Hagiye gutangizwa ihuriro rihwitura urubyiruko rwa Afurika ngo rumenye icyo irukeneyeho

Yanditswe na Ferdinand Maniraguha
Kuya 22 Ukuboza 2020 saa 05:47
Yasuwe :
0 0

Komisiyo y’Urubyiruko ruri mu Muryango uharanira Ubwigenge, Agaciro n’Iterambere by’Umunyafurika, Ishami ry’u Rwanda (Panafrican Movement Rwanda), igiye gutangiza ihuriro Nyafurika rigamije gukangurira urubyiruko rwa Afurika icyo uwo mugabane ubitezeho ngo batere imbere.

Iryo huriro ryiswe Africa Expects Youth Series, rizatangirizwa mu Rwanda kuri uyu wa Gatatu tariki 23 Ukuboza 2020, aho hifashishijwe ikoranabuhanga urubyiruko rutandukanye ruzahana inararibonye n’amasomo ku cyakorwa ngo Afurika itere imbere mu bufatanye.

Komiseri w’Urubyiruko muri Panafrican Movement Rwanda, ari nayo yatangije iryo huriro, Shyaka Michael Nyarwaya, yabwiye IGIHE ko iyo nama ari umwanya ku rubyiruko rw’u Rwanda na Afurika mu kumenya icyo uwo mugabane ubitezeho.

Umugabane wa Afurika ni umwe mu ifite urubyiruko rwinshi dore ko hafi 60 % by’abawutuye bari munsi y’imyaka 35.

Shyaka yavuze ko ari amahirwe akomeye kuri uwo mugabane yo gutera imbere ariko atabyazwa umusaruro kuko usanga urwo rubyiruko rutaramenya igikenewe ngo intego za Afurika zo kuba yihagije kandi yunze ubumwe mu 2063 zigerweho.

Yagize ati “Africa expects ije kugira ngo tubiganireho, abana b’Abanyarwanda n’Abanyafurika bamenye ngo Afurika ibategerejeho iki maze bahaguruke mu nzego zose barimo, ibyo akora byose amenye ngo Afurika imutegerejeho iki?”

“Imutegerejeho ko aba umuntu uharanira ubwigenge bwayo. Nk’ubu hagiye gutangira isoko rusange rya Afurika, ni ukugira ngo ugende ucuruze aho ariho hose muri Afurika atere imbere.”

Shyaka yavuze ko bifuza ko iryo huriro rya Africa Expects rikwira mu duce twose twa Afurika, urubyiruko rwo mu Majyepfo, Iburasirazuba, mu Majyaruguru, Iburengerazuba no Hagati muri Afurika rukagira aho ruhurira rukungurana ibitekerezo kandi rugahugurwa n’inararibonye ku cyo bakora ngo umugabane urusheho gutera imbere.

Muri iryo huriro rigomba gutangira kuri uyu wa Gatatu hatumiwe urubyiruko rutandukanye haba mu Rwanda no muri Afurika ruzatanga inararibonye.

Shyaka yavuze ko hazaganirwa ku buryo ibyakorewe mu Rwanda no muri Afurika byakongerwa kandi bigahatana ku isoko mpuzamahanga, uburyo bwo kubyaza umusaruro Isoko rusange rya Afurika rigiye gutangira, uburyo ikoranabuhanga ryabyazwa umusaruro n’urubyiruko rwa Afurika n’ibindi.

Yavuze ko urubyiruko rwa Afurika nirumenya icyo umugabane urwifuzaho, ruzarushaho gukora ibiruteza imbere kandi bikungukira n’abandi.

Muri iri huriro byitezwe ko urubyiruko rwo mu nzego zose haba uburezi, ikoranabuhanga, ubucuruzi, ubuhinzi, ubuvuzi n’ibindi ruzahuza ubumenyi, buri umwe mu rwego arimo agakora aharanira intego rusange y’uko Afurika yigira kandi ikunga ubumwe.

Bamwe mu bazatanga ibiganiro mu itangizwa rya Africa Youth Expect Series kuri uyu wa Gatatu
Byitezwe ko Africa Expects Youth Series ruzaba urubuga urubyiruko rwa Afurika ruzungukiramo iby'ingenzi umugabane urwitezeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .