00:00:00 IGIHE NETWORK KN KINYARWANDA EN ENGLISH FR FRANCAIS

Icyizere ku mishinga minini y’ubwubatsi, ibiciro, isoko ry’akarere… Ikiganiro n’Umuyobozi Mukuru wa CIMERWA

Yanditswe na Rabbi Malo Umucunguzi
Kuya 28 Ukuboza 2022 saa 07:43
Yasuwe :

Ni uruganda rumaze kuba ubukombe mu gukora isima mu Rwanda, ndetse biragoye ko watera metero nke utaragera ku bikorwa byarwo. CIMERWA imaze kubaka izina mu Rwanda, intego akaba ari uguhaza isoko ry’imbere mu gihugu, ndetse ikerekeza amaso no hanze yacyo.

Icyakora si inzira iharuye kubera nk’ibibazo by’umutekano muri Repubulika Iharanira Demokarasi ya Congo aho uru ruganda rufite isoko rinini, cyangwa ikibazo cy’ibiciro ku isoko cyazamuye ikiguzi ku banyenganda, n’umuguzi wa nyuma bikamugeraho.

Mu kiganiro cyihariye na IGIHE, umuyobozi mukuru wa CIMERWA, Albert Sigei, yagarutse ku ntambwe uru ruganda rukomeje gutera n’ibikorwa ruteganya mu gihe kiri imbere.

IGIHE : Inyungu ya CIMERWA yifashe ite muri aya mezi ashize ?

Albert Sigei: Ubu turimo kuvuga amezi 12 ashize yo kugeza ku wa 30 Nzeri 2022. Twagize umwaka utangaje kuko urwunguko rwageze kuri miliyari 92 Frw ugeranyije n’umwaka washize, twiyongereyeho 37%.

Inyungu ya nyuma yo kwishyura imisoro yageze kuri miliyari 13.2 Frw, bingana n’izamuka risaga 200% ugereranyije n’umwaka ushize, ndetse inyungu ku mugabane izamukaho 18.7 %, naryo rikaba ari izamuka rya 220%.

Muri make twakoze neza cyane ku buryo imibare yacu ihagaze neza, n’umwenda ubu ukaba ugeze kuri miliyari 1 Frw, bikaba bigaragaza ko duhagaze neza, byanatumye inama y’ubutegetsi yemeza ko abanyamigabane bashobora guhabwa inyugu ku ishoramari ryabo.

Ibi byose ni umusaruro w’ubwitange bw’abakozi bacu, abagize inama y’ubutegetsi n‘abafatanyabikorwa ba CIMERWA.

Inyungu ya CIMERWA yazamutse cyane muri uyu mwaka

Umusaruro ungana utya mwawugezeho gute?

Ni impamvu zitandukanye. Icya mbere ni ugukora umurimo unoze uhereye ku ruganda, ndetse no mu nzira zigera ku isoko. Icya kabiri ni uburyo bunoze duhamo serivisi abakiliya bacu no gukurikirana ibijyanye no kugena ibiciro. Ikindi kandi tubasha gukoresha neza ubushobozi bw’abantu bacu, dufite abakozi bamaze igihe kirekire bazobereye akazi ku buryo nabo badufasha kugera kuri uyu musaruro.

Hejuru y’ibyo kandi hari izindi ntambwe twateye, nko kwishyura mbere umwenda wa miliyari zigera kuri 5 Frw, ku bw’ibyo tukaba twarabashije kugabanya amafaranga agenda ku bikorwa byacu mu nyungu twishyura banki. Icya nyuma kinakomeye ni uko tudashobora gukora ibyo byose hatari urubuga rwiza rwo gukora ubucuruzi.

Mu 2019, mwatangaje ko mushobora gutunganya toni 600,000 za sima, ariko ntabwo mwakoreshaga ubushobozi bwanyu 100%. Ubu mugeze he?

Muri make impungenge zo kuzamura umusaruro ukenewe ku isoko byabaye ibintu by’ahahise. Nk’urugero, hagati y’umwaka ushize n’uyu, twazamuye umusaruro hejuru ya toni 100,000 za sima.

Mu buryo dukoresha ubushobozi bwacu, ubu tugeze hejuru ya 90%. Ubu turimo gukora neza cyane, ndetse ubu intego ni ukurenza toni 600,000 za sima ku mwaka no mu myaka mike iri imbere.

Kugeza ubu twishimira ko dukora uko dushoboye kose ngo duhaze isoko ryo mu Rwanda ndetse tugasagurira no hanze nko mu Burasirazuba bwa Repubulika iharanira Demokarasi ya Congo ndetse twatangiye kohereza sima mu Burundi, kandi ni byiza kuri twe no ku gihugu kuko nubwo tubona inyungu, ariko tuzana n’amadovize mu gihugu.

Mu gihe ubukungu bw’u Rwanda buri kuzahuka, urwego rw’ubwubatsi ni rumwe mu ziri kwaguka cyane. Nka Cimerwa mufitemo uruhare rungana iki muri sima mushyira ku isoko?

Nk’uko ubizi ubu turi kuva mu bihe bikomeye cyane byaranzwe n’izahara ry’ubukungu mu bihugu bitandukanye ndetse n’u Rwanda rurimo, ibintu byatumye ubukungu buhungabana, igiciro cy’ibikoreshwa mu nganda kirazamuka.

Ariko twashimishije no kubona nubwo byagenze bityo. Mu Rwanda twagize izahuka rigaragara nubwo hakiri ibyo gukora, ariko izahuka riri mu murongo mwiza. Umusaruro mbumbe wakomeje kuzamuka kuri 7 cyangwa 8 ku ijana kuzamura, umusaruro umeze gutyo ukaba ugendana n’ubukenerwe bwa sima cyagwa ibikorwa by’ubwubatsi, kuko kugira ngo igihugu gitere imbere ukeneye kubaka ibikorwa remezo, ibibuga by’indege, imihanda, inganda z’amazi, inganda z’amashanyarazi, inyubako zitandukanye.

Muri iki gihe mu Rwanda dufite nk’ikibuga cy’indege cya Bugesera, Stade Amahoro, umushinga Twin Towers wa Equity Bank n’ibindi. Ni ibimenyetso byiza byo kuzahuka, bikaba bishimishije kuri twe ko hari umusingi wo kurenga ibyo bibazo binyuze mu mishinga minini, kandi nka CIMERWA twiteguye gutanga serivisi zose kugira ngo natwe dutange umusanzu mu iterambere ry’igihugu.

Kimwe mu bibazo isi yagize muri ibi bihe ni izamuka ry’ibiciro. Ririmo kugira ngaruka ki ku buryo mukoramo ubucuruzi?

Yego natwe twabangamiwe n’iki kibazo cyugarije isi, aho nk’ibiciro by’ibikomoka kuri peteroli byazamutse kandi ni ikintu cy’ingenzi mu kugena ibiciro, byahise bizamuka.

Nta kundi tugomba kubyakira ndetse tugakora uko dushoboye kugira ngo turebere hamwe nk’ikigo uko twakongera inyungu.

Ibyo bigomba kujyana no kunoza imikorere ku buryo dukomeza guhagaragara neza mu bijyanye n’ibiciro. Tugakora neza mu bijyanye n’ibikoresho twifashisha, ibikenerwa by’ibanze mu ruganda, guhanga ibishya, gushaka ahantu twakoresha ikoranabuhanga mu kugabanya ikiguzi… iyo bizamuka n’ubundi birangira byishyuwe n’umukiliya wa nyuma, bityo tugerageza kubigabanya, kuko dukeneye guhagarara neza ku isoko.

Mujya mubara ijanisha ry’isoko ry’isima mwihariye?

Kugeza ubu turayoboye haba mu Rwanda ndetse dufite ijambo no mu Karere k’ibiyaga bigari, hari abandi duhanganye mu gihugu no mu karere, ariko duhagaze neza kandi twifuza kuguma muri uwo mwanya.

Ni iki murimo gukora ngo mugume imbere?

Icyo ni ikibazo duhora dutekerezaho umunsi ku wundi kuko ari yo ntego yacu. Kugeza ubu dukora uko dushoboye kose kugira ngo dukore mu buryo bugezweho kandi bunoze ndetse no gukora uko dushoboye ngo tugume kuri uwo mwanya binyuze mu gutanga serivisi nziza cyane no gushaka inzira zo guhangana n’imbogamizi dufite kuko abakiliya bo bazahora bakenera ibyo dukora.

Ikindi tuzi neza ko ikigo kinini kitarangwa gusa n’inyungu iri hejuru, ahubwo cyita no ku mikorere yatuma gikora mu buryo burambye, kikagira imikorere myiza, kigatanga inyungu, ariko mu buryo burambye.

Nk’urugero twashyize imbaraga mu bikorwa birengera ibidukikije, aho twashyizeho gahunda nk’ikigo ndetse twayigejeje ku nama y’ubutegetsi, aho dushaka kugira uruhare rufatika mu gutanga umusanzu wo kugera ku ntego z’Umuryango w’Abibumbye zigamije iterambere rurambye zo kurwanya ubukene, guhangana n;’imihindagurikire y’ibihe, ubukungu butangiza n’ibindi.Ni rumwe mu nzego dutewe ishema no kugiramo uruhare.

Ni iyihe mishinga mufite muri urwo rwego nka CIMERWA?

Inganda za sima ni zimwe mu zikwiye gushyira imbaraga mu gukumira ingaruka zo kwangirika kw’ibidukikije, muri iyo gahunda, nguhaye urugero, dufite gahunda twashyizeho yo kurengera ibidukikije no kugabanya imyuka ihumanya.

Ku bijyanye n’ibidukikije dufite gahunda nyinshi zirimo nko gutera ibiti cyane cyane ahakikije ibikorwa byacu, aho twihaye intego yo gutera ibiti bigera ku bihumbi 20 cyane ko mu minsi byumweru bibiri bishize twateye ibiti bigera mu 2500. Ntabwo tubikora twenyine, dukorana n’abandi bafatanyabikorwa.

Ku bijyanye no kugabanya imyuka ihumanya yoherezwa mu kirere, dufite gahunda zitandukanye zigamije kugabanya CO2 yoherezwa mu ikorwa rya sima.

Birimo nko gusimbuza amakara za biomass, nko gukoresha ibisigazwa by’umuceri n’ikawa biboneka hafi y’uruganda rwacu mu Bugarama, bityo mu bijyaye n’ingufu tukabasha kugabanya ikoreshwa rya CO2. Izo ni zimwe mu ngero.

Dufite indi mishinga yibanda ku dushya dutandukanye tujyanye no kugabanya ibi myuka turi guteganya, aho nko mu myaka mike ishize twagabanyije CO2 muri buri toni ya sima, hejuru ya 20%, ndetse turakomeje ku buryo mu myaka iza nta myuka na mike ihumanya tuzaba twohereza mu kirere. Ni urugendo rutoroshye ariko twiyemeje bihagije ko tuzabishobora.

Mwavuze ko CIMERWA iri kohereza sima mu bihugu byo hanze, mu Burundi isoko riri gufunguka, ariko mu burasirazuba bwa RDC hari ibibazo by’umutekano muke. Hari gahunda mubifitiye?

Kimwe mu bintu dukora kugira ngo tugere ku bucuruzi burambye harimo kugira amahitamo menshi haba mu bicuruzwa utanga n’aho byoherezwa, isoko ry’ibanze rikaba riri mu Rwanda.

Nk’uko twabivuze twohereza sima mu Burasirazuba bwa RDC muri Kivu y’Amajyaruguru n’Amajyepfo, uko niko twagura ibikorwa byacu, ibi ni nako bimeze mu Burundi.

Ibyo dukora ni ukuba duhari, ariko nubwo hari ibibazo byaba iby’ibyugarije isi, umwuka mubi mu karere, ibibazo byo ku mupaka, aya masoko yo yakomeje gukora neza, ntekereza ko dufite amahirwe kuba muri ibyo bibazo tubona ubucuruzi bukomeza.

Ntekereza ko impamvu aka karere k’ibiyaga bigari gakomeza gutera imbere nubwo ibyo bibazo byose byaba bihari, ni uko usanga umuntu agikoresha sima nkeya, aho nko mu Rwanda hakenerwa toni zirenga miliyoni imwe za sima, ingano iri hejuru.

Ni amahirwe kuko dushaka kubikoresha nk’amahirwe, kuko urebye ubukenerwe bw’isima n’ibihugu bituranyi buri hejuru cyane, ku buryo tugomba kwitegura gushyigikira iryo terambere.

Hari intego mwaba mufite mukurikije sima ikenewe?

Intego yacu ni ukujyana n’iyaguka ry’isoko, nk’urugero niba umusaruro mbumbe ari 8%, ubukenerwe bwa sima buba bwazamutse 10%. Niba isoko rikeneye toni miliyoni, bivuze ko umwaka utaza zizaba toni miliyoni 1.1. Nk’ikigo kiyoboye ku isoko, ugomba kumenya ko uko isoko rikura, natwe tuzamura ubushobozi bwacu kugira ngo tubashe guhaza isoko.

Dufite gahunda zigamije kongera ubushobozi mu myaka iri imbere, mu gihe kigufi, kiringanire n’igihe kirekire, ku buryo CIMERWA igomba kugumana umwanya wa mbere ku isoko.

Sima mwohereza hanze ubu ingana iki?

Irenga 20% by’umusaruro wose.

Ni iki muhishiye abakiliya mu bihe biri imbere?

Mu myaka ibiri ishize twakoze uko dushoboye cyane mu kwegereza ibicuruzwa abakiliya, twavuye mu kugurisha sima gusa, ubu dutanga sima ijyanye n’icyo umuntu yifuza gukora by’umwihariko.

Nk’urugero sima ya ‘Sure Wall’ igenewe gusiga ibikuta, Sure Sem yo ikoreshwa ibintu byose, Sure Build yo yagenewe ibintu bigoye nk’imishinga minini, ku buryo twavuye ku gutanga sima muri rusange, twongera amahitamo.

Abakiliya bakwiye kwitega byinshi hafi yabo, bakabona serivisi nziza.

Twanavuguryye uburyo dutangamo serivisi aho uyu munsi umuntu dushobora kumuha sima mu mifuka, mu modoka nini, mu mufuka wa ya toni 1.5, mu mufuka w’ibilo 500, twiteguye gukora byinshi, kubaba hafi ngo twumve ingorane bafite, kandi tugahanga ibishya, twifashisha ikoranabuhanga baha mu gutumiza ibyo umutu akeneye, n’ibindi.

Muheruka gutangaza ko mugiye kuzana sima ya Sure Road igenewe abubaka imihanda. Ubu irahari?

Sima ya Sure Road ubu turayifite, ariko impamvu mutayibona ku isoko ni uko tuyiha abafite ibikorwa binini by’ubwubatsi.

Hari intego zihariye mufite mu mwaka utaha?

Mu mwaka utaha twiteze CIMERWA gukomeza kuba imbere no gutanga inyungu mu bijyanye n’ubukungu ndetsen’amafaranga yinjije. Dufite icyizere kubera ko icyerekezo cy’ubukungu kigaragaza ko umusaruro uzakomeza kuzamuka, twiteguye kugendana n’iki cyerekezo.

Mbere yo gusoza ni iki mwakongeraho?

Ndashaka gushimira abafatanyabikorwa bacu bakomeje kutuba hafi, ndashimira cyane inama y’butegetsi ya CIMERWA n’abakozi ba CIMERWA, mwese nimwe mwatumye tubasha kugera kuri yu musaruro.

Nanone abashoramari ku Isoko ry’imari n’imigabane, mukomeze mushore imari, abatarashora imari nabo aya ni amahirwe akomeye, nk’abanyamigabane, inama y’ubutegetsi yemeje ko bagabana miliyari 10.5 Frw, bikaba ari inyungu ishimishije.

CIMERWA ikomeje gukorana n'abafatanyabikorwa mu kurengera ibidukikije batera ibiti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .