Burundi: Mu gace kegeranye na Tanzania habonetse abantu 79 banduye Coronavirus

Yanditswe na Akayezu Jean de Dieu
Kuya 15 Mutarama 2021 saa 10:53
Yasuwe :
0 0

Inzego zishinzwe ubuzima mu Ntara ya Makamba mu Majyepfo y’u Burundi ahari umupaka wabwo na Tanzania zatangaje ko habonetse abantu 79 banduye Coronavirus.

Aba bantu bose basanganywe Coronavirus barimo abanyeshuri, abarimu babo n’abandi baturage babonetse muri Komini za Mabanda, Nyanza Lac na Vugizo.

Tanzania n’u Burundi ni bimwe mu bihugu byo muri Afurika y’Uburasirazuba byakunze kumvikana bikerensa Coronavirus dore ko byombi nta ngamba zikakaye byigeze bishyiraho hagamijwe gukumira ikwirakwira ry’iki cyorezo.

Ubwandu bwa Coronavirus mu Burundi bukomeje gutumbagira dore ko nko ku wa 13 Mutarama 2021, imibare yatangajwe yagaragaje ko mu bipimo 1242 byafashwe, abantu 41 banduye Coronavirus, ni ukuvuga abangana na 3,3%.

Muri abo 41 hari harimo 35 basanzwe imbere mu gihugu [bangana na 85, 37 %], hakabamo abandi batandatu [bangana na 14,63 %], basanganywe iki cyorezo bavuye mu mahanga.

Muri rusange kuri iyo tariki byagaragaye ko mu masaha 48 yari ashize abantu bashya 70 banduye Coronavirus barimo 64 basanzwe imbere mu gihugu mu gihe abandi batandatu ari abayizanye bavuye hanze.

Icyorezo cya COVID-19 cyageze mu Burundi muri Mata 2020, Minisiteri y’Ubuzima muri icyo gihugu ivuga ko kuva icyo gihe abantu bamaze kwandura barenga 1000 mu gihe abamaze guhitanwa n’iki cyorezo ari babiri.

Leta y’u Burundi iherutse gushyiraho ingamba zikakaye zo kwirinda ikwirakwira rya Coronavirus aho nk’imipaka yo mu mazi no ku butaka n’utubyiniro byafunzwe, mu gihe abinjira mu gihugu bakoresheje indege babanza gufatwa ibipimo bya COVID-19, bakanashyirwa mu kato k’iminsi irindwi.

Muri iki gihugu kandi kuri ubu kwambara agapfukamunwa byagizwe itegeko ndetse nko mu Mujyi wa Bujumbura, umuyobozi wawo aherutse kuvuga ko ntawe uzongera guhabwa serivisi atakambaye.

Mu bihe byashize u Burundi bwagendaga biguru ntege mu gushyiraho no kubahiriza ingamba zo kwirinda Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .