00:00:00 IGIHE NETWORK KN KINYARWANDA EN ENGLISH FR FRANCAIS

Icyiciro cya gatatu cy’abarangije amasomo muri Kora Coaching bayishimiye ubumenyi bungutse

Yanditswe na Uwimana Abraham
Kuya 7 Ukuboza 2020 saa 08:50
Yasuwe :
0 0

Abakozi b’ibigo bitandukanye n’abikorera basoje amasomo ya ‘Coaching’ mu ishuri ryigisha ubutoza (coahing) rikorera mu Rwanda (Kora Coaching and Business Academy: KCA) bishimiye intambwe ikomeye bateye mu mikorere yabo, kuva batangira gukurikirana aya masomo.

Aba bahawe ibyemezo by’uko basoje amasomo ku wa 5 Ugushyingo 2020, ni icyiciro cya gatatu kigizwe n’abantu 13 bakurikiranye amasomo bari mu bihugu bitandukanye birimo ibyo muri Afurika, Aziya ndetse na Amerika, hifashishijwe uburyo bw’ikoranabuhanga.

Coaching ni amahugurwa yo ku rwego rwo hejuru ahabwa abantu bakora imirimo itandukanye, hagamijwe ko bagira impinduka zibaganisha ku iterambere mu byo bakora. Amasomo atangwa mu bijyanye n’ubuzima, imiyoborere, ubucuruzi, n’ikurikiranabikorwa byose bigamije impinduka z’iterambere.

Bamwe mu basoje amasomo yabo muri Kora Coaching and Business Academy, bayishimiye amasomo baherewemo, bavuga ko bungukiyemo ubumenyi buzabafasha ubwabo ndetse bufashe n’aho basanzwe bakora kugera ku iterambere ryihuse.

Charity Chanda Lumpa wo muri Zambia yavuze ko muri aya masomo bungukiyemo ibintu byinshi bizafasha ‘business’ zabo kurushaho kubyara umusaruro uruta kure uwo bajyaga babona, kuko bungutse byinshi bigiye kubibafashamo.

Yagize ati “Aya masomo yarampinduye ahindura n’uburyo nabonagamo ibintu n’uko nabikoraga, narushijeho kuba umunyamwuga. Ni ukuri koko ibigo bitandukanye bikwiye kwita ku muco wa ‘coaching’ niba bashaka guteza imbere ibyo bakora.”

Moira Darries wakurikiranye aya masomo ari mu Bwongereza, yavuze ko n’ubwo yari yarize amasomo ya ‘coaching’ mu bihe bitandukanye mbere, ariko muri aya masomo ya KCA, yungukiyemo byinshi byamufashije guhindura uburyo yakoraga ibintu.

Yagize ati “Isomo rya mbere rigendanye no kwimenya, ryatumye menya uwo ndiwe, menya n’icyo nshaka.”

“Mu isomo rya kabiri nize uko nafata bitekerezo by’abakiriya bange nkabishyira mu bikorwa, nkabafasha no kumenya uko bakora iteganya bikorwa, ikindi kandi ubu nsigaye mbwira abakiriya kwishimira buri ntabwe yose bateye n’ubwo yaba ari ntoya, kuko ibyo nibyo bibafasha gukura.”

Iki cyiciro cya gatatu cy’abasoje amasomo mu 2020, kije gikurikira ibindi byiciro bibiri byasoje amasomo kuva iri shuri ryatangira muri Werurwe 2018, bituma abamaze kurangiza amasomo muri iri shuri bose bagera kuri 31.

Umuyobozi wa KCA, Mireille Ineza Karera, yavuze ko batangiye iri shuri abantu batabyumva, ndetse bavuga ko bitashoboka mu Rwanda, ariko ngo ntibyabaciye integer, ari nacyo cyatumye batangiye kubona umusaruro ukomeye n’impinduka zazanywe n’iri shuri.

Yagize ati “Mu myaka itanu ishize, ubwo twatangizaga Kora Coaching Group, twabiwe ko ‘coaching’ mu Rwanda itashoboka, ko ‘coaching’ atari iy’u Rwanda, ko Abanyarwanda bataba abatoza (coaches), kuko badafunguka, ariko ubu ngubu reba aho tugeze, mu myaka ibiri tumaze dufite abatoza 12 b’imbere mu gihugu.”

Karera kandi yavuze ko abayobozi b’ibigo bitandukanye bakwiye kwitabira amasomo ya ‘coaching’ kuko aho isi yerekeza ari ibintu bizaba bikenewe cyane, kuko hazaba hakenewe umuyobozi ugaragaza itandukaniro mu buryo akoramo ibintu.

Yagize ati “Impamvu abayobozi b’ibigo bitandukanye bakwiriye aya masomo, ni uko muri iki kiragano gishya kigizwe n’urubyiruko ku kigero kiri hejuru ya 50%, ubushakashatsi bwerekana ko badakeneye abababwiriza ahubwo bakeneye abayobozi bababera n’abatoza, kandi ibyo ngibyo bizana impinduka nziza nyinshi.”

Yongeyeho ati “Ni ngombwa rero ko ugira ubumenyi bwa coaching, kugira ngo ube umuyobozi mwiza, ndetse ubashe no gutoza abakozi bawe kuburyo babasha gutanga umusaruro wisumbuyeho cyane.”

Karera yakomeje avuga ko kuva mu mwaka ushize, KCA yaguye uburyo bw’imikorere igafungurira amarembo n’abatari imbere mu gihugu gusa, ahubwo rihinduka ishuri mpuzamahanga bituma n’abari ahandi hirya no hino ku isi babasha gukurikirana amasomo hifashishijwe ikoranabuhanga (online learning).

Mu barangije amasomo muri iki cyiciro cya gatatu harimo abize bari ku migabane n’ibihugu bitandukanye, harimo Afurika y’Epfo, Malawi, Zambia, Sierra Leone, u Bushinwa, Canada, u Bwongereza, n’ibindi.

Umuyobozi Mukuru wa BPR Plc wari umushyitsi mukuru muri uyu muhango, Maurice Toroitich, yashimiye abarangije amasomo muri KCA, avuga ko umuco wa ‘coaching’ muri Afurika utaratera imbere cyane, ariko ko ari ho ukenewe cyane.

Yagize ati “Iki cyemezo mwafashe kirerekana ko mushishikariye kugira uruhare mu kugira ngo isi ibe nzinza kurushaho, muri Afurika ‘coahing’ iracyari ku rwego rwo hadi cyane.”

Yongeyeho ati “Mu bindi bihugu by’isi bamaze kubona ‘coaching’ nk’umwuga nkenerwa cyane, kuko abashoramari bamaze kumva no gusobanukirwa impamvu yo gushora imari muri coaching, nk’inzira yo gutuma batera imbere ubwabo, no gufasha abo bayoboye kurushaho kuba indashyikirwa mu byo bakora.”

“Ntekereza ko ishobora kuba ari yo mpamvu usanga ibi bihugu ari byo biza imbere mu gutanga umusaruro mwiza mu bintu binyuranye, mu bukungu, mu miyoborere, reba n’uyu munsi nibo turangamiye ku rukingo, nibaza impamvu ataba Afurika.”

Icyuho kikigaragara mu kwitabira ‘coaching’ kw’ibihugu bya Afurika ndetse n’ibyo mu Burasirazuba bwo hagati, kigaragarira no mu musaruro uyu mwuga utanga.

Nko muri Leta Zunze Ubumwe za Amerika, umwuga w’ubutoza (coaching industry), winjiza agera kuri miliyari 15 $ buri mwaka, bivuye ku bigo bikora uyu mwuga bigera ku 53.884, mu gihe ugereranyije na Afurika n’Uburasirazuba bwo Hagati, ahari abakora uyu mwuga 4100 gusa, usanga winjiza arenga gato miliyoni 140 $ gusa.

Kuri ubu ibihugu biza imbere mu kwitabira umwuga wa ‘coaching’ muri Afurika ni Kenya na Afurika y’Epfo, ni nabo batanga ubufasha bwinshi ku bigo byo mu Rwanda bishaka iterambere, gusa na none KCA nyuma yo kwemerwa ku rwego Mpuzamahanga mu 2019, nayo yatangiye kugaragaza impinduka mu kwitabira uyu mwuga ku Banyarwanda n’ibigo bikorera mu Rwanda.

Umuyobozi wa KCA Mireille Ineza Karera yavuze ko batangiye iri shuri abantu batabyumva ariko kuri ubu bamaze kugera ku rwego rwiza
Umuyobozi wungirije wa KCA, Emelyne Kaneza, niwe wayoboye uyu muhango
Umuyobozi Mukuru wa BPR Plc, Maurice Toroitich, yashimiye abarangije amasomo muri KCA, avuga ko umuco wa ‘coaching’ muri Afurika utaratera imbere, kandi ari umwuga nkenerwa cyane
Umuyobozi wa KCA n'Umuyobozi Mukuru wa BPR baha ibyemezo abasoje amasomo
KCA yatanze ibihembo ishimira ibigo bitandukanye
Umuyobozi wa BPR nawe yahawe igihembo
Ni umuhango witabiriwe na bamwe bahari abandi bawukurikirana hifashishijwe ikoranabuhanga

<

Abasoje amasomo muri KCA bishimiye byinshi bungukiyemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .