyaga buri wese agasigara yibaza uko buri bwire, inama mu Rugwiro yaterana umutima ugasigara udiha utitaye ku kuba ibyigirwamo ari ingirakamaro ku buzima bw’abariho uyu munsi n’abazaza.

Ni umwaka buri wese haba mu bavutse mbere ya 2000 na nyuma y’aho bari bafitiye amatsiko kuko icyerecyezo igihugu cyihaye mu myaka 20 ishize cyawamamaje cyane. Hari abatebyaga ku mbuga nkoranyambaga ngo bawinjiyemo bazi ko uzashira bubatse imiturirwa, baguze imodoka, ubucuruzi bwabo bufuha […] none reba!

Ibya byarabaye byose uwo mwaka washize, dore umushyashya twawinjiyemo. Umutima wa muntu ni nk’isumo, ibyifuzo byawo bihora byisukiranya. N’uyu mwaka mushya niko bimeze. Nubwo ushize wadutengushye twese, icyizere kiracyahari mu 2021 ndetse n’umukuru w’igihugu yabigarutseho mu ijambo risoza umwaka n’iritangiza umushya, aho yavuze ko “uyu mwaka utangiye uzaba mwiza kurusha uwo dusoje”.

IGIHE yazengurutse mu baturage batandukanye, itanga urubuga ku mbuga zayo nkoranyambaga, Abanyarwanda bagaragaza ko bagifite icyizere n’ibyifuzo mu mwaka mushya wa 2021.

Uwitonze Stansilas ni umucuruzi muri Kigali wemeza ko umwaka ushize utamubereye mwiza ndetse ko wahungabanyije ibikorwa bye by’ubucuruzi.

Kubera ingamba zitandukanye zo kwirinda Coronavirus, kugabanyuka kw’abaguzi no kubura ibicuruzwa dore ko akenshi yajyaga kubirangura mu Bushinwa, Uwitonze yizeye ko uyu mwaka uzamuhanagura amarira.

Ati “Bitewe n’uburyo nakoraga mbere hagabanutseho nka 50%, gusa dufite icyizere ko umwaka mushya uzagenda neza. Twumva ko inkingo ziri kugenda ziboneka, abantu nibamara gukingirwa ubuzima bugasubira uko bwari busanzwe, twizeye ko abakiliya baziyongera”.

Manirafasha ukora umurimo wo gucuruza Mobile Money, avuga ko nubwo wari umwaka ukomeye muri rusange, ariko Imana itera amapfa ngo ni nayo itera aho bahahira. Coronavirus yatumye ikoranabuhanga rihabwa agaciro, abamugana bariyongera.

Yagize ati “ntekereza ko ari umwaka utaragenze neza kuri benshi, gusa njyewe nta kibazo nagize. Abantu bakangukiye gukoresha ikoranabuhanga.”

Manirafasha avuga ko ashingiye ku byagaragaye muri 2020, isomo rikomeye yakuyemo ari iryo kwizigamira mu mwaka mushya.

Ati “Ntabwo navuga ko naviriyemo aho kuko narize kandi amasomo akomeye. Nize kwizigamira kuko nasanze ari cyo kintu twari twarabuze, ndibaza ko buri wese ari isomo yakuye muri 2020 akwiye gutangirana umwaka mushya”.

Iradukunda Divine ni umuturage muri Kigali, avuga ko umwaka wa 2020 wamutunguye kuko waje utandukanye n’ibyo benshi batekerezaga gusa aza gusanga yarawibeshyeho.

Kuri we asanga umwaka wa 2021 ushobora kuzamara intimba abantu, ukaba umwaka w’ihumure.

Uwitwa Rachel Krs anyuze kuri paji ya Facebook ya IGIHE, yavuze ko icyifuzo cye mu 2021 ari ugutsinda Covid-19.

Ati “Uyu mwaka dusoje wabaye mubi muri rusange, ariko tugomba gushima Imana mu byiza no mu bibi tuyisaba ngo idufashe uwa 2021 izadutsindire Covid -19 iduhoze amarira twarize.”

Bishanga Fred na we wanyuze ku mbuga nkoranyambaga za IGIHE, icyizere cya 2021 ntacyo ashingiye ku byanditswe byera.

Yavuze ko kuri we nta tandukaniro yiteze mu mwaka mushya mu gihe abantu bazaba bataravuka ubwa kabiri. Ati “Abantu bagomba kuvuka bwa kabiri kandi bakamaramariza Imana kuko ntabwo Isi izigera iba nziza ahubwo izarushaho kuba mbi.”

Urimana Uziah Cyuzuzo akora umurimo wo gutwara moto mu mujyi wa Kigali. Yavuze ko umwaka wa 2020 wari kuba umwaka uw’impinduka iyo hataduka icyorezo cya Covid-19.

Ati “Ubundi twumvaga vision 2020 tukumva ko abantu bose bazaba ari abakire, rimwe na rimwe tukumva ko n’umukene azahita akira. Iyi myumvire nubwo atari yo yashoboraga gutera imbaraga buri wese, ariko nyine Covid-19 yahise yaduka.”

Uwiyise Rt Col Paccyex kuri Facebook arifuza ko Guverinoma y’u Rwanda mu mwaka mushya, yashyira imbaraga mu buhinzi n’ikoranabuhanga kuko “aribyo twabonye nkenerwa mu bihe bya Covid”. Ni mu gihe mugenzi we wiyise Family M&N yasabye ko hagabanywa imisoro n’ubukode bw’ubutaka butinjiza amafaranga menshi. Na we yasabye ko ubuhinzi butezwa imbere abaturage bakihaza mu biribwa.

Ibitekerezo byatanzwe ni byinshi kandi biratandukanye ariko ibyinshi bigaragaza ko hari icyizere kuri uyu mwaka mushya.

Icyizere kandi gituruka ku makuru meza amaze iminsi atangazwa n’inganda zikora inkingo, aho kugeza ubu hari inkingo zirindwi zamaze kwemezwa n’ibihugu bimwe na bimwe ndetse iza mbere zatangiye gutangwa, mu gihe izindi nyinshi zikiri kugeragezwa.

U Rwanda ruri mu bihugu bigitegereje urukingo rwa Coronavirus. Perezida Kagame aherutse kuvuga ko nirugera muri Afurika, u Rwanda ruri mu bizarubona mbere.

Icyizere kiri no mu rwego rw’ubukungu kuko Ikigega Mpuzamahanga cy’Imari, IMF, giherutse gutangaza ko ubukungu bw’u Rwanda buzazamuka ku kigero cya 2% mu mwaka wa 2020 hanyuma mu mwaka wa 2021 bukazazamuka ku bipimo biri hejuru kurushaho bingana na 6,3%.

Abanyarwanda bizeye ko umwaka wa 2021 uzabahanagura amarira basigiwe na 2020
Nubwo banyuze mu bibazo bikomeye mu 2020, Abanyarwanda benshi baracyafite icyizere cy'ejo hazaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .