Hatangajwe itariki y’inama ntegurarubanza ku rubanza rwa Kabuga Félicien

Yanditswe na Akayezu Jean de Dieu
Kuya 13 Mutarama 2021 saa 05:52
Yasuwe :
0 0

Umucamanza lain Bonomy w’Urwego rwasigaranye imirimo y’Inkiko Mpuzamahanga Mpanabyaha zirimo urwari rwarashyiriweho u Rwanda, IRMCT yatangaje ko mu ntangiro za Gashyantare 2021, aribwo hateganyijwe inama ntegurarubanza y’urubanza rwa Kabuga Félicien ukurikiranyweho ibyaha bya Jenoside yakorewe Abatutsi mu 1994.

Mu Ugushyingo 2020, nibwo Banomy yari yatangaje ko iyi nama yagombaga kuba hagati ya tariki 18 Mutarama na 5 Gashyantare 2021, kugira ngo yorohereze imitegurire y’urubanza hanyuma ruburanishwe kandi hirindwe ibindi bibazo byose bishobora kuvuka bikarutinza.

Kuri uyu wa Gatatu nibwo uru rwego rwasohoye itangazo rivuga ko inama ntegurarubanza ya Kabuga iteganyijwe tariki 3 Gashyantare 2021, aho byitezwe ko muri iyo nama ari bwo hazatangazwa itariki urubanza nyirizina ruzatangira kuburanishwa.

Kabuga ukurikiranyweho ibyaha birindwi bya jenoside n’ibyaha byibasiye inyokomuntu. Yaherukaga kwitaba urukiko tariki ya 11 Ugushyingo 2020, i Lahe mu Buholandi ari naho afungiye.

Ibyo wamenya ku byaha Kabuga akurikiranyweho

Kabuga w’imyaka 88 yafatiwe mu gace ka Asnières-sur-Seine mu Bufaransa, ku wa 16 Gicurasi 2020.

Uyu mugabo wari umaze imyaka yihishahisha akwepa ubutabera mpuzamahanga, akurikiranyweho kuba kuva ahagana ku itariki ya 25 Mata 1994 kugera muri Nyakanga 1994, yari Perezida wa Komite y’agateganyo y’Ikigega cyo kurengera igihugu, akaba mu gihe ibyaha bivugwa mu Nyandiko y’ibirego byakorwaga, yari na Perezida wa Komite yatangije Radiyo RTLM.

Kabuga aregwa icyaha cya jenoside, kuba icyitso cy’abakoze jenoside, guhamagarira abantu mu buryo butaziguye kandi mu ruhame gukora jenoside, ubwinjiracyaha bwa jenoside, ubwumvikane bugamije gukora jenoside, n’itsembatsemba n’itoteza nk’ibyaha byibasiye inyokomuntu, byakozwe mu 1994.

Ku itariki ya 26 Ugushyingo 1997 ni bwo Kabuga yakorewe Inyandiko y’ibirego bwa mbere n’Urukiko Mpanabyaha Mpuzamahanga Rwashyiriweho u Rwanda (TPIR), akaba yarafatiwe hafi y’i Paris ku itariki ya 16 Gicurasi 2020.

Amaze gufatwa, Kabuga yiyambaje inkiko zo mu Bufaransa, arwanya ibyo kumwimurwa. Tariki ya 30 Nzeri 2020, Urukiko rusesa imanza rwo mu Bufaransa rwanze ubujurire bwe maze rwemeza ko ashyikirizwa IRMCT.

Nyuma y’aho icyo cyemezo gifatiwe, ku itariki ya 5 Ukwakira 2020, Kabuga yatanze Icyifuzo cyihutirwa, asaba ibintu birimo ko Urwandiko rwo kumufata n’Itegeko ryo kumwimura bihindurwa kugira ngo yimurirwe ku cyicaro cy’Ishami rya IRMCT ry’i La Haye aho kwimurirwa ku Ishami ry’Arusha; by’umwihariko, atanga impamvu z’uburwayi bwe n’ingorane urwo rugendo rwateza ubuzima bwe.

Ku itariki ya 21 Ukwakira 2020, Umucamanza Iain Bonomy yahinduye Urwandiko rwo gufata Kabuga n’Itegeko ryo kumwimura kugira ngo yimurirwe muri Gereza y’Umuryango w’Abibumbye, ku Ishami rya IRMCT ry’i La Haye. Yimuriwe tariki ya 26 Ukwakira 2020, nyuma y’imyaka irenga 22 yari amaze ashakishwa.

Kabuga ashinjwa ibyaha bitandukanye byakozwe muri Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .