Bamwe mu bayobozi b’ibihugu bya Afurika bafite impamyabumenyi zihanitse

Yanditswe na Dufitumukiza Salathiel
Kuya 5 Mutarama 2021 saa 08:12
Yasuwe :
0 0

Kuko amateka ari yo ngenderwaho mu kubaka Isi ya none, abayobozi b’amatwara, ubwami n’abaperezida b’ibihugu baba bifuza kugira ubwenge, ubuhanga n’ubushobozi bibafasha gukora neza inshingano z’umwanya baba barimo wo kureberera, gutekerereza ndetse no kurwanirira rubanda rwa giseseka.

Nubwo bitekerezwa ko igihugu cyangwa amatwara arangajwe imbere n’umunyabwenge cyangwa umuntu ufite ubumenyi buri ku rwego rwo hejuru byoroshye ko gikomera, byagaragaye ko ubuhanga kavukire umuntu afite aribwo bumubahisha kuyobora kurusha amashuri yize cyangwa impamyabumenyi yahawe.

Urugero nk’umugabane wa Afurika niwo urangwamo abaperezida bafite impamyabumenyi zihanitse benshi ugereranyije n’indi migabane, nyamara wajya kureba iterambere ibihugu by’uyu mugabane bifite ugasanga riri inyuma nubwo bimwe muri byo biba bikungahaye ku mutungo kamere.

Zimbabwe yayobowe na Robert Mugabe wafatwaga nk’umwe mu baperezida bari bafite impamyabumenyi nyinshi mu Isi, irabarizwa ku mwanya wa 143 mu bukungu.

Mugabe ayobora icyo gihugu yari afite impamyabumenyi eshatu z’icyiciro cya kabiri cya kaminuza: iyo mu burezi, iy’imiyoborere, n’amateka n’ubuvanganzo yakuye muri kaminuza zitandukanye.

Ibyo kudatera imbere kw’ibihugu bimwe na bimwe byiganjemo ibya Afurika kandi biyobowe n’abafite impamyabumenyi zihanitse, hari ababihuza n’imiyoborere yabyo ikunda kurangwamo ruswa n’akarengane, imvururu za politiki, igitugu, gukandamiza abaturage n’ibindi.

Bamwe mu bayobora ibihugu bya Afurika bafite impamyabumenyi zihanitse

John Pombe Magufuli

Uyu ni Perezida wa Tanzania kuva mu 2015 kugeza ubu, umwanya yagiyeho avuye mu burezi, aho yakoraga umwuga w’ubwarimu.

Magufuli w’imyaka 62 afite impamyabumenyi y’icyiciro cya kabiri, icya gatatu ndetse n’iy’ikirenga (PhD) mu butabire, zose yakuye muri Kaminuza ya Dar es Salaam.

King Muhammed VI

Uyu ni umwami w’ubwami bwa Maroc kuva mu 1999 ubwo yasimburaga se ku ngoma amaze gutanga. Niwe ufite ububasha bukomeye mu mitegekere y’igihugu, ndetse akaba ari nawe ushyiraho Minisitiri w’Intebe muri icyo gihugu.

Uyu mugabo w’imyaka 58 afite impamyabumenyi y’icyiciro cya Kabiri mu by’amategeko yakuye muri kaminuza yitiriwe Mohammed V i Agdal muri Maroc.

Afite kandi impamyabumenyi y’ikirenga mu by’amategeko(PhD) yakuye muri kaminuza ya Nice Sophia Antipolis mu Bufaransa.

Alassane Ouattara

Uyu ni perezida wa Côte d’Ivoire kuva mu 2010 kugeza magingo aya. Ni umuhanga mu by’ubukungu ndetse avugwaho guteza imbere ubukungu bw’igihugu cye kikaza mu bifife ubukungu bwiza muri Afurika.

Ouattara w’imyaka 79 afite impamyabumenyi y’icyiciro cya kabiri cya kaminuza mu bya siyansi yakuye muri kaminuza ya Drexel, muri Philadelphia, ndetse n’iy’icyiciro cya gatatu n’ iy’ikirenga(PhD) mu by’ubukungu yaherewe muri kaminuza ya Pennsylvania.

Faure Essozimma Gnassingbe

Uyu ni perezida wa Togo kuva mu 2005, umwanya yasimbuyeho se wari umaze gupfa nyuma y’imyaka isaga 38 ayoboye icyo gihugu.

Ku myaka 55 y’amavuko, afite impamyabumenyi y’icyiciro cya kabiri mu by’ishoramari yakuye i Paris mu Bufaransa, n’iy’icyiciro cya gatatu mu bijyanye n’ishoramari yakuye muri kaminuza yitiriwe George Washington.

George Weah

Ni perezida wa Liberia kuva mu 2018. Uyu mugabo w’imyaka 55 ni umunyabigwi ukomeye wagacishijeho mu mupira w’amaguru, aho yanagizwe umwe mu bakinnyi beza ba Afurika b’ibihe byose, ndetse akanaba umukinnyi wa Afurika rukumbi wegukanye igikombe cya FIFA cy’umukinnyi w’umwaka.

Afite impamyabumenyi y’icyiciro cya kabiri cya kaminuza mu bijyanye na siporo yakuye muri kaminuza ya Parkwood mu Bwongereza, iy’icyiciro cya kabiri mu by’imari yakuye muri kaminuza ya Devry muri Miami; ndetse n’iy’icyiciro cya gatatu mu icungamutungo yakuye mu ishuri ry’icungamutungo rya Keller.

Hage Geingob

Geingob w’imyaka 80 ni Perezida wa Namibia kuva mu 2015. Nawe aza ku rutonde rw’abayobozi b’ibihugu bya Afurika bafite ubumenyi bwo ku rwego rwo hejuru, dore ko afite impamyabumenyi y’icyiciro cya kabiri cya kaminuza mu by’ubugeni yakuye muri kaminuza ya Fordham, i New York.

Uyu muperezida kandi afite impamyabumenyi y’icyiciro cya gatatu cya kaminuza mu by’inozabubanyi (public relations) yakuye i New York.

Jorge Carlos de Almeida Fonseca

Ni perezida wa Cape Verde kuva mu 2011, ndetse yigeze kubaho Minisitiri w’Intebe muri icyo gihugu kuva mu 1991 kugeza mu 1993.

Uyu muperezida w’imyaka 71 afite impamyabumenyi y’icyiciro cya kabiri n’iy’icya gatatu cya kaminuza mu by’amategeko yakuye muri kaminuza ya Lisbon muri Portugal.

Paul Biya

Ni perezida wa Cameroun kuva mu 1982, ubwo perezida Ahmadou Ahidjo yeguraga kuri uwo mwanya.

Uyu mukambwe w’imyaka 88 afite impamyabumenyi y’icyiciro cya kabiri cya kaminuza mu bijyanye n’amategeko n’ibya politiki yakuye muri kaminuza ya Paris mu Bufaransa.

Biya kandi afite n’izindi mpamyabumenyi zitandukanye zirimo iyo yakuye mu kigo cyigisha ibya politiki i Paris mu 1961, iyo yahawe na Institut des Hautes Etudes d’Outre-Mer mu 1962, n’iyo mu by’uburenganzira bwa rubanda yahawe mu 1963.

Dr. Lazarus McCarthy Chakwera

Uyu ni perezida mushya wa Malawi kuva muri Kamena 2020, watsinze amatora nyuma yo kuyasubiramo ubwo aya mbere byavuzwe ko yabayemo uburiganya.
Chakwera w’imyaka 66 afite impamyabumenyi y’icyiciro cya kabiri n’iy’icya gatatu cya kaminuza mu by’iyobokamana yakuye muri kaminuza ya North muri Afurika y’Epfo mu 1991, akagira impamyabumenyi y’icyiciro cya kabiri cya kaminuza mu by’ubugeni yakuye muri kaminuza ya Malawi mu 1997.

Afite kandi impamyabumenyi ihanitse (Phd) mu by’iyobokamana yaherewe muri kaminuza ya Trinity International yo muri Leta zunze Ubumwe za Amerika mu 2000.

Nana Akufo-Addo

Ni Perezida wa gatanu wayoboye Ghana guhera muri Mutarama 2017. Kuwa 2 Kamena 2020 yagizwe umukuru w’Umuryango w’Ubukungu bw’Ibihugu byo mu Burengerazuba bwa Afurika(ECOWAS), umwanya yasimbuyeho Mahamadou Issoufou.

Akufo-Addo afite impamyabumenyi y’icyiciro cya kabiri cya kaminuza mu by’ubukungu yakuye muri kaminuza ya Legon muri Ghana mu 1967.

Uyu mugabo w’imyaka 77 kandi yagiye yitabira amahugurwa atandukanye mu by’amategeko, harimo ayo muri Inner Temple na Middle Temple mu Bwongereza yitabiriye mu 1971, mbere yo kujya mu rugaga rw’abunganizi mu by’amategeko mu gihugu cye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .