00:00:00 IGIHE NETWORK KN KINYARWANDA EN ENGLISH FR FRANCAIS

Hagaragajwe ingamba zizafatirwa ababyeyi batita ku mirire y’abana babo

Yanditswe na Claude Bazatsinda
Kuya 17 May 2022 saa 07:00
Yasuwe :

Inzego zitandukanye zirimo Minisiteri y’Ubuzima, ziratangaza ko zifite intego yo kwigisha ababyeyi batita ku mirire y’abana babo ari nabyo bibaviramo ibibazo by’igwingira, aho usanga umubyeyi afite ubushobozi bwo gutegura indyo yuzuye ariko ‘intege nke’ zikaba intandaro yo kutazitegura.

Ibi byatangarijwe mu bukangurambaga bugamije kwita ku buzima bw’umubyeyi n’umwana iyi Minisiteri yatangije mu Karere ka Ngororero bufite insanganyamatsiko igira iti “Tunoze isuku turinde abana indwara zibatera kugwingira.”

Ni ubukangurambaga bwatangijwe ku itariki ya 16 Gicurasi 2022, aho ababyeyi bo muri ako Karere bahafatiye ingamba zo kurandura burundu iki kibazo, nyuma y’uko baganirijwe ku buryo bushobora gutuma kiranduka, na cyane ko ubushobozi bukenewe buhari.

Aba babyeyi bavuga ko aya mahugurwa yabagiriye akamaro. Twagirumukiza Jean Baptiste yagize ati “Izi serivisi Minisiteri yatwegereje zigiye kudufasha gukora impinduka ku bana bacu kuko ibitera igwingira byose twabyigishijwe turabimenya. Tugiye kujya inama tumanuke kuri buri rugo tuganire kuri ibi bibazo, aho batishoboye tubafashe ariko iki kibazo ntikizongere kugaragara iwacu.”

Akimanizanye Vestine usanzwe ari Umujyanama w’Ubuzima, yavuze ko ikibazo cy’igwingira ry’abana giterwa n’uko ababyeyi bamwe bagira intege nke mu gutegura amafunguro y’abana.

Yagize ati “Iyo dukurikiranye, dusanga ababyeyi bashyiramo imbaraga nke ariko natwe twahagurutse tugiye kwigisha ababyeyi gutegura indyo yuzuye n’isuku ihagije kuri buri rugo."

Umuyobozi Mukuru w’Ikigo cy’Igihugu gishinzwe Ubuzima, RBC, Prof. Claude Mambo Muvunyi, yavuze ko hari intambwe yatewe mu guhangana n’ikibazo cy’imirire mibi muri rusange.

Yagize ati “U Rwanda rwashyize ku isonga kwita ku buzima bw’umubyeyi n’ubw’umwana, harimo no kurwanya igwingira n’izindi ndwara ziterwa n’imirire mibi, bikaba bigaragazwa n’ibyavuye mu bushakashatsi ku mibereho y’ingo (DHS) aho imfu z’ababyeyi zagabanutse zikava ku mpfu z’ababyeyi 476 muri 2010 zikagera kuri 203 muri 2020 ku bana ibihumbi ijana bavuka ari bazima. Kuboneza urubyaro hakoreshejwe uburyo bugezweho byariyongereye aho byavuye kuri 45% mu 2010 bikagera kuri 58% muri 2020."

Yakomeje agira ati "Ku byerekeye gukingira abana, bavuye kuri 93% mu 2015 bagera kuri 96% mu 2020. Igwingira mu bana bari munsi y’imyaka itanu ryavuye kuri 38% muri 2015 rigera kuri 33% muri 2020. Imirire mibi ihutiyeho iva kuri 2% muri 2015 igera kuri 1% muri 2020 naho ibiro bike [by’umwana] ubigereranyije n’imyaka biva kuri 9% muri 2015 bigera ku 8% mu 2020. Turasaba ababyeyi kurushaho kwitabira izi gahunda Leta iba yarabashyiriyeho kuko nizo zibafasha guhangana n’ibyo bibazo.”

Umunyamabanga wa Leta muri Minisiteri y’Uburinganire n’Iterambere ry’Umuryango, Mireille Batamuriza, asaba inzego zose n’abaturage ko ibibazo by’imirire mibi n’igwingira mu bana babigira ibyabo bakabihagurukira kugira ngo igihugu kigere ku ntego gifite.

Yagize ati “Kugira ngo intego igihugu cyacu cyihaye igerweho, ni uko buri wese yaba Leta, abikorera n’abaturage babigiramo uruhare kuko inzego z’ubuzima zo zihagaze neza. Turabifuriza imiryango myiza itekanye, ifite isuku, idafite abana bagwingiye, imiryango ikomeye mu bipimo byose byiza kandi mukabigiramo uruhare rufatika."

Muri ubu bukangurambaga Minisiteri y’Ubuzima n’abafatanyabikorwa bayo buzibanda ku bikorwa byo gukingira abana bari munsi y’imyaka itanu bacikanywe n’inkingo zisanzwe zitangwa muri gahunda y’ikingira. Hazakorwa kandi ubukangurambaga bwo kwirinda indwara y’ibura ry’amaraso (anemia) mu turere twose.

Abana bahawe amata nka kimwe mu byabafasha kurundura ibibazo by'imirire mibi
Abajyanama b'ubuzima biyemeje kurushaho kwegera imiryango ifite abana bagwingiye kugira ngo ihabwe ubufasha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .