Croix Rouge y’u Rwanda yashyizeho uburyo bushya bwo kugera ku baturage hifashishijwe telefoni

Yanditswe na Ntabareshya Jean de Dieu
Kuya 25 Gashyantare 2021 saa 05:20
Yasuwe :
0 0

Umuryango utabara imbabare mu Rwanda Croix Rouge, by’umwihariko ufite inshingano yo kuba umufasha wa Leta mu bikorwa by’ubutabazi. Ni muri urwo rwego Croix Rouge yashyizeho umurongo uzajya wifashishwa n’umuntu wese ukeneye ubutabazi bw’ibanze by’umwihariko ku makuru ya COVID-19 na Ebola.

Uwo muryango watangaje ko udashobora gutuza mu gihe ubuzima bw’Abanyarwanda buri mu kaga, ndetse n’igihe hakenewe ibikorwa bifasha mu iterambere rirambye.

Muri urwo rwego, Croix Rouge y’u Rwanda yakoze ibikorwa bitandukanye birimo gutanga amazi mu duce tunyuranye tw’Igihugu, hubakwa amazu y’abatishoboye, amashuri, hashyirwaho inzego z’ubutabazi mu gihugu hose ndetse zinahabwa ubushobozi, n’ibindi.

Kuva Coronavirus yagera mu Rwanda, Croix-Rouge y’u Rwanda yafashe iya mbere mu gufasha Abanyarwanda gukumira icyorezo, binyuze mu bukangurambaga, gufasha abagizweho ingaruka cyane kurusha abandi, guhangana n’ihungabana, kurwanya ibihuha no gutanga amakuru yizewe, no kwigisha abantu uburyo bwiza bwo kwirinda.

Kuri iyi nshuro Croix rouge yashyizeho umurongo uzajya wifashishwa n’abagenerwabikorwa batandukanye mu gihe bakeneye ubutabazi bw’ibanze, igihe hari amakuru bifuza kumenya yaba arebana na Covid-19 cyangwa Ebola. Ni umurongo uhamagarwa ku buntu ari wo 2100.

Umuyobozi ushinzwe Imishinga muri Croix Rouge y’u Rwanda, Ndimbati Pierre Claver, yavuze ko gushyiraho uyu murongo biri mu rwego rwo gutera ingabo mu bitugu gahunda za Leta.

Ati “Nk’uko bamwe mubizi Croix Rouge ni umuryango utabara imbabare, kuva rero iki cyago cyane Coronavirus cyagera mu gihugu twafashe iya mbere mu bikorwa by’ubukangurambaga bitandukanye kandi turacyabikomeje akenshi iyo habaye icyorezo nka Coronavirus, Ebola n’ibindi abaturage bakunze kubyumva bitandukanye. Uyu murongo washyizweho kugira ngo tumenye ese abaturage barabyumva neza, cyane ko tumaze iminsi dukora ubukangurambaga, haba hari n’ibibazo bafite tukabaha ibisubizo bitomoye.”

Umwe mu bakoranabushake bahuguriwe gufasha abaturage kuri uyu murongo aho bazajya basubiza ibibazo uhamagaye wese abajije, Nyirimigabo Steven yavuze ko babanje guhugurwa kugira ngo babashe kongerera ubumenyi abaturage.

Ati “Hari igihe abaturage baba bafite amakuru atari yo ku ndwara runaka, ariko si kundwara gusa kuko twahuguwe muri byinshi tuzajya dufasha abaturage bakeneye ubutabazi bw’ibanze. Urebye dufite amakuru ahagije kuko twarahuguwe kandi twagiye dukorana n’inzego zibishinzwe, ndahamya ko dufite ubumenyi bwo gufasha Abanyarwanda bakeneye ubutabazi bw’ibanze cyangwa amakuru kuri Covid-19 na Ebola.”

Umuryango Croix Rouge y’u Rwanda watangijwe mu 1962 n’abagabo bane bayobowe na Gashakamba Mathias wari umuyobozi w’ibitaro bya Kaminuza bya Kigali CHUK.

Imvano yo gushyiraho uyu murongo…

Nyuma yo kubona uburyo iki cyorezo cyateye impinduka nyinshi kigasiga n’ingaruka zitandukanye ku Banyarwanda, Croix-Rouge y’u Rwanda yatekereje uburyo bwafasha mu kugera kuri buri wese, aho ari hose, mu gihe akeneye ubutabazi bwihutirwa.

Ni muri urwo rwego Croix Rouge y’u Rwanda ku nkunga na n’Igihugu cya Canada, Urugaga rw’Imiryango ya Croix Rouge na Croissant Rouge (IFRC) ndetse n’ Ikigo cy’Abanyamerika gishinzwe Iterambere (USAID), yashyizeho umurongo utishyurwa aho abantu bashobora guhamagara bagahabwa ubutabazi bw’ibanze, bagahabwa inyunganizi mu mitekerereze binyuze mu kubatega amatwi.

Igihe bakeneye uwo babwira ibyo bari kunyuramo bitaboroheye, kubarangira aho bakura inyunganizi cyangwa amakuru, mu gihe bashaka gutanga cyangwa kubaza amakuru ku biza cyangwa ibyorezo nka Coronavirus na Ebola, mu gihe hari utanyuzwe na serivisi yahawe na Croix Rouge y’u Rwanda mu mashami yayo anyuranye, n’ibindi.

Uwo murongo wa 21 00, buri wese ubu yahamagara akakirwa n’abakorerabushake ba Croix-Rouge y’u Rwanda bahora biteguye kwakirana urugwiro ubagana wese kandi bakora amasaha yose y’umunsi.

Iyi ni telefoni izajya yifashishwa mu gutanga amakuru ajyanye na Covid 19 cyangwa Ebola
Nyirimigabo Steven ni umwe mu bakoranabushake bahuguwe
Umuyobozi w'igenamigambi muri Croix Rouge y'u Rwanda Ndimbati Pierre Claver yavuze ko gushyiraho uyu murongo biri mu rwego rwo gutera ingabo mu bitugu gahunda za Leta
Aba bakoranabushake bazajya bafasha uhamagaye kumenya byinshi birebana na Covid-19
Abakoranabushake bazajya bafasha abaturage muri iki cyumba kiri ku cyicaro cya Croix Rouge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .