00:00:00 IGIHE NETWORK KN KINYARWANDA EN ENGLISH FR FRANCAIS

Iby’ingendo zisubira ku kwezi, inkingo ku ndwara zishobora kwaduka,...: Ibizaranga ubushakashatsi mu 2023

Yanditswe na Igizeneza Jean Désiré
Kuya 2 Mutarama 2023 saa 07:11
Yasuwe :

Inkuru y’uko bimwe mu bice by’inyamaswa bishobora kwifashishwa mu gusimbura ingingo z’umubiri yaje ari umucunguzi ku bihumbi by’abarwayi baryamye mu bitaro bategereje kuba basimburirwa ingingo ndetse n’intambwe ikomeye mu rwego rw’ubushakashatsi.

Nko muri Leta Zunze Ubumwe za Amerika, abarenga ibihumbi 100 bategereje gusimburirwa ingingo zitandukanye, bisobanuye ko bamwe bashobora no gupfa kubera gutegereza igihe kirekire.

Mu Rwanda na ho habarurwa ibihumbi 15 by’abategereje kubagwa umutima mu gihe abaganga b’inzobere mu kubaga uru rugingo batageze kuri batanu, bivuze ko habonetse ubundi buryo bwakoreshwa wenda iyi mibare yagabanuka.

Ibyo bibazo byose kugira ngo bikemuke ni ubushakashatsi bwashyirwamo ingufu kuko abahanga bavuga ko iyo ubushakashashatsi buteye imbere n’ubuzima bw’abaturage buhinduka mu nguni zose.

Nk’ubu Afurika ivugwaho ko impamvu iba ifite umubare munini w’abarwayi bategereje kuvurwa ari uko ubushakashatsi mu buzima bukiri hasi, bigatuma ikorwa ry’imiti rikomeza kugenda biguru ntege.

Kongera imishinga igamije koroshya ubuzima bw’ikiremwamuntu no gushaka ahandi hari amahirwe y’imirimo haba ku isi no ku yindi mibumbe ni yo iri ku ruhembe rw’imbere ubushakashatsi bushingiye ku bumenyi n’ikoranabuhanga bwitezweho muri uyu mwaka.

Mu buzima, inzobere muri uru rwego zirashaka gukora inkingo zindi zizahangana n’indwara za malaria, igituntu n’izindi hifashishijwe uburyo bwa mRNA.

Massive RNA (mRNA) ni uburyo bushya buri kwifashishwa mu ikorwa ry’inkingo z’indwara zandura, iza COVID-19, aho uwarutewe rugera mu mubiri rukawufasha kurema ubudahangarwa bugizwe n’abasirikare barwanya agakoko kakingiwe.

Mu minsi mike iri imbere uruganda rukora inkingo rwa BionTech rurateganya igeragerwa ry’urukingo rukozwe muri ubu buryo ku bantu bafite indwaza za malaria, igituntu n’indwara zifata imyanya ndagagitsina.

Aya ni amahirwe ku bihugu bitandukanye ku Isi birimo n’u Rwanda cyane ko uru ruganda rwamaze gutangira gushaka ibizifashishwa mu kubaka uruganda rukora inkingo mu Rwanda.

Uretse kuzajya rukora inkingo zigera kuri miliyoni 50 ku mwaka za Covid-19, biteganijwe ko ruzanafasha mu ikorwa ry’inkingo za malaria kuko nubwo abayirwara bagabanuka imibare igaragaza ko mu 2021 mu Rwanda abantu 1.152.430 bayirwaye, aho bagabanyutse ku kigero cya 38.3% ugereranyije n’abasaga miliyoni eshatu bayirwaye mu 2020.

Ishami ry’Umuryango w’Abibumbye, ryita ku buzima, OMS na ryo rirateganya gutanga imirimo ku bashakashatsi bagera kuri 300 mu kugenzura utunyabuzima 25 dushobora gutera indwara mu bihe biri imbere, hanyuma hagateganywa inkingo zishobora kwifashishwa mu gihe ibyo byorezo byakwaduka.

Ibi bijyana n’umushinga w’ikoranabuhanga rifasha abahanga mu by’ubuzima kuba bahindura uturango ndangasano (ADN) rizwi nka ‘CRISPR’ ryitezweho kuzagira uruhare mu guhangana n’indwara zibasira utunyangingo two mu maraso.

Ubu buryo buri kubakwa n’ibigo byo muri Massachusetts, bukora hafatwa utunyangingo tw’umuntu hanyuma utwangiritse tugakosorwa tukagarurirwa umwimerere watwo mbere y’uko twongera gushyirwa mu mubiri w’umuntu.

Uyu ni umwaka twiteze iyemezwa rya zimwe mu nkingo zo kurwanya indwara yo kwibagirwa ku bageze mu za bukuru izwi nka Alzheimer nk’uko tubikesha ikinyamakuru ‘Nature’.

Uru rukingo rwiswe lecanemab rwakozwe n’uruganda rukora inkingo rwa Eisai cyo mu Bubiligi rwageragerejwe ku bantu 1795 rugaragaza ko rufite ubushobozi bwo gukangura ubwonko ku kigero cya 27% ugereranije n’indi miti yari isanzwe.

Ikoreshwa ry'ingingo z'umubiri w'inyamaswa mu kuzisimbuza iz'umuntu ni bimwe mu byitezweho gushyirwamo imbaraga mu bushakashatsi bwa 2023

Imishinga yo kubungabunga ikirere no kumenya ibibera mu isanzure na yo yitezweho byinshi

Mu nama y’Umuryango w’Abibumbye yigaga ku guhangana n’ihindagurika ry’ibihe, COP27, hasinywe amasezerano ajyanye n’uko ibihugu bifite inganda nyinshi zangiza ikirere byazajya byishyura amafaranga runaka ku bitazifite kandi bigira uruhare mu kurengera ikirere.

Ubu ni ubutabera bunoze ku bihugu bikiri mu nzira y’amajyambere bikora uko bishoboye mu kubungabunga ikirere ariko kikangizwa n’inganda z’ibihugu byateye imbere kandi inyungu bikura muri izo nganda bitazisangira n’ibihugu bikizamuka.

Birumvikana ko bene aya mafaranga azajya atangwa mu buryo busa no kugura umwuka mwiza ibihugu bimwe bigira mu iboneka ryawo kandi nta nganda zihumanya ikirere nyinshi zifite, gusa bizemezwa mu nama ya COP28 nyuma yo kwigwaho.

Mu gukomeza kurengera ikirere n’ibidukikije ikimoteri kizajya gishyirwamo ibisigazwa by’ingufu za nucléaire cyatangiye kubakwa i Olkiluoto muri Finlande na cyo ni umwe mu mishinga witezweho kurengera gufasha muri iyi gahunda.

Kizaba gifite ubujyakuzimu bwa metero 400 gifite ubushobozi bwo kubika toni 6500 bw’ibisigazwa bya Uranium bishyirwe mu byobo byabanje gutunganywa hifashishijwe ikinyabutabire cya granite ku buryo bizamara imyaka umwo ariko bitakwangiriza ibidukikije.

Kugenzura ikirere abantu bakamenya byimbitse ibihabera ni umwe mu mishinga yitezwe kushyirwamo imbaraga mu mwaka utaha kuko byagaragaye ko aya makuru ava mu isanzure ari ingirakamaro mu mirimo itandukanye ya buri munsi harimo n’ubuhinzi.

Ubuvumo cyangwa ikimoteri kigiye kubakwa i Olkiluoto muri Finlande kizifashishwa mu kubika ibisigazwa bya Uranium

Ibi bijyana n’indebakure yiswe Euclid iri gutegurwa n’Ikigo cy’u Burayi gishinzwe iby’isanzure, ESA, ikazazenguruka izuba mu gihe cy’imyaka itandatu ikazatanga ishusho y’ikirere nabwo amakuru azavanwamo akazifashishwa mu guteza imbere ibibera ku Isi.

Ikigo cyo muri Chile gikunze kwifashishwa mu gutanga amashusho yo mu isanzure, giteganya ko muri uyu mwaka kizagaragaza amashusho y’isanzura cyane ayo mu gice cy’amajyepfo y’Isi yose byibuze mu mafoto atatu gusa.

Ifite za camera zihambaye zifasha iyi ndebakure kuba yafotora ibintu biri kure ndetse bishobora kuba ari bigari mu gihe gito kandi ifoto ikaza ari nziza.

Nyuma y’uko icyogajuru cy’Abanyamerika cya Orion cyari cyoherejwe mu isanzure hafi y’Ukwezi mu gushaka amakuru azafasha gusubiza abantu ku Kwezi kigarutse amahoro, hateganjyije indi mishinga nk’iyi ku buryo uyu mubumbe wamenywa byimbitse byanarimba ugaturwaho.

Kohereza abantu mu Kwezi ni mushinga mugari kuko umaze gusinywa n’ibihugu 23 byiyemeje gufatanya mu bushakashatsi bikora mu bijyanye n’isanzure hagamijwe kugera kuri gahunda ya Amerika yo gusubiza abantu ku Kwezi bitarenze mu 2024 binyuze muri gahunda yiswe ‘Artemis’.

Imibumbe irimo na Jupiter byitezwe ko izigwaho birambuye harebwa ushobora guturwaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .