00:00:00 IGIHE NETWORK KN KINYARWANDA EN ENGLISH FR FRANCAIS

Alex Dusabe na Israel Mbonyi bari gutegura igitaramo

Yanditswe na Uwiduhaye Theos
Kuya 18 May 2022 saa 06:42
Yasuwe :

Alex Dusabe wamamaye mu ndirimbo zo kuramya no guhimbaza Imana, yateguye igitaramo azahuriramo n’abandi baramyi bakomeye mu Rwanda, barimo Israel Mbonyi na Papi Clever.

Ni igitaramo cyiswe Kigali Gospel Fest kizajya kiba buri mwaka, kuri iyi nshuro kikazabera Car Free Zone mu Mujyi wa Rwagati.

Mu kiganiro uyu muhanzi yagiranye n’itangazamakuru, yavuze ko kunyura muri Car Free Zone ari byo byamuhaye igitekerezo cyo kujya ategura ibi bitaramo.

Ati “Iyerekwa ry’iki gitaramo ryaje nyuze muri ‘Car Free Zone’, ndavuga nti ‘kuki nta kintu kijyanye no gutanga ubutumwa bwiza kijya kibera muri aka gace?’ Nyuma naje kubisaba Umujyi wa Kigali urabyemera.”

Yavuze ko iki gitaramo ateganya ko kizaguka kikajya kiba umunsi urenze umwe, ndetse byaba byiza kikabera no mu yindi mijyi itari Kigali. Ati “Uretse kuririmba, iki gitaramo hazajya habamo ibikorwa bitandukanye bijyanye no gutanga ubutumwa bwiza.”

Kwinjira muri iki gitaramo cy’aba bahanzi bizaba ari ubuntu, ibintu Dusabe avuga ko batekereje kugira ngo abantu bose bumve ko nta n’umwe uhejwe.

Uretse gutambutsa ubutumwa mu ndirimbo, hazabaho gutanga ubuhamya. Ubu buhamya buzatangwa n’umusore wari warabaswe n’ibiyobyabwenge akaba yarabiretse, hanatangwe Bibiliya ku bakiriye Agakiza.

Iki gitaramo gitegerejwe kuri uyu wa Gatanu tariki ya 20 Gicurasi, kikazatangira Saa Kumi z’umugoroba kugera Saa Yine z’ijoro.

Alex Dusabe afatanyije n'Umujyi wa Kigali bateguye igitaramo cyatumiwemo Israel Mbonyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .