Gen Muhoozi yasuye RDF ku Kimihurura nyuma yo kwitabira ibirori by’irahira rya Perezida Paul Kagame byabereye muri Stade Amahoro kuri uyu wa 11 Kanama 2024.

Nk’uko byasobanuwe n’ibiro by’ingabo z’u Rwanda, Gen Muhoozi wari kumwe n’abasirikare ba Uganda bamuherekeje muri uru ruzinduko, yakiriwe n’Umugaba Mukuru wa RDF, Gen Mubarakh Muganga n’abandi bofisiye bakuru.

Impande zombi zagiranye ikiganiro kirebana no kongerera imbaraga ubufatanye busanzwe hagati yazo. Byashimangiwe na Gen Muhoozi wavuze ko muri uru ruzinduko, yabonye umwanya wo kuganira n’abo muri RDF ku mishinga irimo amahugurwa ahuriweho ya gisirikare.

Ibi biganiro bishimangira amasezerano yo gukomeza ubufatanye yashyizweho umukono muri Gicurasi 2022, nyuma y’ibiganiro by’iminsi ine byahurije impande zombi i Entebbe muri Kampala.

Ubwo ibi biganiro byari birangiye, Gen. Muhoozi wari ubiyoboye yatangarije ku rubuga X ati “Nyuma y’iminsi ine y’ingirakamaro, twageze ku myanzuro y’uko twakomeza gukorana. Na none kandi ndongera gushimira ba Perezida bacu Yoweri Museveni na Paul Kagame kuba barabyukije ubucuti bwacu.”

Gen. Muhoozi yagize uruhare rukomeye mu kongera kubanisha u Rwanda na Uganda, cyane ubwo yagiriraga inzinduko i Kigali.

Gen. Muhoozi yakiriwe n'Umugaba Mukuru wa RDF, Gen Mubarakh Muganga

Impande zombi zafashe ifoto y'urwibutso ku cyicaro cya RDF

Gen. Muhoozi n'abasirikare bamuherekeje baganiriye n'abayobozi bo muri RDF ku bufatanye bw'impande zombi