Aborozi basabwe kwirinda kwivurira amatungo, abaveterineri basabwa kwimakaza ubunyamwuga

Yanditswe na IGIHE
Kuya 22 Ugushyingo 2020 saa 08:26
Yasuwe :
0 0

Urugaga rw’abaganga b’amatungo mu Rwanda (RCVD) rurasaba aborozi kwitabaza abaveterineri igihe cyose amatungo yabo yarwaye bakirinda kuyivurira kuko bishobora kuyaviramo urupfu igihe bahamagaye veterineri bakererewe.

Umuyobozi wungirije wa RCVD, Dr. Tumusabe Marie Claire yabivugiye mu mahugurwa y’abaveterineri bakorera mu Mirenge, yari agamije kubigisha ibijyanye n’imibereho myiza y’amatungo (animal welfare) no kungurana ibitekerezo kugira ngo bakore kuburyo umworozi ahabwa serivisi nziza.

Yavuze ko hari ikibazo aborozi bakunze kugirana n’abaveterineri babashinja kunanirwa kubavurira amatungo agapfa, kandi nyamara byatewe n’umworozi wabanje kugerageza kwivurira itungo aho kwitabaza veterineri akimara kubona ko rifite ikibazo.

Ati “Ikintu nsabye aborozi ni ukureka kwivurira, twagiye tubibona ugasanga umuturage abitse imiti mu rugo rwe, yagira ikibazo ugasanga agiye kwivurira, rimwe na rimwe akavura n’ibitari byo veterineri agahamagarwa ari uko rya tungo ryarembye rimwe na rimwe bagashinja veterineri ngo yanyiciye itungo kandi ari uko atahamagawe ku gihe, niba itungo rirwaye, bahamagare abaganga b’amatugo barahari.”

Abaganga b’amatungo basabwe kurangwa n’ubunyamwuga mu kazi kabo harimo ikoreshwa ry’imiti n’ubwirinzi kuburyo bitabakururira kwandura indwara ziva ku matungo bavura.

Veterineri w’Umurenge wa Ruvune mu Karere ka Gicumbi, Nsengumuremyi Philbert, umaze imyaka itanu muri ako kazi, yavuze ko bagira ikibazo cy’ibura ry’imiti imwe n’imwe n’ibikoresho bidahagije nubwo hari ibyamaze kuboneka binyuze mu mishinga y’ubworozi ya Minsiteri y’Ubuhinzi n’Ubworozi.

Ati “Imiti ivura uburondwe irabobeka ariko iyifashishwa mu kugarura imbaraga ku matungo amaze kubyara ntikunze kuboneka. Ntabwo ari umwihariko wa Gicumbi cyangwa na Ruvune biri mu Turere dutandukanye.”

Yavuze ko ibikoresho byifashishwa mu kubaga amatungo afite ibibazo n’ibyo gutera intanga byo byamaze kuboneka. Ku miti abaveterineri ba leta badafite ngo bitabaza abigenga, umworozi yazabona amafaranga akishyura.

Umuyobozi wungirije w’urugaga rw’abaganga b’amatungo mu Rwanda, Dr. Tumusabe Marie Claire yavuze ko bakomeza gukora ubuvugizi kandi ko bishimira ko hari ibibazo bikemuka.

Ati “Icyo dukora ni ukubakorera ubuvugizi nk’abareberera, muri Minisiteri y’Ubuhinzi n’Ubworozi n’iy’ubutegetsi bw’igihugu kandi icyo twishimira ni uko hari ibimaze gukorwa.”

Byitezwe ko abaveterineri bahuguwe bazahugura abigenga n’aborozi muri rusange mu Mirenge bakoreramo.

Kugeza ubu abaganga b’amatungo bagera ku 3000 nibo bamaze kwiyandikisha mu rugaga rw’abaganga b’amatungo mu Rwanda (RCVD).

Aborozi basabwe kwifashisha abaganga b'amatungo mu gihe amatungo yabo yarwaye aho kuyivurira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .