Amateka y’itutumba rya Jenoside yakorewe Abatutsi n’igeragezwa ryayo

Yanditswe na Nsanzabera Jean de Dieu
Kuya 9 Mata 2020 saa 11:28
Yasuwe :
0 0

Abantu benshi batekereza ko Jenoside yakorewe Abatutsi, ari igikorwa cyapfuye kuza gusa bagitekereje ako kanya, bagahita bagishyira mu bikorwa. Nyamara ibikorwa byagiye biba muri Repubulika ya mbere n’iya Kabiri byagiye bigaragaza ko Jenoside yateguwe ndetse igakorerwa igeragezwa ngo harebwe niba koko izashoboka.

Muri iyi nkuru tugiye kureba uburyo Jenoside yatutumbye n’uburyo yagiye igeragezwa mu buryo butandukanye mu bice byinshi by’igihugu.

Igeragezwa rya Jenoside mu Banyabwenge b’Abatutsi

Nyuma y’itwikwa ry’inzu z’Abatutsi n’iyirukanwa ryabo mu gihugu mu 1959, habayeho igeragezwa rya Jenoside rya mbere ku banyabwenge n’Abanyeshuri bigaga mu mashuri yisumbuye b’Abatutsi, bize hagati y’umwaka wa 1972 n’uwa 1973. Ibyo bihamywa na benshi bari mu mashuri muri ibyo bihe..

Mu nama Nkuru y’ishyaka rya Parmehutu ryari ku butegetsi bwa Kayibanda Grégoire yateranye mu wa 1969, yemeje ko hagomba kuba igenzura mu mashuri ry’ubwiganze bw’amoko mu burezi bw’u Rwanda. Mu itangira ry’umwaka w’amashuri, 1972-1973, iyo gahunda itangira gushyirwa mu bikorwa.

Mu buhamya bwatanzwe na Mugesera Antoine wigaga mu rwunge rw’amashuri rwa Kristu Umwami rw’i Nyanza. avuga ko “Umuyobozi w’icyo kigo Padiri Chanoine Ernotte, yandikiye Perezida Kayibanda mu ibaruwa ye yo ku wa 21 Gashyantare 1973, amubaza impamvu z’igenzura ry’ubwiganze bw’amoko mu bigo by’amashuri yisumbuye n’impamvu y’iyicwa ry’Abatutsi b’Abanyabwenge.”

Kayibanda ngo yamusubije ko “Ubuyobozi bw’igihugu aribwo bwemeje gahunda y’iryo genzura, kandi rikaba rigomba gushyirwa mu bikorwa nta nkomyi.”

Muri cyo gihe bamwe mu bana b’Abatutsi bigaga mu mashuri yisumbuye, barimo Yosiya Senyonga, bakoze ikizamini cyo kwiga muri Kaminuza Nkuru y’u Rwanda ariko ntibabimerera.

Kuva muri Gashyantare 1973, umwana w’umututsi kugira ngo yemererwa kongera kwiga muri Kaminuza Nkuru y’u Rwanda byari bigoye. Abana b’Abatutsi bigaga mu mashuri yisumbuye, batangiye guhigwa bukware, Abatutsi bakoreraga Leta n’ibigo byigenga, batangira kubirukana ku kazi. Ibyo byabaye icyorezo mu gihugu cyose, Abatutsi bize bose babamarira ku icumu, abarokotse bahungira mu bihugu by’Abaturanyi, birimo u Bugande, u Burundi na Kongo.

Iyicwa ry’Abatutsi muri Kibirira

Mu gihe urugamba rwo kubohora u Rwanda rwari rurimbanyije, ubwicanyi muri Komini Kibirira ya Perefegitura ya Gisenyi, bwahereye ubwo. Mu nama yateranye mu wa 1990, ihuje Abakonseye bose bo muri Superefegitura ya Ngororero, yamaze iminota itarenga 20, yaganiriye ikibazo nyamukuru cyo kwikiza Abatutsi.

Perefe wa Perefegitura ya Gisenyi Nshunguyinka nawe yari ayirimo, ariko ntiyagira icyo avuga. Superefe wa Ngororero, yerekanye imirambo y’abantu babiri avuga ko bishwe n’Abatutsi, ku bw’ibyo bakaba bakwiye gukangurira abaturage kurwanya bivuye inyuma uwitwa umututsi aho ava akagera.

Iyo nama yakurikiwe n’izindi zahuje abaturage muri za komini, muri za Segiteri n’ahandi, Muri icyo gihe hari ibigo by’amashuri byafunzwe , kugira ngo barusheho kurwanya uwo bitaga umwanzi.

Muri iyi Komini ya Kibirira, ubwicayi bw’Abatutsi bwageragejwe inshuro eshatu, ibarura ryakozwe mu Ukwakira 1990 ryagaragaje ko hapfuye abantu 338, inzu 550 ziratwikwa, amatungo aricwa aribwa umusubizo.

Itwikwa ry’inzu mu Bugesera

Nyuma y’aho ikibazo cyo gucyura impunzi z’Abanyarwanda kinaniraniye burundu, FPR Inkotanyi yafashe icyemezo cyo gucyura impunzi ku ngufu za gisirikare, ibyo byahise biba urwitwazo ku ngoma ya Habyarimana, baba babonye urwaho rwo kwica Abatutsi, hirya no hino mu gihugu.

Aho Jenoside yatangiye kugeragerezwa, harimo no mu Karere ka Bugesera, aho ubwicanyi bwatangiye muri Werurwe 1992, icyo gihe hicwa abantu batanu, inzu 74 ziratwikwa, abandi bagera ku 1200 bakurwa mu byabo bahunga ubwo bwicanyi.

Urupfu rw’Abagogwe

Irindi geragezwa rya Jenoside yakorewe Abatutsi, ryakorewe muri Komini Kayove na Mutura muri Perefegitura ya Gisenyi mu mpera za Ukuboza mu 1992. Icyo gihe hapfuye Abatutsi benshi bo mu nzu y’Abagogwe. Ni nayo mpamvu bayise “Jenoside y’Abagogwe” biturutse ku muryango mugari w’Abagogwe wari utuye muri izo Komini.

Kubera icyegeranyo cy’umuryango mpuzamahanga w’uburenganzira bw’ikiremwamuntu ku iyicwa ry’Abagowe, Leta ya Habyarimana yagize ubwoba, abantu 284 bakekwaho ubwo bwicanyi barafatwa barafungwa.

Kubera ubwo bwicanyi bwakorewe Abagogwe n’icyo cyegeranyo, abantu benshi bitabiriye gusura Komini Mutura ahitwa mu Bigogwe aho ubwo bwicanyi bwabereye. Icyo gihe muri Perefegitura ya Ruhengeri na Gisenyi havumbuwe imyobo miremire yacukuwe rwihishwa yo kuzashyiramo Abatutsi bazaba bishwe.

Icyo cyegeranyo cyo ku wa 3 Werurwe 1993, cyashyize ahagaragara abari inyuma n’abashyize ubwo bwicanyi mu bikorwa, haba mu Bugesera , mu Bigogwe na Kibirira.

Muri Kibirira, bahamije ko ubwo bwicanyi buri ku Mutwe wa Perefe wa Gisenyi Nshunguyinka, Superefe wa Ngororero, Umuyobozi w’Umushinga PNAP (Umushinga watezaga imbere ubuhinzi bw’ibirayi) , witwaga Tegera Pierre n’abayobozi ba MRND muri izo Komini.

Ubwicanyi bwo mu Bugesera bwashinjwe Ngeze Hassan, Rwambuka Fidele wari Burugumesitiri wa Komini Kanzenze na Col Musonera.

Ubwicanyi bwakorewe Abagogwe bwateguwe kandi bushyirwa mu bikorwa na Perezida Habyarimana n’Abagize umuryango we, barimo Agathe Kanziga umugore we, baramu be aribo Sagatwa Elie, Zigiranyirazo Protais na Nzabagerageza Charles. Harimo kandi Bizimugu Casmir, Nzirorera Joseph, Mugemana Jean Marie Vianney, Sukiranya, Kajerijeri na Gasana.

Abandi bazwi cyane mu igeragezwa rya Jenoside yakorewe Abatutsi, harimo Lt Hasengineza Boniface, ba Caporal Ndimurwango, Mushimiyimana na Nkusi bakoze ubwicanyi bwabaye kuwa 23 Mutarama 1991 mu Ruhengeri. Burugumesitiri Rwambuka we akaba azwi nk’inkingi ya mwamba mu bwicanyi Bwabereye mu Karere ka Bugesera.

Abandi ni nka Burugumesitiri Semanza wayoboraga Komini Bicumbi n’Interahamwe bazengereje Abatutsi birenze urugero. Nta wakwibagirwa kandi Perefe wa Kibuye Munyazesa Faustin watangije ubwicanyi ku Kibuye, Cyangugu, Kibangu na Shyorongi kugera no mu Mujyi wa Kigali.

Icyo cyegeranyo cy’umuryango uharanira uburenganzira bwa muntu cyatumye bamwe mu Baminisitiri bo muri Guverinoma ya Habyarimana birukanwa muri Minisiteri bayoboraga.

Abo ni nka Bizimungu Casmir wari Minisitiri w’Ububanyi n’Amahanga, Munyazesa wari Minisitiri w’Ubutegetsi bw’Igihugu n’Amajyambere ya Komini na Gasana wari Minisitiri w’Ingabo.

Kubera ubwo bwicanyi bwabayeho, bwanatumye Abanyarwanda bakangukira guharanira uburengazira bwabo. Ubwo nibwo hashinzwe imiryango myinsi iharanira uburenganzira bw’Ikiremwamuntu nka ADEL( Assocation Rwandaise pour la Defense de Droit de l’Homme ), ARDHO (Assocation Rwandaise de Droit de la Persone et de Riberte Pubrique ), AVP( Association des Volontaires de la Paix), RICHREDOR (Rigue Chretienne de la Defense de Droit de l’Homme au Rwanda ), ndetse n’undi witwa Kanyarwanda.

Jenoside yakorewe Abatutsi yabanje gutegurwa, inageragerezwa mu bice bitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .