Ethiopia: Iminsi yahawe abigometse yarangiye, Leta yiyemeje kubacanaho umuriro

Yanditswe na IGIHE
Kuya 26 Ugushyingo 2020 saa 03:11
Yasuwe :
0 0

Minisitiri w’Intebe wa Ethiopia, Abiy Ahmed, yatangaje ko ingabo za Leta zigiye gutangiza ibitero simusiga ku bayobozi bigometse hamwe n’abasirikare babashyigikiye bo mu gace ka Tigray, nyuma y’uko amasaha 72 bari bahawe yo kumanika amaboko arangiye.

Ku cyumweru gishize nibwo Ethiopia yatanze amasaha 72 yo kuba ingabo z’ishyaka Tigray People’s Liberation Front (TPLF) zarambitse intwaro hasi, cyangwa se zikagabwaho ibitero mu mujyi wa Makelle ari nawo cyicaro gikuru cy’ubutegetsi bw’intara ya Tigray. Uwo mujyi utuwe n’abasaga ibihumbi 500.

Imiryango irengera uburenganzira bwa muntu ifite impungenge ku buzima bw’abaturage bushobora guhungabanywa n’ibyo bikorwa bya gisirikare.

Minisitiri w’Intebe, Abiy Ahmed abinyujije kuri Twitter yagize ati “Igihe cy’amasaha 72 cyari cyahawe abanyabyaha ba TPLF cyageze ku musozo”.

Yakomeje avuga ko ibitero bigiye gusubukurwa, gusa ashimangira ko uburenganzira bw’abasivile buzubahirizwa ndetse n’ubw’abarwanyi bamaze kumanika amaboko.

Icyakora nubwo Ethiopia itangaza ko hari ibihumbi by’abarwanyi ba TPLF bamanitse amaboko, TPLF yo yabihakanye.

Ibihumbi by’abaturage bimaze kuva mu byabo. Leta ya Ethiopia yatangaje ko yatangiye gutanga inkunga mu nkambi enye abaturage bahungiyemo.

Abiy yasabye abaturage ba Mekelle gushyira intwaro hasi, kuguma mu ngo no kwirinda kujya ahantu hari ibikorwa bya gisirikare.

Ati “Ingabo zacu zashyizeho uburyo bwo kugeza agatsiko k’abanyabyaha ba TPLF mu butabera, abasivile badahungabanyijwe, ibice ndangamurage, insengero, ibikorwa remezo n’imitungo bitangijwe.”

Reuters yatangaje ko ubutegetsi bwa TPLF muri Tigray bwakoze ubukangurambaga mu baturage ku buryo bacukuye indaki kandi ngo bose batunze imbunda zo mu bwoko bwa AK47.

Amakimbirane hagati ya TPLF na Guverinoma ya Ethiopia yatangiye kuvuka guhera mu 2018 ubwo Abiy yajyaga ku butegetsi. Ubusanzwe abanya-Tigray nibo bari bamaze igihe ku butegetsi, nubwo bagize 6 % by’abaturage bose ba Ethiopia.

Abiy ashinja ubutegetsi bwa Tigray kwigomeka no gushotora ibirindiro by’ingabo za Leta. Inyeshyamba zo zimushinja kuvangura no kwirengagiza abanya-Tigray.

Intumwa zitandukanye z’ibihugu bya Afurika n’umuryango wa Afurika Yunze Ubumwe kuri uyu wa Gatatu zagiye muri Ethiopia kureba ko impande zombi zemera kumvikana.

Guhera tariki 4 Ugushyingo ubwo intambara yatangiraga, bivugwa ko hari abaturage benshi bamaze kuhasiga ubuzima. Ibihumbi bisaga 43 by’abaturage bimaze guhungira muri Sudan. Ibisasu bya TPLF byaguye mu murwa mukuru wa Eritrea bihana imbibi.

Hari amakuru avuga ko ingabo za TPLF zashinze ibirindiro mu duce dutuwemo n’abaturage ku buryo imirwano ishobora guhitana ubuzima bw’abasivile benshi.

Guverinoma ya Ethiopia yatangaje ko igiye gusubukura ibitero simusiga ku nyeshyamba zo muri Tigray

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .