Ibanga rya Girabawe wahembwe nk’umwarimu w’indashyikirwa mu gihugu

Yanditswe na Hakizimana Jean Paul
Kuya 6 Ukwakira 2018 saa 01:50
Yasuwe :
0 0

Girabawe Aloysie wigisha Ibinyabuzima mu Ishuri ryisumbuye rya SOPEMU mu Karere ka Nyagatare, ni we wahembwe nk’umwalimu w’indashyikirwa mu gihugu, mu bihembo byatanzwe hizihizwaga umunsi mpuzamahanga wa mwalimu.

Ni ibirori ku rwego rw’igihugu byabereye mu Murenge wa Kigabiro mu Karere ka Rwamagana.

Girabawe w’imyaka 32, avuga ko bitari byoroshye kuko yahereye ku rwego rw’umurenge atorwa, kugeza ku rwego rw’Igihugu. Yahembwe Moto, televiziyo nini na mudasobwa.

Guhabwa iri shimwe ngo yabikesheje uburyo yinjije ikoranabuhanga mu murimo we wo kwigisha, kugira imibanire myiza n’abandi, kwigisha akoresheje icyongereza neza no gutegura ibidanago nk’uko abisabwa.

Ati “Ikindi nagaragaje uburyo iyo ndi kwigisha nkakenera ibishushanyo kugira ngo isomo ryumvikane neza, njya kubishakisha kuri internet nkanakoresha ‘projecteur’ nkabibereka neza ntagiye gushushanya ku kibaho.”

“Ikindi uyu mwaka twatinze kubona ibitabo twigishirizamo. Ntabwo amasomo njye yahagaze cyangwa ngo abana badindire kuko nagiye kuri mudasobwa, nshakisha ibitabo bihuye n’inyigisho z’abana nifashishije integanyanyigisho, mbikuraho ndaza nkomeza kwigisha.”

Baranamuhiriye kandi n’abanyeshuri babyungukiramo, kuko ngo aho ibitabo bitangwa n’Ikigo cy’Igihugu cy’Uburezi, REB, byagereye ku ishuri Girabawe igishaho, basanze inyigisho zihuye.

Girabawe ufite umugabo n’abana babiri, yarangije mu ryitwaga ishuri rikuru nderabarezi, KIE, mu 2011. Yatangiye kwigisha mu mwaka wa 2012, agenda azamura urwego rw’imyigishirize ye yifashishije ikoranabuhanga.

Mu 2017 yagizwe umuyobozi w’agace k’abakosora ibizamini bya leta mu binyabuzima, bimugaragariza ko icyizere afitiwe kigenda kizamuka.

Ati “Inama nagira bagenzi banjye ni uko bagira umurava mu kazi bakora, ntibashyire inyungu y’amafaranga imbere, ikindi bakita ku banyeshuri bigisha bakabashakira n’izindi mfashanyigisho zarushaho gutuma isomo ryabo ryumvikana.”

Umunsi wa mwalimu wizihijwe mu gihugu hose, buri ntara n’Umujyi wa Kigali batora umwarimu w’indashyikirwa, bose bahembwa moto.

Minisitiri w'Uburezi Dr Mutimura Eugene ashyikiriza ibihembo Girabawe Aloysie wabaye umwalimu w'indashyikirwa mu gihugu
Girabawe yishimiye ibihembo yahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza