00:00:00 IGIHE NETWORK KN KINYARWANDA EN ENGLISH FR FRANCAIS

Bernard Maingain yavuye imuzi ibya Jenoside inuganugwa muri RDC n’amakosa ya Leta muri ibi bibazo

Yanditswe na IGIHE
Kuya 2 Mutarama 2023 saa 10:53
Yasuwe :

Impuruza zikomeje kuba zose ku bwicanyi buri gukorerwa Abanye-Congo b’Abatutsi, ndetse abasesenguzi bakomeza kugaragaza ko bishobora kuvamo Jenoside, mu gihe nta cyaba gikozwe mu kubikumira.

Ni ibibazo nyamara bitavutse ejo mu gitondo kuko hari impamvu zirimo kurebera k’ubuyobozi kwatumye bifata indi ntera, ku buryo abaturage bamwe bumva ko bashobora gukora ibyo bishakiye nta wubibaryoza.

Ni ibintu byafashe idi ntera nyuma ya Jenoside yakorewe Abatutsi mu 1994.

Umuyamategeko w’Umubiligi, Bernard Maingain yagaragaje uburyo imvugo zihembera urwango ziyubatse muri RDC, kugeza ubwo ubu ibyago bya Jenoside biri hejuru kurusha ikindi gihe. Yabivuze mu kiganiro yagiranye na Afrikarabia ku wa 30 Ukuboza 2022.

Ibi ni bimwe mu bibazo Maingain yabajijwe n’ibisubizo yatanze.

Jean-François DUPAQUIER: Wagize uruhare mu kiganiro n‘abanyamakuru ku wa 19 Ukuboza, aho wagarutse ku mvugo z’urwango "rushingiye ku moko" zituruka ku bayobozi bakuru cyangwa abanye-Congo bavuga rikumvikana ku mbuga koranyambaga, bahamagarira gutsemba Abatutsi muri Congo cyangwa mu Rwanda. Ni ikibazo umaze imyaka myinshi ugaragaza. Twaba turimo kugana kuri Jenoside yeruye ikorerwa Abatutsi b’abanye-congo, nk’uko byagenze mu Rwanda mu 1994?

Bernard MAINGAIN: Mu myaka itatu ishize negerewe n’itsinda ry’Abanyamulenge [Abanye-cogo b’aborozi bavuga Ikinyarwanda bo mu misozi miremire ya Kivu y’Amajyepfo]. Muri Gicurasi, Abatutsi bo muri Kivu y’Amajyaruguru bafite amateka maremare hagati ya Goma na Rutshuru, ariko bahozwa ku nkeke ko ari Abatutsi, nabo baje kunsaba kubavugira kubera ibintu bimaze kubabana bibi kurushaho: benshi mu banyamuryango babo bamaze kwibasirwa muri Goma, Kinshasa …

Ibi byaha byose ni ingaruka z’imvugo zihembera urwango rushigiye ku moko zikomeje kwiyongera muri Kivu y’Amajyepfo n’amajyaruguru.

Mu myaka ishize, twakomeje kwamagana izi mvugo z’urwango ariko ntitwabasha kuzihagarika. Mu kiganiro n’abanyamakuru mu 2021, nagaragaje ko izi mvugo zisa n’izagaragaye mu Rwanda mbere ya Jenoside yakorewe Abatutsi mu 1994.

Usanga amaganmbo wagarutseho mu kiganiro ku wa 19 Ukuboza ahura neza n’ayatangazwaga na za Kangura cyangwa RTLM mu Rwanda mbere ya Jenoside yakorewe Abatutsi?

Uburyo izi mvugo z’ivanguramoko zihuramo buteye ubwoba, ku buryo ziteye mu buryo bumwe, n’ibindi. Dushobora kubona neza inkomoko y’ibi byose…

Twavuga ko hari isano y’ubwiyongere bw’izi mvugo z’urwango no kubura imirwano ndetse no gufata uduce twinshi kwa M23?

Imitwe yitwaje intwaro ntiba igendera ku mahame ya za Leta zemewe, bityo nazo bikaba ngombwa ko zirwanaho zikoresheje imbaraga ariko na bo bagomba kubikora bakurikije amategeko.

Muri za Kivu, ibyo byose ntabwo byubahirijwe mu myaka myishi n’impande zitandukanye. Imitwe myinshi yitwaje intwaro ishingwa mu buryo bwo kwirwanaho cyangwa se ikaba ikora ibyaha.

M23 na yo ntiri kure y’ibyo cyane, ariko twe dufite inshingano zo gusesengura hatabayeho kugwa mu mutego, kubera ko isesengura ryimbitse niryo rituma ubasha gufata icyemezo gikwiye.

Reka nsoreze ku kintu gikomeye: ahantu hari ibyago by’uko hashobora kuba jenoside, ni inshingano z’impande zose bireba guharanira ko uruhande rwibasirwa rurindiwe umutekano.

Ntabwo nshaka kukwibutsa inshingano ziteganywa mu masezerano mpuzamahanga yo kurwanya Jenoside n’inshingano zibazwa za leta iyo zinaniwe kubikora.

Ikiranga akarere k’ibiyaga bigari ni uko nyuma ya 1994, umuryango mpuzamahanga wananiwe gushyiraho gahunda nakwita iyo kurandura ibitekerezo by’aba-Nazi (denazification).

Nta kintu na kimwe wagereranya n’ibyakozwe n‘Abanyamerika n’Abongereza nyuma y’ihirima rya Hitler n’amatwara ye mu 1945?

Nta na kimwe, nta n’intangiriro z’uburyo bwo kwigisha kurwanya imvugo ziganisha ku kwanga Abatutsi ku rwgo mpuzamahanga.

Niba mu Rwanda ubuyobozi bushya bugizwe n’abantu bafite imiryango yatsembwe bwarakoze iyo gahunda, benshi mu bahungiye mu mahanga - barimo abanagize uruhare muri Jenoside - ntabwo bakurikiranwe.

Mu nkambi y’impunzi muri Zaire (RDC y’ubu), ubuyobozi bwateguye bukanashyira mu bikorwa umugambi wa Jenoside bwakomeje ingengabitekerezo yabo yo kwanga Abatutsi, imiryango y’abagiraneza n’umuryango mpuzamahanga barebera.

Njye ubwanjye nakurikiranye ibitero by’ubwicanyi byagabwaga biturutse mu nkambi za UNHCR bikibasira abaturage bo mu majyaruguru y’u Rwanda n’ubwicanyi muri za Masisi, ndetse muri icyo gihe aborozi b’i Masisi bangishije inama ku kibazo cy’inshingano za UNHCR ku byabaga.

Nyamara nubwo ibyo byose byabaye, ibihumbi by’impunzi z’abanyarwanda baje kwakirwa mu Rwanda.

Muri icyo gihe kandi, ibihugu byo mu burengerazuba bw’isi byakiriye abantu benshi bakekwaho uruhare muri jenoside, cyane cyane mu Bubiligi n’u Bufaransa, aho amashyaka ya gikirisitu aharanira demokarasi n’aba socialiste bo ku bwa Mitterand, kimwe n’abari bashyigikiye inyungu z’u Bufaransa muri Afurika, bari bafite imikoranire n’abagabo n’abagore bagize uruhare muri Jenoside.

Ni ibyo byose byahumye amaso abantu ku kaga kari kamaze kuba.

Mu Budage, kurandura amatwara y’aba-Nazi byagize ingaruka zihuse ku bantu benshi ba hafi cyangwa kure, bari bafite imikoranire na Hitler.

Ni gute abantu bose batabona cyangwa bakihanganira ibintu nk’ibi? Nyuma, abana babo bazamuye amajwi nk’abadafite icyo babwiwe n’ibyo ababyeyi babo cyangwa na sekuruza bakoze, bakabyirengagiza bashaka gukomeza ibyifuzo byabo mu nyungu za politiki.

Yaba abana cyagwa abuzukuru b’abajenosideri bari mu buhungiro, cyangwa abavuga ko bakomeye mu Burayi, nta wigeze agira icyo ahinyuza. Tekereza nka Védrine mu Bufaransa, Frank Swaelen cyangwa Jean-Luc Dehaene mu Bubiligi, bagize umutinamana wa nyawo nubwo baba barakoze amakosa.

Uku guhakana kwafashije cyane ibikorwa by’urwango binatiza umurindi imvugo z’urwango ku batutsi. Umuntu ashobora kureba ku bitangazwa na zimwe mu mbuga zo mu Bubiligi ntashaka kuvuga amazina… cyangwa ibitabo by’abanyarwanda bimitse ivangura ku batutsi bisohokera mu Bufaransa. Mu buryo bweruye kurusha muri RDC, usanga baba bakwirakwiza ingegabitekerezo yo "kurangiza akazi katangiye."

Usanga ijambo "Nazis" rihura neza n’abajenosideri bo mu Rwanda bihishahisha n’ababiba urwango ndetse n’ababashyigikiye?

Gukoresha ijambo rikwiye mu byabaye kuri njye nsanga ari ngombwa mu rugendo rujya mbere. Abayarwanda bose baba bari bari mu nzego za Leta, igisirikare, imitwe yitwaje intwaro n’abandi, bagize uruhare, n’umutima wabo wose, muri Jenoside yakorewe Abatutsi, bagomba gufatwa nk’Aba-Nazi.

Mu gitabo ’The Last Man’, Primo Levi yanditse ati "Mu rwango rw’Aba-Nazi nta kintu gisanzwe na kimwe cyarimo: ni urwango rutaturimo, rudasanzwe mu muntu. Ni byo u Rwanda rwabonye mu 1994.”

Nanone, gukoresha iri jambo mu gusobanura umugambi wo gutsemba Abatutsi ntabwo ari bishya. Umunyamateka Jean-Pierre Chrétien yabanje gukoresha imvugo "tropical Nazism" mu 1994, ashaka kuvuga Jenoside yakorewe Abatutsi mu Rwanda. Ni kimwe n’abakomeza guhembera iryo vanguramoko uyu munsi. Ntekereza ko wanabyanditseho muri Afrikarabia mu myaka ibiri ishize.

Kubera iki ingengabitekerezo ya Jenoside itarangiranye n’imyaka uko ihita indi igataha, uko abajenosideri bagenda batatana?

Théoneste Bagosora, umucurabwenge wa Jenoside yakorewe Abatutsi, umwe mu bagejejwe imbere y’urukiko mpuzamahanga mpanabyaha rwashyiriweho u Rwanda, mu nyandiko zitandukanye yagarutse kuri iyo gahunda ndetse n’ubwo yari mu rubanza.

Muri make, yaravuze ati "twatsinzwe intambara mu Rwanda ariko tuzagaruka ku butegetsi vuba cyangwa kera, kubera ko ni ko amateka ateye.”

Ni iyo ngengabitekerezo duhanganye na yo uyu munsi. Isura y’abahezanguni b’uyu munsi izanguma mu mutwe igihe kirekire, barimo gusakuriza ku mupaka wa Grande Barriere i Goma ku wa 15 Kamena 2022, ko bazambuka bakarangiza jenoside mu Rwanda… ni gute aya magambo yavugwa uyu munsi?

Muri Congo, umugambi wo gutsemba abatutsi ntabwo wigeze uva mu mitwe y’abajenosideri babashije kuguma muri icyo gihugu bakivanga n’abaturage basanzwe.

Ni muri abo bantu ingengabitekerezo ibasha gukwirakwira no mu bandi, mu gihe mu Burayi bagenzi babo baba bavuga ko uburenganzira bwa muntu burimo guhonyorwa.

Akarere k’ibiyaga bigari kugarijwe n’ingegabitekerezo yagejeje ku byabaye mu Rwanda mu 1994.

Bikwiye kwibukwa ko iyo ngengabitekerezo yatangiye gucengezwa mu Rwanda kuva mu 1959: Ngo abatutsi ni ubwoko bubi, igisubizo cyabyo ni ukubarimbura uhereye ku mwana ukageza ku musaza.

Bijyanye n’umwaduko w’imbuga nkoranyambaga, iyo ngengabitekerezo igenda ibyutswa, ndetse ubu ikomeje gukura muri RDC, ariko na kure yaho, imvugo z’urwango ushobora kuzisanga mu Bubiligi, u Bufaransa, Canada, u Bwongereza na Leta zunze ubumwe za Amerika […]

Mu misozi miremire ya Kivu y’Amajyepfo, mu binyejana byinshi, Abanyamulenge bakungahaye cyane ku bworozi, bakanavuga ururimi rujya gusa n’Ikinyarwanda.

Na mbere ya 1994, aba baturage bagaragazwaga na Kinshasa nk’abibasirwa, bagakorerwa ivangura, ubugizi bwa nabi no kudafatwa nk’Abanye-Congo nyabo.

Ibyo byabangamiye gahunda ya “ntibizasubire ukundi”, yari ikwiye kuba mu izingiro ry’inama z’abayobozi n’abaturage.

Ibyo kandi bikajyana n’ibivugwa ko abanyamadini batatiye inshingano zabo bakazisimbuza izo guhindura imyumvire y’abaturage.

Kutibuka binakomeje uyu munsi mu barimu muri kaminuza n’abashakashatsi mu Burayi, nk’urugero muri Kaminuza ya Antwerp.

Ushaka kuvuga aba ba Bernard Lugan mu Bufaransa na Filip Reyntjens mu Bubiligi, mvuze bake mu bavuga cyane?

Ntabwo nshishikajwe n’aba bantu, ariko tugomba kwamagana imyanda yabo, idakwiye guhabwa agaciro.

Mu burengerazuba bw’Isi, abantu bagifite ibitekerezo byo gutwerera Afurika ibibi byose, bifite umuhate wo gutuma abantu batumva uruhare mpuzamahanga ruri muri Jenoside. Muri RDC, bafite ijambo rinini ku banyamateka b’abanye-Congo.

Ntabwo njya mpa umwanya ibyo bintu. Hari abantu b’abahanga bakomeye mu Rwanda, RDC, u Burundi, muri Uganda…

Ariko ibikorwa byo kwibasira Abatutsi muri Congo byatangiye mbere ya Jenoside yakorewe Abatutsi mu Rwanda…

Kugira ngo Jeoside ibeho bifata igihe kirekire n’ibikorwa byinshi by’ubusazi. Ni kimwe no mu Karere k’ibiyaga bigari. Politiki y’ivangura ni yo yabiharuriye inzira byose.

Ubwo abajenosideri bahungiraga muri Congo, bahise bagaba ibitero ku banyamukenge n’abatutsi b’aborozi, kandi ibyo ntibyigeze bihagarikwa.

Abasirikare ba Congo, Maï-Maï, Red-Tabara n’abandi, hamwe na FDLR, bakomeje ibitero byo gusahura abantu bafatwa nk’Abatutsi, bakabirukana mu byabo cyangwa bakabica.

Kugeza abajenosideri mu Rukiko mpuzamahanga cyangwa izindi nkiko byaba bitarafashije mu kwigisha abaturage?

Ntabwo ari ko nabivuga. Hari ukuri mu buryo butatu, ukuri ko mu itangazamakuru, ukuri ko mu mateka n’ukuri ko mu rukiko. Nta kuri na kumwe gukwiye kwirengagizwa.

Nk’umunyamategeko navuga ko ukuri ko mu butabera kudahagije. Ku bijyanye n’aba-Nazi, twari dukeneye imanza z’i Nuremberg na Frankfurt.

Imanza za Barbie i Lyon mu Bufaransa rwari rukenewe, na nyuma y’imyaka 42 Hitler avuyeho. Biracyakeneye kwinjira mu bitekerezo kugira ngo tubashe gusenya uburyo Jenoside yubakwamo.

Ntabwo ariko ariko byagenze ku baburaniye i Arusha, nyuma y’uko Ubushinjacyaha bw’Urukiko mpuzamahanga mpanabyaha butabashije kwemeza mu buryo budasubirwaho icyaha cy’ubugambayi mu gukora Jeoside.”

Mu Rwanda, ntekereza ko inkiko Gacaca zuzuje izi nshingano.
Nubwo hari ibitaragenze neza cyane, abakoze ibyaha n’ababikorewe bagaragaje ukuri kw’ibyabaye, ku buryo byasabaga ubudaheranwa. Uwo ni umusanzu w’ubutabera.

Ariko mu bihugu by’abaturanyi, kuva mu 1994 kugeza uyu munsi, ni hehe abajenosideri baciriwe imanza? Ku babigizemo uruhare? Nihe abakoresha imvugo z’urwango baciriwe imanza? Nta na hamwe.

Kubera iki njye na bagenzi banjye tuzamuye ikibazo cy’ababiba urwango? Kubera ko guhana ababigizemo uruhare byari kuba umusingi wo kubaka amahoro mu karere kose.

Ni iyihe sano iri hagati y’ibi no kubura imirwano kwa M23?

Nk’umunyamategeko sinshaka kwivanga mu mpaka ziyerekeye kuko nshaka gukomeza kugendera mu mbago z’amategeko ku kibazo wambajije.

Ntekereza ko iri tsinda rimeze nka Janus. Abantu bose barinenga ko ryafashe intwaro nk’indi mitwe yose y’inyeshyamba mu karere, ariko bigatandukanira ku rwego rwabyo.

Ku rundi ruhande, hakenewe cyane kurindwa muri Minembwe na Masisi, nabyo binasobanura impamvu iyi mitwe itandukanye muri Kivu zombi, ifatwa nk’ubuhungiro bw’amatsinda y’abantu.

Ntabwo bihagije kurandura imitwe yitwaje intwaro, binakenewe kubahiriza amategeko, kurwanya ruswa, kuzamura imibereho y’abaturage ... Muri make, gutangiza uruziga rwa serivisi zihabwa abaturage mu nzego za Leta. Muri urwo rwego, kubahiriza amategeko ni ryo ishingiro ryo kubaka igihugu.

-Buri wese yasomye isesengura rya Madamu Alice Wairimu Nderitu, umujyanama wihariye ku kurwanya Jenoside. Ni irihe somo twavanamo?

Narabishimye. Muri raporo ye iherutse yagejeje no ku Munyamabanga Mukuru, ntabwo yashyizemo za nzitwazo zose baba Abatutsi, Abanyarwanda cyangwa Perezida Kagame …
Madamu Wairimu Nderitu yavuze ko ubugizi bwa nabi turi kubona ari umusaruro wa sosiyete yangiritse ndetse n’igihamya cy’uburyo ibyatumye Jenoside iba mu myaka ishize, bigikomeje […]

Yasabye ko igisubizo ku makimbirane ya RDC gisaba gushakira umuti ibyatumye kibaho, kandi hakagemderwa ku masomo yavuye mu byabaye kera.

Aba banyamakuru uvuze ni impirimbanyi, ariko amajwi yabo asa n’atumvikana cyane. N’umuryango uzwi nka Lutte pour le Changement (Lucha) [12], uvuga ko uharanira uburenganzira bwa muntu unazwi cyane mu itangazamakuru ukwirakwiza imvugo z’urwango.

Ugize neza kuzamura iki kibazo. Lucha yamamaye kubera ubukangurambaga bwayo mu bijyanye n’amatora.

Njye ubwanjye nakoranye n’abagize Lucha mu 2008, dukora iperereza ku baba baragize uruhare mu rupfu rwa Albert Prigogine, tuza kubona ibihamya bitunga agatoki abantu ba hafi ba Guverineri usigaye ari Minisitiri i Kinshasa. Icyo gihe twarakoranaga cyane.

Narumiwe vuba aha ubwo nabonaga benshi mu bagize Lucha bakwirakwiza imvugo z’urwango. Mfite na video yafashwe tariki 15 Kamena 2022 i Goma aho abambari ba Lucha bashishikarizaga abaturage kuririmba indirimbo nk’izaririmbwaga n’Interahamwe mbere ya Jenoside.

Uyu Muryango ukorana bya hafi na Dr Denis Mukwege, uvugwa muri raporo iherutse ya Loni ushinjwa gukwirakwiza imvugo z’urwango ndetse bamwe muri bo bagize uruhare mu gusagarira ibiro bya Monusco.

Nongeye gutungurwa ubwo namenyaga ko umuryango utegamiye kuri Leta ukorera i Bruxelles unahabwa inkunga ziturutse mu muryango w’Ubumwe bw’u Burayi ushyigikiye undi muryango ukwirakwiza urwango. Hari ikibazo gikomeye, aho umuryango wifata nk’uharanira uburenganzira bwa muntu hano i Bruxelles uhinduka umuvugizi ukarenga ku mategeko, ugashyigikikira ku manywa y’ihangu abakwirakwiza imvugo z’urwango bakabaye babihanirwa i Goma na Bukavu.

Reka noneho tuvuge kuri raporo iherutse ya Loni, nk’umunyametegeko wayibonye ute?

Iyi raporo y’impuguke za Loni ni iyo gusomwa umuntu yitonze. Igaragaza ubufatanye bw’ingabo za Leta ya Congo, Mai Mai n’indi mitwe bikorana irimo FDLR igizwe n’abagize uruhare muri Jenoside, bose bagakorana barwanya M23. Iri huriro ryavutse muri Gicurasi umwaka ushize mu nama yabereye i Pinga.

Icyo mfitiye impungenge ntabwo ari FARDC ishaka guharanira ubusugire bw’igihugu ahubwo ubufatanye bwayo n’imitwe yitwaje intwaro yahinduye kurimbura Abatutsi nk’akazi. Ibaze imitwe yagize uruhare mu byaba byibasiye inyokomuntu iri gukorana n’ingabo za Leta. Amateka ari kwisubiramo. Mu Rwanda Interahamwe zafatanyije na FAR, Imbonerakure mu Burundi none hagezweho FARDC. Ikigamijwe aho hose ni Umututsi ariko abanyamakuru bararuciye bararumira! Ese ibi biri kuba byahuzwa gute n’amateka ya vuba aha.

Ikinyamakuru The Africa Intelligence, kimwe mu byabonye iyi raporo mbere kivuga ko ihuriro ’Coalition Patriotique’ kubaho kwabyo kwagizwemo uruhare na General Guidon Shimiray Mwiza washinze umutwe NDC mu 2014

Uyu avugwaho gukora ibyaha bitandukanye byanatumye afatirwa ibihano na Loni. Hari impapuro zo kumuta muri yombi zashyizweho mu 2019. Havugwamo na ba ’colonels’ Silencieux na Potifaro ba FDLR ndetse na colonel Salomon Tokolonga wa FARDC .
Raporo ya Loni ivuga ko uwigize General Kasereka Kabido w’umutwe FPP-AP ukorera Lubero muri Kivu y’Amajyaruguru yiyunze kuri iri huriro muri Nyakanga umwaka ushize. Mwibuke ko uyu ari umwe ku bayobozi bakomeye ba Mai Mai. None se ishingwa ry’iri huriro Lucha na Dr Mukwege baba batarabimenye?

Dusubiye muri raporo ya Loni, havugwamo ko Mai Mai yiyemeje gutanga ingabo 600 zijya gufasha iza leta, ibintu raporo ivuga ko biteye inkeke. Ikindi ni uko RDC yakuriweho ibihano ku kugura intwaro, bisabwe n’u Bufaransa. Perezida Tshisekedi yavuze ko kujya mu gisirikare bigiye kuba itegeko ku rubyiruko rwose. Ntabwo ibi bintu bigiye gutuma RDC irushaho kuba akavugo?

Ntabwo nshaka kwivanga mu mahitamo yafashwe n’abayobozi bo mu karere ku bijyanye n’imutekano. Ikibazo mfite ni amategeko. Tuzi ko kuvanga inyeshyamba n’ingabo zisanzwe cyangwa abapolisi ari isoko y’ibindi bibazo bikomeye.

Ingabo zihembwa neza, zifashwe neza ntabwo zitwara nabi. Abacanshuro baba abo mu gihugu imbere cyangwa abo mu mahanga ntabwo baba bafite indangagaciro z’ingabo zisanzwe cyangwa icyerecyezo kimwe. Turabibona ku nyeshyamba z’imbere mu gihugu zijandika mu byaha byibasiye abaturage.

Na FARDC ikeneye indi myitozo ibaha kumva neza inshingano zabo ku gihugu ariko kugira ngo bibeho, bakeneye kubanza guhembwa neza, ubujura bukorwa ku mishahara yabo bugahagarara.

Raporo y’impuguke za Loni yanditswe mbere y’ibi byose. Yagaragaje uburyo FARDC ikwirakwiza intwaro ku mitwe yitwaje intwaro harimo na FDLR. Ese twaba twumva neza ibi bintu bifite ku mutekano w’akarere?

Kuri wowe umaze igihe umenyereye akarere k’ibiyaga bigari, byaba ari byo kuvuga ko hashobora kuba Jenoside ikorewe Abatutsi Abatutsi muri Congo?

Nk’umuntu wabonye Jenoside mu Rwanda mu 1994, niyemeje kuyirwanya n’imbaraga zanjye zose. Mbikorera guha agaciro abari bashyize imbere kandi bafite icyizere cyo kubaka u Rwanda rutarangwamo urwango, ariko imbaraga z’urwango akaba arizo zitsinda. Nibwo nafashe umwanzuro wo kusa icyo kivi n’inshuti zanjye mu gihe tukiriho.

Uru ni urugamba rutazarwanwa n’igisekuru kimwe gusa nkuko byagenze ku kurandura Ubucakara , apartheid, irondabwoko n’ibindi.

Abanyamategeko, abanyamakuru, abanyamateka, abanyapolitiki, tugomba kugira uruhare mu kongera gushyira Isi ku murongo. Abazadukomokaho bazakomeza urwo rugendo. Nkuko byagenze ku bucakara na apartheid, intambwe ni nto ariko iragaragara. Gushyira iherezo ku bwicanyi bushingiye ku moko, guhashya urwango niryo terambere ryacu.
Uyu munsi amahitamo yacu akwiriye kuba iryo iterambere, si ikibazo cya Congo cyangwa u Rwanda, icy’abahutu cyangwa Abatutsi , ni ikibazo kireba ikiremwamuntu.

- Hashze iminsi itangazamakuru rishyira imbaraga ku bwicanyi bwiswe ubwa "Kishishe", ubu bwicanyi wowe ubusobanura ute?

Icya mbere, ndi umuntu ugendera ku bimenyetso, niko ununyamategeko akora. Ikindi mu bihe by’intambara, icengezamatwara ni ikintu gikomeye.
Ngira ngo muribuka ibya Timisoara. Muri Romania ubwo ubutegetsi bwari buri guhirima, isi yose yabwiwe iby’ubwicanyi bwabereye Timisoara uretse umunyamakuru umwe wagiye aho byabereye akabura imva rusange. Uyu munyamakuru w’umunyamurava ni Colette Braeckman.

Ndibuka hari n’ubundi bwicanyi byavuzwe ko bwabereye Kipupu muri RDC mu 2020 nabwo bikorwa nta n’umwe wageze aho byabereye.

Lucha irangajwe imbere na Dr Mukwege batangaje ko hapfuye amagana. Hari iperereza ryakozwe n’inshuti zanjye ryagaragaje ko hapfuye abari hagati ya barindwi n’icumi.
Ni ikinyuranyo gikomeye hagati y’ibyavuzwe mu itangazamakuru n’ibyo Monusco yagaragaje. Muri make rero, dukwiriye kuba maso.

Ku byerekeye Kishishe, mbona dukwiriye gushingira ku bimenyetso tukabona gufata umwanzuro [...] Nshyigikiye iperereza rihuriweho, humvwa impande zitandukanye.

- None kuki itangazamakuru rimaze iminsi rigaragaza abatutsi nk’abicanyi kabombo bityo ko nta kibazo bafite byo bivugwa nta perereza ryabanje gukorwa?

Njye ndi umunyamategeko w’umwuga. Akazi k’umunyamategeko ni ukwibutsa umukiliya we iyubahirizwa ry’amategeko bagafata umwanzuro .

Muri sosiyete zose, hari abantu batubahiriza amategeko ku rwego runaka kandi aho ariho hose haba inzirakarengane z’uku kurenga ku mategeko. Jenoside zose zibanzirizwa no kwerekana ko abantu runaka ari babi[...] ni ukuvuga ngo aba bantu mubadukize, ni intangiriro y’ubwicanyi. Kuvuga ko Abatutsi ari babi ni uguha umugisha ikiza gukurikiraho cyo kwirwanaho "muhitane atarampitana" maze kwicana bigahabwa intebe.

Nterwa umujinya n’abantu bamwe mu karere k’ibiyaga bigari bakomeje gukomeza ikibazo aho kucyoroshya kandi bakiyita inzobere.

Hari abavuva rikijyana i Paris bamaganye bivuye inyuma uburyo igihugu cyabo gishyirwa mu majwi ku ruhare rwacyo muri Jenoside yakorewe Abatutsi bari kwihimura bifashishije ikibazo cya Congo. Ni nako bimeze ku banyapolitiki bamwe b’aba-Flammands mu Bubiligi.

Ni ngombwa ko buri cyumweru hasohoka inkuru i Paris n’i Bruxelles zivuga ko Loni yemeje ko u Rwanda rushyigikiye umutwe witwaje intwaro muri RDC? Bwo se byaba aribyo, kuko nta gereranya ngo ibintu bivugwe uko biri? Kujya aho ibintu bibera bibananiza iki? Kuki batabaza impamvu iyi mitwe itaranduka n’amafaranga asukwa buri mwaka? Kuki Abanyamulenge aribo bitwa abanyamahanga gusa muri Congo bahamaze imyaka isaga 300?

[...] ubu hakenewe itangazamakuru rifasha rigakora Icukumbura rifatika, ni ukuvuga abantu bafite ubushobozi bwo gusesengura ibimenyetso bihari aho kugarukira ku mbwirwaruhame z’icengezamatwara.

Abanyamakuru bishima hejuru y’akaga ka Congo cyangwa u Rwanda basubiramo inkuru z’uko uruhande runaka ari rwiza abandi ari babi, ntacyo bafasha.

Umusanzu wawe ni uwuhe?

Njye mparanira ibiganiro n’ifatwa ry’imyanzuro. Umunyamategeko agira inshingano ebyiri, iyo kunga n’iyo guharanira ko amategeko yubahirizwa. Niba abonye abakwirakwiza imvugo z’urwango agasaba ko babiryozwa mu mategeko. Icyakora dushinzwe no guharanira ko habaho ibiganiro hagati y’impande ebyiri kugira ngo abahejwe babyisangemo.

Mfatanyije na bagenzi banjye mu misozi miremire ya Minembwe, twasabye ko habaho ibiganiro, bigera mu giturage ku mutware umwe tujya ku wundi kugira ngo dufatanye gukemura ibibazo.

[...] turacyafite akazi kenshi ngo ibiganiro bigerweho, tuvuge duti "Mwebwe Babembe, mwe Bafulero, mwe Bashi, Banande namwe Banyamulenge, mwese mukwiriye gufatanya gushaka amahoro mu karere kanyu. Ntaho ibi bikwiriye guhurira n’abacengezamatwara. Ni umurimo ukwiriye uri gukorwa. Kugira ngo bitange unusaruro, hakenewe igisirikare na Polisi batangiritse bafite umuhate wo gukorera abaturage. Hanyuma ubucamanza nabwo bugaharanira ko ntawe Ukwiriye gucika ubutabera.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .