CP Kabera yaburiye abashobora kwihisha muri Covid-19 bagakwirakwiza ingengabitekerezo ya Jenoside

Yanditswe na Thamimu Hakizimana
Kuya 7 Mata 2021 saa 03:36
Yasuwe :
0 0

Umuvugizi wa Polisi y’u Rwanda, CP John Bosco Kabera, yasabye abanyarwanda kwirinda ibikorwa n’amagambo apfobya Jenoside yakorewe abatutsi mu 1994, cyane cyane abibeshya ko inzego z’umutekano zirimo Polisi zihugiye mu guhashya icyorezo cya Covid-19.

CP John Bosco Kabera yabivuze mu kiganiro yagiranye na Radiyo Rwanda kuri uyu wa 7 Mata 2021, umunsi u Rwanda n’Isi muri rusange batangiriyeho iminsi 100 yo kwibuka Jenoside yakorewe Abatutsi ku nshuro ya 27.

CP Kabera yavuze ko nubwo ibihe byo kwibuka Jenoside bigeze mu gihe isi ihanganye n’icyorezo cya Covid-19, bidakuraho inshingano za Polisi zo gukomeza gucunga umutekano w’Abanyarwanda.

Yaburiye abashobora kwibeshya ko Polisi ihugiye mu guhangana na Covid-19, bakishora mu guhakana no gupfobya Jenoside.

Ati “ Icyo twakwizeza abaturarwanda n’uko ibyo byose birakurikiranwa. Ntabwo duhugiye muri gusa ibi byo kureba no kugenzura uburyo amabwiriza yo kwirinda covid-19 yubahirizwa ariko n’umutekano muri rusange w’abaturage uratureba turawucunga nk’uko bisanzwe.”

Nyuma y’aho mu myaka yashize yashize hagiye hagaragara ibikorwa no gupfobya byaba mu magambo cyangwa mu bikorwa bashobora kwangiza inzibutso,gutema amatungo y’abarokotse n’ibindi,CP John Bosco Kabera,yaboneyeho gusaba abanyarwanda kubyirinda.

Ati “Turabwira abaturage kubyirinda. Byagiye bigaragara ariko byaramenyekanye birakurikiranwa. Nta mpamvu rero y’uko biba, icya mbere turabwira abaturage kubyirinda, nta mpamvu yabyo icya kabiri turababwira ko nibiba bikamenyekana biri bukurikiranwe ababigizemo uruhare bakabibazwa.”

Urwego rw’Ubugenzacyaha (RIB) rugaragaza ko imibare y’ibyaha by’Ingengabitekerezo ya Jenoside n’ibiyishamikiyeho mu myaka itatu ishize byagiye bigabanuka, aho mu mwaka wa 2018 byari 542, mu 2019 bikamanuka bikagera kuri 537 mu gihe mu mwaka ushize wa 2020 byari 530.

CP John Bosco Kabera yavuze ko Polisi iri maso ku bazagaragarwaho ibyaha by'ingengabitekerezo ya Jenoside n'ipfobya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .