Banki Nkuru ya Uganda yashinjwe amakosa mu ifungwa rya banki zirindwi

Yanditswe na IGIHE
Kuya 13 Nzeri 2018 saa 05:24
Yasuwe :
0 0

Igenzura ryakozwe n’Umugenzuzi Mukuru w’Imari ya Leta ryagaragaje intege nke mu miyoborere ya Banki Nkuru ya Uganda, aho abayobozi bayo bavugwaho amakosa mu gufunga banki zigera muri zirindwi.

Muri iyo raporo yashyikirijwe Inteko Ishinga Amategeko, Umugenzuzi Mukuru w’Imari ya Leta, John Muwanga yagaragaje ko nta mabwiriza agaragaza ibyakurikijwe mu gufunga banki zirimo Teefe Bank (1993), International Credit Bank Ltd (1998) na Greenland Bank (1999).

Yanavuze ko hari byinshi byirengagijwe mu gufunga Co-operative Bank (1999), National Bank of Commerce (2012), Global Trust Bank (2014) n’igurishwa rya Crane Bank Ltd (CBL) mu 2016.

Umugenzuzi Mukuru w’Imari ya Leta avuga ko Banki Nkuru ya Uganda yagurishije imitungo ya banki za ICB, Greenland, Cooperative, GTB na NBC yari ifite agaciro ka miliyari Shs164, ku igabanuka 80%, ku buryo havuyemo miliyari Shs32 gusa.

Iyi raporo ivuga ko Banki Nkuru ya Uganda yanimanye amakuru menshi arebana n’igurishwa rya Crane Bank arimo nk’ibyakurikijwe kugira ngo bemeze ko DFCU Bank ariyo igomba kuyegukana.

Ikindi ngo ntibabonye amakuru arebana n’uburyo igenagaciro ryakozwe mbere y’uko DFCU yegukana Crane Bank kuri miliyari 200 z’amashilingi ya Uganda, ndetse n’imitungo yose yashyikirijwe iyi banki yayegukanye.

Mu nama yabaye ku wa 13 Kamena, abayobozi bakuru ba Banki Nkuru ya Uganda bemeye ko batigeze bakora igenagaciro ry’imitungo ya Crane Bank, ahubwo bashingiye kuri raporo yakozwe na DFCU mbere y’uko hasinywa amasezerano yo kuyiyegurira.

Abayobozi ba Banki Nkuru barimo na Guverineri Emmanuel Tumusiime-Mutebile banasabwe gusobanura ikoreshwa rya miliyari 478.8 z’amashilingi, yasohowe ubwo bamaraga kwegurirwa kugenzura Crane Bank ndetse n’aho ayo mafaranga yavuye.

Uretse Crane Bank, hari n’izindi banki byagaragaye ko hari ikibazo mu buryo zagurishijwemo aho zatanzwe ku mafaranga make, imitungo yazo, inguzanyo zari mu bakiliya byose ntibigaruzwe.

Iri genzura ryakozwe nyuma y’uko bamwe mu bari abanyamigabane ba Crane Bank n’abakozi ba Banki Nkuru ya Uganda basabye ko hakorwa iperereza ku bitarashyizwe hanze mu igurishwa ryayo n’izindi banki.

N’igikorwa cyabanje kudashyigikirwa na bamwe mu badepite bavugaga ko bakwiye gutegereza ibirego ku igurishwa rya Crane bank biri mu rukiko bikarangira, ariko Perezida w’Inteko Ishinga Amategeko, Rebecca Kadaga ategeka ko rikomeza.

Iyi nyubako niyo yakoreragamo Crane Bank mbere yo kugurishwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza