Iyi nama ishingiye ku mwanzuro w’abakuru b’ibihugu byo muri EAC na SADC, yigaga ku buryo uburasirazuba bwa Repubulika Iharanira Demokarasi ya Congo bwabona amahoro n’umutekano birambye.

Zimwe mu ngingo z’ingenzi baganiriyeho harimo uko umwanzuro wo guhagarika imirwano n’ubushotoranyi hagati y’ihuriro ry’ingabo za Leta ya RDC n’umutwe witwaje intwaro wa M23 wakubahirizwa.

Tariki ya 21 Gashyantare, abagaba bakuru b’ingabo zo muri EAC babanje guhurira i Nairobi muri Kenya, bafata imyanzuro bagejeje kuri bagenzi babo bo muri SADC.

Bagenzi babo bo muri SADC na bo bahuriye i Dar es Salaam muri Tanzania tariki ya 21 Gashyantare, bafata imyanzuro bagejeje kuri bagenzi babo bo muri EAC tariki ya 24 Gashyantare.

Abakuru b’ibihugu bo muri iyi miryango, ubwo bahuriraga i Dar es Salaam tariki ya 8 Gashyantare 2025, bateganyije ko abagaba bakuru b’ingabo bazakora raporo y’imyanzuro ihuriweho, bayishyikirize ba Minisitiri b’ingabo.

Nk’uko imyanzuro yo ku wa 8 Gashyantare ibivuga, hateganyijwe inama ihuza ba Minisitiri b’ingabo bo muri iyi miryango, yiga kuri raporo ihuriweho y’abagaba bakuru b’ingabo, ikanayemeza.

Ba Minisitiri b’ingabo nibahura, bakemeza iyi raporo, ni bwo hazamenyekana ikizakurikiraho mu burasirazuba bwa RDC.

Yari iyobowe n'abahagarariye abayobozi bakuru n'abanyamabanga bakuru ba EAC na SADC

Iyi nama yabereye i Dar es Salaam muri Tanzania

Gen Mubarakh Muganga yarayitabiriye

Abagaba bakuru b'ingabo bafashe ifoto y'urwibutso