IBUKA yariye karungu nyuma y’aho u Bufaransa buhagaritse gukurikirana abasirikare bakekwaho uruhare muri Jenoside

Yanditswe na Nkundineza Jean Paul
Kuya 4 Gicurasi 2021 saa 06:41
Yasuwe :
0 0

Umuryango Uharanira inyungu z’abacitse ku icumu rya Jenoside yakorewe Abatutsi, IBUKA wababajwe bikomeye n’umwanzuro w’ubushinjacyaha bw’u Bufaransa wo gufunga ikirego ingabo z’icyo gihugu zari muri opération Turquoise zashinjwagamo uruhare muri Jenoside.

Ubushinjacyaha bw’u Bufaransa kuri uyu wa Mbere bwatangaje ko mu iperereza bwakoze, bwasanze nta bimenyetso simusiga bigaragaza ko ingabo z’u Bufaransa zari muri opération Turquoise yatangiye muri Kamena 1994, zaba zaragize uruhare muri Jenoside cyangwa ibindi byaha byibasiye inyokomuntu mu Rwanda.

Guhera mu 2005 imiryango itandukanye irengera uburenganzira bwa muntu irimo IBUKA , Survie, FIDH na batandatu mu barokokeye Jenoside mu Bisesero, batanze ikirego bagaragaza ko abasirikare bari muri opération Turquoise bamaze iminsi itatu barataye ibihumbi by’abatutsi bari bahungiye mu Bisesero, bakabashumuriza Interahamwe ngo zibice.

Abo batangabuhamya bavuga ko Ingabo z’Abafaransa zagize uruhare mu gufata abagore n’abakobwa b’abatutsikazi ku ngufu.

Umuyobozi w’agateganyo wa IBUKA , Nkuranga Egide, yabwiye IGIHE ko kuba ubushinjacyaha bwa Paris butinyuka kuvuga ko nta ruhare ingabo zabo zagize muri Jenoside yakorewe Abatutsi, bibabaje.

Nubwo ubushinjacyaha bwatangaje ko nta bimenyetso simusiga babonye, Nkuranga ahamya ko nta n’ibyo bigeze bashaka.

Ati “Ibimenyetso se babibona batabishatse? Babanze babishake noneho bavuge ko babibuze. Ibimenyetso simusiga birahari byinshi, harimo na benewabo b’Abafaransa bagiye babyandikaho. Nk’abasirikare bafashe ku ngufu abatutsikazi muri Jenoside , njye ubwanjye nzi umudamu w’Umufaransakazi wari mu Rwanda wabyanditseho, hari n’ibindi bimenyetso, hari abandi bagiye babyandikaho […] birababaje kuvuga ko babuze ibimenyetso kandi batarigeze babishaka.”

Mu basirikare batanu bakorwagaho iperereza ku ruhare rwabo muri Jenoside yakorewe Abatutsi harimo General Jean-Claude Lafourcarde wari umuyobozi mukuru wa Turquoise , Jacques Hogard wari umuyobozi wa Turquoise i Cyangugu n’abandi.

Uyu mwanzuro w’ubushinjacyaha bw’u Bufaransa ufashwe nyuma ya raporo Duclert yakozwe ku busabe bwa Perezida Emmanuel Macron ikagaragaza ko u Bufaransa bwagize uruhare ntagereranywa mu bikorwa byagejeje kuri Jenoside yakorewe Abatutsi, gusa raporo yirinda kuvuga ko habayeho ubufatanyacyaha.

Nkuranga yabwiye IGIHE ko bari biteze ko ubushinjacyaha bw’u Bufaransa buhera ku byagaragajwe na raporo Duclert, bagakora irindi perereza ryimbitse.

Ati “Icyo twari twiteze nyuma y’iriya raporo ya Komisiyo Duclert, twumvaga ari intambwe itewe ariko cyane cyane , twumvaga ikigomba gukurikiraho ari ukugira ngo abagize uruhare muri Jenoside yakorewe Abatutsi, hakorwe iperereza abagomba gukurikiranwa bagakurikiranwa. Biradutunguye ko parike ya Paris yasabye ko badakurikiranwa kandi ubundi parike ariyo yakagombye gufata iya mbere kugira ngo ishakishe n’ibyo bimenyetso .”

Yakomeje agira ati “Biratubabaje, ahubwo umuntu yakwibaza n’impamvu bafashe uwo murongo kandi bakagombye gushaka ibimenyetso bakifashisha n’izo raporo zasohotse.”

Nkuranga yavuze ko nk’imiryango yari yaratanze ikirego, bagiye kwicara bakareba igikurikiraho.

Ati “Abantu babitekerezaho niba bakomeje kumera gutyo, imiryango yigenga ikazarega igihe twaba tumaze kwegeranyanya ibimenyetso simusiga kandi birahari. Ntabwo dushobora kwifata ngo birarangiye.”

Nyuma ya Raporo Duclert ndetse na raporo Muse yakozwe ku busabe bwa Guverinoma y’u Rwanda zombi zikagaragaza uruhare rw’u Bufaransa mu mateka yagejeje kuri Jenoside yakorewe Abatutsi, ibihugu byombi byagaragaje ko ari intambwe nziza iganisha ku kumva neza ahahise, no gutegura ejo hazaza harangwa n’umubano mwiza.

Nkuranga yavuze ko nta muntu upfa kwemera byoroshye uruhare muri Jenoside iyo ariyo yose, ariyo mpamvu ibyakozwe n’ubushinjacyaha bw’u Bufaransa budashobora gusubiza inyuma intambwe nziza imaze guterwa mu buryo bwa politiki.

Ati “Buriya uruhare muri Jenoside iyo ariyo yose, noneho uruhare kuri Jenoside yakorewe Abatutsi ni agahomamunwa. Abantu bagize uruhare muri za Jenoside izo ari zo zose birabagora kubona ukuri, bakoresha uko bashoboye ngo urwo ruhare rwoye kugaragara. Ntabwo ariko ibyo ubushinjacyaha bwa Paris bwakoze byasubiza inyuma intambwe imaze guterwa.

Mu mwaka wa 2005 nibwo ubushinjacyaha bw’u Bufaransa bwatangiye iperereza ku birego bwari bumaze kugezwaho by’uko abasirikare b’u Bufaransa bagize uruhare muri Jenoside yakorewe Abatutsi.

Mu Ugushyingo 2005, umucamanza Brigitte Raynaud wo mu rwego rw’ubugenzacyaha mu Bufaransa yagiye mu Rwanda guhura n’abatanze ibirego. Bamubwiye ko abasilikari b’Abafaransa bari muri Turquoise bafashe abagore ku ngufu, kandi ko borohoreje abicanyi kunyereza Abatutsi, ndetse ko banabafashije kubica.

Nubwo ubushinjacyaha bwa Paris bwafashe umwanzuro wo kudakomeza gukurikirana abasirikare b’abafaransa bashinjwa uruhare muri Jenoside yakorewe Abatutsi, umwanzuro wa nyuma uzafatwa n’abacamanza bakuriye urwego rw’Ubugenzancyaha.

Ingabo z'u Bufaransa zari muri opération Turquoise mu Rwanda
Egide Nkuranga yatangaje ko bagiye kureba icyo bakora nyuma y'aho parike ya Paris ihagaritse iperereza ku ruhare rw'ingabo z'u Bufaransa muri Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .