Hatangijwe amarushanwa ya iAccelerator hibandwa ku buzima bw’imyororokere n’ubwo mu mutwe

Yanditswe na Ishimwe Israel
Kuya 14 Ugushyingo 2020 saa 04:57
Yasuwe :
0 0

Irushanwa rya iAccelerator rifasha urubyiruko guhanga ibisubizo by’ibibazo bijyanye n’ubuzima bw’imyororokere ryatangijwe ku nshuro ya gatatu, riha umwihariko abafite ubumuga.

Gahunda ya ‘Innovation Accelerator’ (iAccelerator) itegurwa na Imbuto Foundation ifatanyije n’Ikigega cya Loni cyita ku Baturage (UNFPA), Ikigo cya Koreya y’Epfo gitsura Amajyambere (KOICA) na Minisiteri y’Urubyiruko n’Umuco.

Itangizwa rya iAccelerator ryahuriranye n’Ihuriro ry’Urubyiruko ryatangiwemo ikiganiro ku bisubizo by’ibibazo bijyanye n’ubuzima bw’imyororokere n’ubwo mu mutwe.

Iki gikorwa cyitabiriwe n’urubyiruko, abayobozi mu nzego zitandukanye cyabaye hifashishijwe ikoranabuhanga mu kwirinda icyorezo cya COVID-19.

Umuyobozi Mukuru wa Imbuto Foundation, Umutoni Sandrine, yavuze ko muri ibihe bya COVID-19 bishobora kuba icyanzu cy’uko ibibazo by’inda ziterwa abangavu n’ibijyanye n’ubuzima bwo mutwe byiyongera hatagize igikorwa.

Ati “Uyu ni wo mwanya mwiza wo gutanga ibisubizo byubaka kandi bishya, ku bibazo bitwugarije ari nako muhanga imirimo mishya.’’

Abatanze ikiganiro bagaragaje ko kutagira ubumenyi buhagije, kutabona amakuru no kutigirira icyizere biri mu bituma hari urubyiruko rugihura n’ibibazo byerekeye ubuzima bw’imyororokere.

Inzobere mu buvuzi bw’Indwara zo mu Mutwe, Dr Musoni Emmanuel, yasabye Leta gushyira ingufu mu kurushaho kwigisha iby’ubuzima bw’imyororokere bikagezwa mu giturage.

Yagize ati “Byigishwa n’abantu bakuze mu mvugo z’abantu bakuze. Byaba byiza hashyizwe imbaraga mu guhugura urubyiruko rukazigisha bagenzi barwo.’’

Minisitiri w’Ubuzima, Dr Ngamije Daniel, yijeje ko hazarebwa uko urubyiruko rwakwifashishwa mu gusobanurira bagenzi babo ibijyanye n’ubuzima bw’imyororokere.

Ati “Igitekerezo mwatanze cyo gushaka abo mwise abajyanama b’urungano, tuzakirebaho kuko hari ibindi bisabwa nko kubahugura no kubaha ubwo bumenyi. Kuri ubu mu bigo nderabuzima twashyizeho inguni y’urubyiruko, ahaba hari umukozi muto uzi ibibazo birimo ubuzima bw’imyororokere n’ubuzima bwo mu mutwe ku buryo yakira urubyiruko rukamwisanzuraho, nta pfunwe.’’

Niyonsaba Brown wavutse afite ubumuga bwo kutavuga yavuze ko yahuye n’imbogamizi zo kubona amakuru ku buzima bw’imyororokere.

Ati “Kujya ku ishuri ibintu byose byari ukwirwanaho ngo umuntu abone amakuru. Nta mahirwe nagize yo kubwirwa n’ababyeyi ku buzima bw’imyororokere usibye kuyabwirwa na mugenzi wawe rimwe ugasanga si yo. Abatanga serivisi na bo usanga ntabyo bazi ku buryo no kubivuga bigorana.’’

Minisitiri Dr Ngamije yavuze ko hazakorwa ubuvugizi ku buryo amarenga yigishwa, bigafasha n’abafite ubumuga kubona serivisi nziza by’umwihariko izijyanye n’ubuzima bw’imyororokere n’ubwo mu mutwe.

Inyigo yakozwe yerekana ko hari icyuho mu makuru ahabwa abangavu kuko muri 79 babyariye iwabo, 4% batwaye inda nyuma yo kuryamana n’abakunzi babo, 13% bafashwe ku ngufu, 81% batewe inda nyuma yo kotswa igitutu n’abakunzi babo.

Minisitiri w’Urubyiruko n’Umuco, Mbabazi Rosemary, yavuze ko ari ingenzi ko ababyeyi babera abana inshuti.

Ati “Nubwo ari ngombwa gushaka ubuzima, inshingano za mbere dufite ni abana bacu. Mu by’ukuri, ubufatanye burakenewe hagati y’inzego zose ngo tubone ibisubizo bikenewe muri iAccelerator ya gatatu.’’

Yasobanuye ko iAccelerator igamije guha icyizere urubyiruko cyo kwiyubakamo indangagaciro y’Abanyarwanda yo kwishakamo ibisubizo by’ibibazo.

Yasabye urubyiruko kutemera kwangiza ubuzima bwabo bishora mu busambanyi n’ibiyobyabwenge kuko kwiha agaciro ari ukugaha n’abazabakomokaho.

Imishinga yatangiye gutanga umusaruro!

Dr Hirwa Sylvain watsinze mu cyiciro cya mbere cya iAccelerator yavuze ko bashinze ‘Ni Tantine’, porogaramu itanga amakuru ajyanye n’ubuzima bw’imyororokere mu kurwanya ibihuha ku makuru atangwa.

Abantu bifashishije application na website ya Tantine bashakiraho amakuru arimo ay’imiterere y’umubiri, kuboneza urubyaro n’ibindi byerekeye urukundo.

Ati ‘‘Tantine yabaye isoko y’amakuru yizewe ku buzima bw’imyororokere. Kuva mu 2017, amakuru yacu amaze kugera ku rubyiruko rurenga miliyoni.’’

Urubyiruko rwafunguriwe amarembo yo gutanga imishinga ibyara inyungu, ikanatanga umuti ku kibazo cy’ubuzima bw’imyororokere.

Kwiyandikisha muri aya marushanwa byatangiye ku wa 13 Ugushyingo bizasozwa ku wa 13 Ukuboza 2020.

Urubyiruko rwiyandikisha ni urufite imyaka iri hagati ya 18 na 30. Abazagera mu cyiciro cya nyuma bazahabwa inkunga ya $10,000 yo gushyira mu bikorwa imishinga yabo no guhugurwa ku buryo bwo kuyinoza.

Irushanwa rya iAccelerator rije ku nshuro ya gatatu, hibandwa ku buzima bwo mu mutwe n'ubuzima bw'imyororokere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .