Amatungo yo mu Karere ka Kayonza yashyizwe mu kato nyuma y’uko haketswe uburenge

Yanditswe na Hakizimana Jean Paul
Kuya 7 Mutarama 2021 saa 01:53
Yasuwe :
0 0

Minisiteri y’Ubuhinzi n’ubworozi yatangaje ko yahagaritse ingendo z’amatungo arimo inka, ingurube, ihene n’intama ku mpamvu iyo ariyo yose mu Karere ka Kayonza nyuma y’aho hagaragaye ibimenyetso by’indwara y’uburenge.

Ibi bimenyetso byagaragaye mu Mudugudu wa Mucucu mu Kagari ka Buhabwa mu Murenge wa Murundi mu Karere ka Kayonza.

Mu itangazo Minagri yashyize hanze risinyweho na Minisitiri w’Ubuhinzi n’Ubworozi, Dr Mukeshimana Gerardine rimenyesha abantu bose by’umwihariko aborozi bo mu turere twa Gatsibo, Kayonza na Kirehe two mu Ntara y’Iburasirazuba ko hagaragaye ibimenyetso by’indwara y’uburenge mu nka zo mu Mudugudu wa Mucucu.

Rikomeza rivuga ko “Mu rwego rwo kurwanya iyi ndwara, kuyikumira no kwirinda ikwirakwiza ryayo, amenyesha abantu bose, inzego z’ubuyobozi n’iz’umutekano ko ingendo z’amatungo arimo inka, ingurube, ihene n’intama ku mpamvu iyo ariyo yose zihagaritswe mu Karere ka Kayonza”.

Minisitiri Mukeshimana yakomeje asaba aborozi gukingiza inka yose igejeje amezi atandatu kuzamuka mu turere dusanzwe dukingira uburenge turimo Nyagatare,Gatsibo, Kayonza na Kirehe.

Aborozi bafite amatungo yagaragajwe cyangwa akekwaho ibimenyetso by’indwara y’uburenge basabwe guhita bahamagara umuveterineri. Na we asabwa kwambara uturindantoki n’agapfukamunwa igihe cyose agiye kureba no gusuzuma itungo rirwaye.

Aborozi n’ abaganga b’amatungo barasabwa kwihutira kumenyekanisha muri RAB itungo rigaragaje ibimenyesto by’indwara y’uburenge kugira ngo rikurikiranirwe hafi.

Minisitiri Mukeshimana kandi yanasabye ko niharamuka habonetse itungo rigaragaje ibimenyetso by’indwara y’uburenge cyangwa itungo ritazwi inkomoko mu ishyo ry’umuturanyi, uwabibonye wese yahita abimenyesha ubuyobozi bumwegereye nabwo bugahita bumenyesha abakozi ba RAB n’aba Minagri.

Uturere twa Gatsibo, Kayonza na Kirehe dukunze gushyirwa mu kato kubera indwara y’uburenge aho twaherukaga gushyirwa mu kato mu mwaka ushize ubwo iyi ndwara yari yahagaragaye na none.

Amatungo yo muri Kayonza yashyizwe mu kato kubera uburenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .