00:00:00 IGIHE NETWORK KN KINYARWANDA EN ENGLISH FR FRANCAIS

ADEPR mu cyerekezo gishyira imbaraga mu nzego zirimo uburezi

Yanditswe na IGIHE
Kuya 13 June 2022 saa 10:23
Yasuwe :

Ubuyobozi bw’Itorero rya Pentekote mu Rwanda, ADEPR, bwatangaje ko mu mavugurura bwatangiye harimo gushyira imbaraga mu bizamura imibereho y’abaturage aho kwita ku ivugabutumwa gusa.

Ni ubutumwa bwatangiwe mu muhango wo gutangiza icyumweru cy’uburezi mu mashuri y’iri torero, wabereye mu Karere ka Bugesera ku wa 13 Kamena 2022.

Icyumweru cy’uburezi ni ubwa mbere giteguwe ku rwego rwa ADEPR. Ubuyobozi bwavuze ko hatekerejwe no ku kwagura ibikorwa, inzego z’uburezi n’ubuvuzi zikarushaho gushyirwamo imbaraga.

Umushumba Mukuru Wungirije wa ADEPR, Pasiteri Rutagarama Eugène, yavuze ko iri torero ryifuza kubaka uburezi bufite ireme atari ukugira amashuri ameze nk’umutako.

Ati “Ni gahunda itari imenyerewe; impinduka twifuza ntabwo zizareba urwego rumwe rw’ivugabutumwa, hari n’ubumenyi bukenewe. Turi mu mavugurura n’iki twabonye ko ari ngombwa. Ntabwo twifuza kugira ibigo by’imitako ahubwo bigomba kujyana n’ireme ry’uburezi butangirwamo.”

“Turacyafite urugendo runini kugira ngo ibigo byacu bimere neza kandi ntitwabigeraho uruhare rwacu rutagaragaye nk’itorero ndetse hatariho ubufatanye bw’abayobozi b’ibigo, ababyeyi n’ubuyobozi bwa Leta.”

Pasiteri Rutagarama yashimye ubufatanye bwa Leta na ADEPR mu by’uburezi burimo kuba Leta itanga imishahara y’abarimu, ubutaka bwo kwaguriraho ibikorwaremezo n’ibindi.

Umunyamabanga Nshingwabikorwa w’Intara y’Iburasirazuba, Dr Nyirahabimana Jeanne, yavuze ko uyu ari umusanzu ukomeye ADEPR izanye, witezweho ibisubizo by’ibibazo bisanzwe bihari.

Ati “Igihe cyose uburezi bugiye gukorwaho n’abantu batandukanye ni ibintu biduha umusaruro. Iyo turebye ibiteganyijwe gukorwa muri iki cyumweru cy’uburezi turasanga hazaboneka ibisubizo byinshi by’ibibazo duhura na byo.”

Mu bizakorwa harimo ubukangurambaga ku kurwanya ibiyobyabwenge n’inda zitateguwe mu banyeshuri, gusubiza mu ishuri abaritaye n’ibindi, ku nsanganyamatsiko igira ati “Uburezi bufite ireme, ishingiro ry’iterambere rirambye.”

Dr Nyirahabimana yavuze ko ari ubukangurambaga bwunganira ubundi, ubwo bufatanye bukaba ari bwo butanga umusaruro w’uburezi bufite ireme. Yasabye ADEPR gukomeza muri uwo murongo yizeza ko Leta na yo izakomeza gutanga umusanzu wayo.

Seneza Jean Paul uhagarariye Umuryango uvuga Ubutumwa Bwiza mu rubyiruko binyuze muri Siporo, Ambassadors Football, yavuze ko bidashoboka guteza imbere uburezi usize siporo inyuma ikaba ari yo mpamvu mu bigo by’amashuri bya ADEPR hashyizwemo gahunda yo kwigisha umupira w’amaguru.

Itorero ADEPR rifite ibigo by’amashuri y’incuke, abanza n’ayisumbuye birenga 300 hirya no hino mu gihugu.

Abayobozi ku rwego rw'Itorero, abo mu nzego za Leta bari mu bitabiriye itangizwa ry'Icyumweru cy'Uburezi muri ADEPR
ADEPR yifuza ko uburezi mu bigo byayo buba ku isonga kandi abanyeshuri bakaba bafite indangagaciro za Gikirisitu
Icyumweru cy'Uburezi muri ADEPR cyatangirijwe mu Karere ka Bugesera mu Ntara y'Iburasirazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .