00:00:00 IGIHE NETWORK KN KINYARWANDA EN ENGLISH FR FRANCAIS

Ibyo ukwiye kumenya kuri Tombola ya Inzozi Lotto

Yanditswe na Mukahirwa Diane
Kuya 26 April 2022 saa 10:14
Yasuwe :

Hashize igihe gito hatangijwe tombola yo ku rwego rw’igihugu igamije gushyigikira iterambere rusange rya siporo mu Rwanda, yiswe Inzozi Lotto.

Iyi tombola yatangijwe tariki ya 10 Ukuboza 2021, aho usibye kuba ishyigikira iterambere rya siporo mu Rwanda, inagira uruhare mu guteza imbere abayitabira kuko bashobora gutsindira ibihembo bitandukanye.

IGIHE yagiranye ikiganiro cyihariye n’Umuyobozi wungirije wa Carousel Ltd, Nshuti Thierry, asobanura byimbitse ibijyanye n’iyi tombola byatuma ubasha kuyikina.

IGIHE: Inzozi Lotto ni iki?

INZOZI: Inzozi Lotto ni Tombola yashyizweho n’itegeko no 58/2011 ryo ku wa 2/12/2011, ingingo ya 22, iri ku rwego rw’igihugu igamije gushyigikira iterambere rusange rya siporo mu Rwanda.

Guverinoma yagiranye amasezerano y’imyaka 10 na sosiyete ya Carousel Ltd, ubu iri ku rwego rw’igihugu ihabwa izina ry’Inzozi Lotto.

IGIHE: Haba hari impamvu yihariye yatumye yitwa Inzozi Lotto?

INZOZI: Yego irahari, imikino yacu igamije gufasha iterambere rya siporo kandi dutekereza ko buri Munyarwanda wese afite inzozi zo kuzabona Abanyarwanda babona ibikombe n’imidari iri ku rwego mpuzamahanga.

Izo nzozi nizo twifuza ko zazaba impamo, nibyo byatumye twifuza kuyita Inzozi.

IGIHE: Ni gute abantu bashobora gukina gute?

INZOZI: Inzozi Lotto ifite imikino ibiri, uwa mbere witwa ‘Quick Lotto’ uba buri minota 10, abantu bakina tombola ntabwo baba bafite umwanya munini. Ushaka gukina ashobora kwifashisha ‘aba-agents’ bacu bari hirya no hino cyangwa ukanyura ku rubuga rwacu www.inzozilotto.rw ugakina. Ushobora kandi no gukoresha uburyo bwa telefoni zisanzwe ugakanda *240# ugakurikiza amabwiriza.

Ukina ‘Quick Lotto’ ahitamo umubare umwe muri 35 (hagati ya 0-34), akavuga amafaranga awutegeye, iyo atsinze akubirwa inshuro 15 (ni ukuvuga ko niba washyizeho igihumbi, ushobora gutsindira 15.000 Frw).

Iyi tombola iba buri minota 10, uyikina ashobora gutega amafaranga ari hagati ya 300 Frw na 10.000 Frw.

Umukino wa kabiri witwa ‘Jackpot Lotto’ aho umuntu ahitamo imibare itandatu muri 49. Hanyuma ku Cyumweru ni bwo abatsinze batangarizwa kuri Televiziyo y’u Rwanda. Uwahisemo imibare ihuye n’iyatangajwe ni we utangazwa nk’uwatsinze, utega kuri uyu mukino itike ye ayigura 500 Frw.

Gutsinda biratandukanye, kugira ngo utsinde uri uwa mbere uhabwe miliyoni 6 Frw bisaba kuba wavuze imibare itandatu n’undi utangwa nk’inyongera ikaba ihura n’iyagaragajwe nk’iyatsinze.

Uwa kabiri atombora imibare itanu n’undi w’inyongera agahabwa ibihumbi 500 Frw, uwa gatatu atombora imibare itanu agahabwa ibihumbi 100 Frw, uwa kane atombola imibare ine n’undi w’inyongera agahabwa ibihumbi 10 Frw.

Uwa gatanu we atambora imibare ine agahabwa ibihumbi 5 Frw, umwanya wa gatandatu bisaba gutombora imibare itatu n’undi w’inyongera ugahabwa ibihumbi 3 Frw naho uwa karindwi atombola itatu agatsindira ibihumbi 2 Frw.

IGIHE: Amafaranga ajya he?

INZOZI: 47% by’ayinjiye asubira ku isoko agahabwa abatsinze, 20% ahabwa Minisiteri ya Siporo akajya mu bikorwa byo guteza imbere siporo mu Rwanda.

IGIHE: Ni gute umuntu ashobora gukina?

INZOZI: Mbere ya byose ukina agomba kuba yujuje imyaka 18 no hejuru yayo, ushobora gukina ukoresheje ‘aba-agents’ bacu bari hirya no hino ku mihanda cyangwa ugakoresha telefoni ukanda *240# cyangwa ugasura urubuga rwacu rwa www.inzozilotto.rw.

Kugira ngo ukine bisaba kuba ufite amafaranga kuri Mobile Money yawe cyangwa kuri konti yawe y’Inzozi.

IGIHE: Ni gute abatsinze batangazwa?

INZOZI: Iyo wakiniye kuri murandasi uhita ubona ibyo watsindiye kuri konti yawe, iyo wakoresheje itike bigusaba kujya kureba ko watsinze ku ‘aba-agents’ ugahabwa ibihembo byawe.

IGIHE: Ababashaka babakura he?

INZOZI: Ubu twatangije umurongo wacu w’ubuntu ushobora guhamagara 2424 ariko uracyatunganywa, iki cyumweru uzaba wamaze gutungana ariko imbuga nkoranyambaga zacu zirakora nka Instagram, Facebook na Twitter watwandikira igihe cyose wafashwa.

Ibiro byacu biherereye mu nyubako ya CHIC mu muturirwa wa kabiri, duhaye ikaze buri wese. Nimuze mubaze musobanurirwe ibyo mushaka kumenya.

Umuyobozi wungirije wa Carousel Ltd, Nshuti Thierry, yavuze ko Inzozi Lotto igamije guteza imbere imikino mu Rwanda
Gukina muri Inzozi Lotto bishobora kuguhesha ibihembo bigera kuri za miliyoni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .