Centrafrique: Touadéra yatsinze amatora y’Umukuru w’Igihugu ahigitse 16 bari bahanganye

Yanditswe na Philbert Girinema
Kuya 4 Mutarama 2021 saa 09:25
Yasuwe :
0 0

Perezida Faustin-Archange Touadéra yatsinze amatora y’Umukuru w’Igihugu muri manda ya kabiri ahigitse abandi bakandida 16 barimo Catherine Samba-Panza wigeze kuyobora Centrafrique aho yagize amajwi 53.92%.

Touadéra w’imyaka 63 ni we wahabwaga amahirwe yo kongera gutorwa muri manda ye ya kabiri y’imyaka itanu ishobora kongerwa inshuro imwe.

Ni amatora yabaye mu bwoba bukomeye ko ashobora gukurikirwa n’imvururu na cyane ko François Bozizé wigeze kuba Perezida yashatse kuyaburizamo agahirika ubutegetsi nyuma y’uko yangiwe kwiyamamaza.

Kugira ngo aya matora abe, u Rwanda rwohereje ingabo zo mu mutwe wihariye kugira ngo zicunge umutekano, zari ku biro by’itora biri hirya no hino mu gihugu.

Mbere y’uko amajwi atangazwa, umutekano wari wakajijwe ku buryo bukomeye kuri Biro bya Komisiyo y’Igihugu y’Amatora, by’umwihariko hari abasirikare b’u Rwanda bagera kuri 40, ab’ingabo z’igihugu, FACA, n’abandi bari mu butumwa bw’amahoro muri Centrafrique.

Amajwi y’agateganyo yagombaga gutangazwa saa Kumi n’imwe ku isaha y’i Bangui ni ukuvuga saa Kumi n’ebyiri zo mu Rwanda gusa biza gutindaho amasaha atatu kuko saa 19:30 (20:30) aribwo Perezida wa Komisiyo y’Amatora yageze ku biro bye biri ahitwa Lakwanga.

Mu Mujyi wa Bangui nta moto n’imwe zemerewe kugenda kuri uyu munsi mu masaha y’ijoro mu kwirinda ko zateza akavuyo amajwi amaze gutangazwa.

Ubwitabire muri aya matora bwabaye ku kigero cya 76,2%. Touadéra yatsinze ku majwi 53. 92% akurikirwa na Anicet-George Dologuélé, utavuga rumwe n’ubutegetsi wagize amajwi 21%.

Urugendo rwa Perezida Touadéra muri politiki

Perezida Touadéra yinjiye muri politiki mu mwaka wa 2008 ubwo yahamagarwa n’uwari Perezida icyo gihe, François Bozizé, akamusaba kumubera Minisitiri w’Intebe.

Touadéra yagiriwe icyizere gikomeye nyuma y’impinduka zifatika yari amaze kuzana muri Kaminuza Nkuru ya Bangui, aho yakoze igihe kinini.

Uyu mugabo yatangije muri kaminuza ibikorwa bitandukanye, birimo ibijyanye n’ubucuruzi ku buryo Perezida François Bozizé, yamwizeye nk’uwamufasha kuzahura ubukungu bw’igihugu kiri mu bikennye cyane kurusha ibindi ku Isi.

Icyo cyizere kandi kinashingira ku bushobozi bw’uyu mugabo wamaze igice kinini cy’ubuzima bwe mu mashuri n’ubushakashatsi, dore ko afite impamyabushobozi z’ikirenga ebyiri mu bijyanye n’imibare, aho imwe yayikuye muri Kaminuza y’Ubumenyi n’Ikoranabuhanga ya Lille mu Bufaransa mu 1986 mu gihe indi yayikuye muri Kaminuza ya Yaoundé muri Cameroon mu 2004.

Usibye kwigisha muri Kaminuza ya Bangui yanizemo mu buto bwe, Touadéra yanayishinzwemo imirimo itandukanye irimo kuyibera Umuyobozi Wungirije mu 2004.

Mu gihe cye ari Minisitiri w’Intebe, Touadéra yakoze impinduka zitandukanye muri Goverinoma zirimo gushyiraho uburyo bunoze bw’ubucukuzi bw’amabuye y’agaciro icyo gihugu gifite ku bwinshi ndetse na gahunda zigamije gushakira urubyiruko imirimo.

Ibi byose ariko byashyizweho akadomo mu 2013, mbere gato y’uko Bozizé ahirikwa ku butegetsi. Uyu mugabo yamwirukanye muri Guverinoma mu rwego rwo kubahiriza amasezerano yari yagiranye n’imitwe yitwaje intwaro muri icyo gihugu, yavugaga ko ari yo izatoranya umuntu uzaba Minisitiri w’Intebe, mu rwego rwo gusaranganya ubutegetsi muri icyo gihugu cyasaritswe n’ibibazo by’umutekano muke kuva cyabona ubwigenge mu 1960.

Mu 2015, Touadéra yafashe icyemezo avuga ko aziyamamariza kuba Perezida mu matora yaje no kwegukana mu cyiciro cya kabiri cyayo ku bwiganze bw’amajwi 62%, atsinda Anicet-Georges Dologuele bari bahanganye wagize amajwi 37.29%, akaza no guhita yemera ko yatsinzwe.

Uyu mugabo yakunze kuvuga ko intego ye ya mbere ari ukongera kubaka amahoro arambye mu gihugu, gusa ibi ntibyamworoheye cyane cyane nyuma y’uko u Bufaransa bufashe umwanzuro ukakaye wo kugabanya ingabo zabwo muri Centrafrique, bigatuma imitwe y’inyeshyamba yongera kubura umutwe.

Perezida Touadéra ariko yakoze iyo bwabaga abasha kuziba icyo cyuho, binyuze mu kwifashisha ingabo z’Umuryango w’Abibumbye (MINUSCA) ziri muri icyo gihugu kuva mu 2009. Yanagiranye amasezerano mu bya gisirikare n’ibindi bihugu, birimo u Rwanda runafite inshingano zo kumurindira umutekano n’umuryango we. Aya masezerano kandi ni yo yahereweho u Rwanda rwohereza umutwe w’ingabo zidasanzwe muri icyo gihugu, kugira ngo ukumire ibikorwa by’imitwe y’inyeshyamba yari imaze kwihuriza hamwe igamije guhungabanya umutekano muri ibi bihe by’amatora.

Muri manda ya kabiri, Perezida Touadéra avuga ko azakomeza gushyigikira ibikorwa by’amahoro, kugira ngo bizabe umusingi w’iterambere ry’igihugu gifite abaturage 70% babarirwa munsi y’umurongo w’ubukene.

Perezida Faustin-Archange Touadéra yatsinze amatora y’Umukuru w’Igihugu muri Centrafrique muri manda ya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .