CNLG yashimye intambwe imaze guterwa mu kurwanya ihakana n’ipfobya bya Jenoside

Yanditswe na Uwimana Abraham
Kuya 27 Mutarama 2021 saa 05:28
Yasuwe :
0 0

Umunyamabanga Nshingwabikorwa wa Komisiyo y’Igihugu yo Kurwanya Jenoside (CNLG), Dr Bizimana Jean Damascène, yavuze ko hishimirwa intambwe nini imaze guterwa mu kurwanya abapfobya n’abahakana Jenoside yakorewe Abatutsi baba abari mu gihugu cyangwa hanze, ariko agasanga hari ahakiri ibyuho hagikeneye kongerwamo imbaraga.

Ibi Dr Bizimana yabitangarije mu kiganiro cyahuje inzego zitandukanye hagamijwe kurebera hamwe icyakorwa mu kurushaho kurwanya ihakana rya Jenoside Yakorewe Abatutsi, cyabaye ku wa 26 Mutarama 2020 hifashishijwe ikoranabuhanga.

Iki kiganiro cyateguwe n’Umuryango Mpuzamahanga uharanira amahoro binyuze mu gukumira no kurwanya Jenoside, AEGIS Trust, ufatanyije n’Umuryango w’abahoze ari abanyeshuri barokotse Jenoside yakorewe Abatutsi, GAERG, cyari gifite insanganyamatsiko igira iti “Guhakana Jenoside: Inzitizi ikomeye ibuza isakara ry’ukuri kuri Jenoside yakorewe Abatutsi ikanashimangira ubuhezanguni n’inzangano.”

Dr Bizimana yavuze ko hari byinshi byagiye bikorwa haba ku rwego rw’igihugu ndetse no ku rwego mpuzamahanga bigamije gukumira abahakana n’abapfobya Jenoside, harimo nk’amategeko ahana ingengabitekerezo ya Jenoside yagiye ashyirwaho bigatuma benshi mu bo yari yarokamye bahanwa abandi bagaceceka.

Yagize ati “Hari byinshi byakozwe haba ku rwego rw’igihugu no ku rwego mpuzamahanga, harimo nk’itegeko rihana ingengabitekerezo ya Jenoside ryashyizweho mu 2003 rikavugururwa mu 2018, risobanura neza icyo ingengabitekerezo ya Jenoside ari cyo, kuburyo nta wagira icyo yitwaza igihe cyose yagaragarwaho n’ingengabitekerezo.”

Yongeyeho ati “Ku rwego mpuzamahanga naho hari intambwe yagiye iterwa n’ubwo hari na byinshi bigikeneye kongerwamo imbaraga, nko gushyiraho ruriya Rukiko Mpanabyaha rwashyiriweho u Rwanda ni intambwe ikomeye yatewe, ikindi hari abagiye bafatwa mu bagize uruhare muri Jenoside n’abagaragayeho ingengabitekerezo, bituma n’abandi bagira ubwoba.”

Dr Bizimana yavuze ko hari intambwe yagiye iterwa by’umwihariko n’Umuryango w’Abibumbye uko imyaka yagiye itambuka nyuma ya Jenoside Yakorewe Abatutsi, kuba ubwabyo yaremejwe ku rwego mpuzamahanga bituma ari abantu bake cyane bagitinyuka kuyihakana.

Yavuze ko hashyizweho inzibutso za Jenoside zikanitabwaho, zimwe zikajya mu murage w’isi hari n’izindi zabisabiwe, hakaba n’ibimenyetso byo kwibuka Jenoside yakorewe Abatutsi byagiye bishyirwa hirya no hino mu gihugu no hanze y’igihugu, bifasha abacitse ku icumu kubasha kunamira ababo bishwe.

Ikindi kandi ni uko abanditsi batandukanye bagiye bakangukira kwandika ukuri kuri Jenoside yakorewe Abatutsi, aho kuri ubu habarurwa ibitabo birenga 1000 bivuga kuri Jenoside yakorewe Abatutsi, byaba ibyanditswe n’abanyamahanga cyangwa Abanyarwanda.

N’ubwo hari intambwe ikomeye imaze guterwa mu guhashya abahakana n’abapfobya Jenoside yakorewe Abatutsi, Dr Bizimana yavuze ko hari ibikigaragara nk’ibibazo birimo nka “Mapping report”, yashinje u Rwanda kugira uruhare mu bwicanyi ndengakamere n’ihohoterwa ry’uburenganzira bw’ikiremwamuntu ryakorewe muri Repubulika Iharanira Demokarasi ya Congo, ndetse n’abakivuga ko habayeho Jenoside ebyiri.

Ati “Hari abakigenda bavuga ko ingabo za RPA zakoze ubwicanyi zikarasa abahutu mu nkambi ya Kibeho, nta raporo n’imwe igaragaza ko RPA yigeze itegura ubwicanyi.”

“Nyamara ahubwo RPA yakurikizaga amasezerano mpuzamahanga agenga intambara ndetse n’aho babaga bagiye kurasanira n’ingabo za Habyarimana, basabaga abasivile kuhava, ikindi inkambi ya Kibeho, byahishuwe ko yari yuzuyemo interahamwe zarafashe abaturage bugwate bakayifashisha barasa ku ngabo za RPA.”

Yavuze ko hari icyizere ko n’aho hakigaragara ibyuho by’abagifite ingengabitekerezo ya Jenoside baba abari mu Rwanda cyangwa hanze, n’abakoresha imbuga nkoranyambaga babaye benshi muri ibi bihe, nabo igihe kizagera bagakanirwa urubakwiye.

Umuyobozi w’ibikorwa muri AEGIS Trust, Kayirangwa Anita, yavuze ko nta muntu ukwiye guhagarara ngo arebere, ahubwo buri wese akwiye guhaguruka akarwanya ingengabitekerezo ya Jenoside.

Ati “Jenoside ni ikimenyetso cyo gutsindwa kwa muntu, guhakana ko yabaye ndetse no kurebera hakiri abayihakana, ni ikimenyetso cy’uko isi nta somo yasigiwe nayo. Wirebera rero.”

Perezida wa GAERG, Gatari Egide, yavuze ko hari icyizere ko abagifite ingengabitekerezo ya Jenoside bazatsindwa nta kabuza.

Ati “Icyari gikomeye ni uguhagarika Jenoside yakorewe Abatutsi mu 1994. Turashimira cyane ingabo za RPA ndetse n’undi wese wabigizemo uruhare, kuri ubu hari icyizere ko abagifite ingengabitekerezo ya Jenoside yakorewe Abatutsi n’irindi vangura, bazatsindwa burundu.”

Abagiye batanga ibitekerezo bose muri iyi nama bagarutse ku hakwiye gushyirwa imbaraga kugira ngo ihakana n’ipfobya rya Jenoside yakorewe Abatutsi riranduke burundu, harimo nko gushyira imbaraga mu burezi, abana bakigishwa amateka nyakuri ya Jenoside Yakorewe Abatutsi, ndetse hagashyirwaho n’amasomo ajyanye no gukumira no kurwanya Jenoside n’ingengabiterezo yayo.

Dr Bizimana Jean Damascène, yavuze ko hishimirwa intambwe nini imaze guterwa mu kurwanya abapfobya n’abahakana Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .