Amakosa ya Guverinoma atuma ruswa ikomeza kwimakazwa mu bayobozi

Yanditswe na Akayezu Jean de Dieu
Kuya 25 Gashyantare 2021 saa 12:11
Yasuwe :
0 0

Mu 2004 nibwo Umuryango Mpuzamahanga Urwanya Ruswa n’Akarengane [Transparency International], watangiye gukorera mu Rwanda ku ntego yo kurandura ruswa. Mu batangiranye nawo Ingabire Marie Immaculée yari ku ruhembe, bivuze ko amaze nibura imyaka irenga 17 muri urwo rugamba.

Iyo uganira n’uyu mubyeyi ufatwa nk’impirimbanyi mu kurwanya ruswa n’akarengane akaba n’Umuyobozi w’uyu muryango ‘Transparency International Rwanda’ ibifite mu nshingano, akubwira ko mu gihe agihumeka umwuka w’abazima atazacogora kwamagana imigirire iganisha ku kurenganya umuturage.

Kuri we, ruswa ni ingaruka z’akarengane kuko ngo akarengane katabayeho na ruswa ntiyabaho ariyo mpamvu akenshi usanga kimwe kidasigana n’ikindi.

Umusaruro w’icyuya cya Ingabire n’abo bafatanya muri uru rugamba ugaragarira muri raporo zitandukanye zikorwa n’imiryango mpuzamahanga, yaba irwanya ruswa ndetse n’indi itandukanye aho idasiba gushyira u Rwanda mu bihugu biza imbere mu kwimakaza imikorere itarangwamo ruswa.

Ubushakashatsi bwa Transparency International ku rwego rw’Isi, bugamije kugaragaza ishusho yo kurwanya ruswa mu bihugu bitandukanye bwakozwe mu 2016(Corruption Perception Index 2016), bwashyize u Rwanda ku mwanya wa gatatu muri Afurika mu bihugu bigaragaramo ruswa iri ku gipimo cyo hasi.

Mu mwaka wakurikiyeho, u Rwanda rwaje ku mwanya wa Kane muri Afurika ndetse rukomeza kuguma kuri uwo mwanya mu myaka yose yakurikiyeho kugeza mu 2021.

Ku rundi ruhande, iyo Ishami ry’u Rwanda [ari naryo Ingabire abereye umuyobozi] rikoze ubushakashatsi rigaragaza ko ruswa mu Rwanda igihari. Ibintu Ingabire asobanura ko mu bantu badafite amaso abiri abona ufite rimwe aba ariwe muyobozi wabo.

Ku wa 28 Mutarama 2021, Transparency International Rwanda , yamuritse ubushakashatsi bwiswe Bribery Index, RBI’ bugaragaza uko ruswa yari ihagaze mu mwaka wa 2020.

Ibyagaragajwe n’ubwo bushakashatsi ni uko muri rusange 52,8% by’Abanyarwanda babona ko ruswa iri ku kigero cyo hasi, bavuye kuri 61,9% mu 2019, mu gihe 20,5% babona iri ku kigero cyo hejuru, bavuye kuri 13,3% bariho mu 2019.

Iyi raporo igaragaza ko mu 2020 hatanzwe amafaranga ya ruswa agera kuri 19.213.188 Frw, muri ayo agera kuri 14.288.500 Frw ahwanye na 74,37% yakiriwe n’inzego z’ibanze, akaba ari zo ziza ku isonga mu kwakira amafaranga menshi ya ruswa mu mwaka ushize wa 2020.

IGIHE yagiranye ikiganiro cyihariye na Ingabire,abazwa impamvu u Rwanda ruza mu mwanya w’imbere mu bihugu bitarangwamo ruswa, kandi raporo z’imbere mu gihugu zikigaragaza ko ruswa igihari.

Yavuze ko “Nta gihugu turabona cyabonye 100% mu kurwanya ruswa ariko ndagira ngo mbibutse ko Afurika yamunzwe na ruswa cyane. Niyo washaka ukaba n’uwa mbere ntabwo uba uri igitangaza nonese wabonye uwa mbere wo muri Afurika yari yagira amanota 70? Niba tunagerageza ni uko tugeragereza ku mugabane wamunzwe na ruswa cyane.”

Ingabire avuga ko mu Rwanda uretse ruswa y’amafaranga hari ubundi bwoko bwinshi bwa ruswa bukunze kugaragara burimo ishingiye ku kimenyane, itonesha n’icyenewabo ndetse n’ishimisha mubiri ishingiye ku gistina [iyi ngo ikunze kugaragara mu bintu bijyanye no gusaba cyangwa gutanga akazi].

Polisi itanga icyizere, WASAC harimo imico mibi...

Rwanda Bribery Index 2020 yagaragaje ko ibigo byagaragayemo ruswa kurusha ibindi mu itangwa rya serivisi, harimo Polisi Ishami ryo mu Muhanda yagaragawemo na ruswa ku kigero cya 12% ivuye kuri 9,07% yari iriho mu 2019, naho urwego rw’abikorera yagaragayemo ku kigero cya 7% ivuye kuri 4.23%.

Ingabire avuga ko n’ubwo mu ishami ryo mu muhanda rya Polisi ari urwego rukomeje kuza ku isonga mu kwaka ruswa, hari icyizere kuko Polisi y’Igihugu yakajije ingamba zo kuyirwanya.

Ati “Polisi yo mu muhanda, mu rwego rwabo bafite ubushake bwo guhashya ruswa, niyo bayigufatanye cyangwa bayiguketseho n’ubwo inkiko zakugira umwere bo baraguhana. Bo rwose ikintu cyo kutihanganira uketsweho ruswa. Ibyo mbifitiye gihamya.”

Mu zindi nzego zagaragayemo izamuka rya ruswa mu mwaka ushize, harimo Ikigo gishinzwe Isuku n’Isukura (WASAC) yagaragawemo na ruswa ku kigero cya 5,40% ivuye kuri 3,53% yari iriho mu 2019, hari kandi mu nzego z’ibanze aho yavuye kuri 2,51% mu 2019 ikagera kuri 4,90% mu 2020.

Ati “Muri WASAC, ni ikigo gishobora kuba cyaracunzwe nabi igihe kinini ku buryo no kukizahura bitazoroha, ndumva mbabariye cyane uriya muntu bagihaye ngo akiyobore, cyajemo imico mibi, imikorere mibi isa n’iyabaye akarande.”

Yakomeje agira ati “Ariko noneho na Guverinoma mu mikorere yayo nayo irabyica [….], niba ikigo kigaragayemo imikorere mibi […] ariko wowe uzagaruka muri raporo y’Umugenzuzi Mukuru buri mwaka buri mwaka, buri mwaka, data wanjye ngo uko basanze ari amakosa!”

Ingabire avuga ko ubundi itegeko riteganya ko niba umukozi aketsweho ruswa cyangwa ibindi byaha nyuma Ubushinjacyaha bugasanga atari icyaha ahubwo ari amakosa, imyirondoro ye igomba gushyikirizwa Minisitiri w’Intebe ndetse na Minisiteri y’Abakozi ba Leta n’Umurimo noneho bagahana uwo mukozi, agahabwa ibihano mu rwego rw’ubuyobozi.

Ati “Hari abo umaze kumva bahanwe? Waba umaze kumva bangahe bahanwe? Ariko niba yakoze ikosa nabwo aba agomba guhanwa, cyangwa bajya no guhindura bagafata umuyobozi wo hejuru kandi akenshi byicwa n’abakozi bo hagati.”

Yakomeje agira ati “Nonese WASAC, umuyobozi wo hejuru tuvuge, niwe utanga mubazi? Kandi niho twabonye ruswa nyinshi kandi iyo bakuyeho umuyobozi bakuraho uwo hejuru, ba bandi banabaye ibigugu bamaze imyaka myinshi nk’iyo maze ndwanya ruswa.”

Ingabire umaze imyaka irenga 17 mu rugamba rwo kurwanya ruswa n'akarengane, avuga ko atazahwema gutabaza mu gihe hari inzego zikirangwamo ruswa

Uyu muyobozi avuga ko hari icyuho mu gukurikirana no guhana aba bayobozi bavugwaho ruswa mu bigo bya leta kuko itegeko rigenga abakozi ba leta rirengera umukozi bikomeye bigatuma yiyumva nk’igihangange.

Ati “Ese ubundi amafaranga yabuze, yakuburiyeho ntuyagaruye, uba umwere ute? Twereke aho yagiye. Iyo ngeso se yazacika ryari? Ngo urumva ni ukubahiriza uburenganzira bwa muntu, ariko nanjye nari mfite uburenganzira kuri ya mafaranga yabuze kuko yagombaga kumpa amashanyarazi cyangwa umuhanda.”

Yakomeje agira ati “Nonese ubwo burenganzira bwanjye ubukandagiye ute? Natwereke uko ayo mafaranga yabuze, atwereke aho yagiye naho kutubwira ngo babaye abere, ayo mafaranga yagiye he? Niba amezi atandatu ataranashira ukabona yisubiriye mu kazi.”

Ruswa muri COVID-19

Mu bindi byagaragajwe n’ubushakashatsi bwa Rwanda Bribery Index 2020, ni uko mu nzego z’ibanze ruswa yazamutse cyane, kuko yavuye ku kigero cya 2,51% mu 2019, igera kuri 4,90% mu 2020.

Kuva muri Werurwe 2020, icyorezo cya COVID-19 cyibasiye u Rwanda ndetse ibikorwa byinshi birahagarara kugeza ubwo n’abaturage bategetswe kuguma mu ngo zabo mu rwego rwo kwirinda ikwirakwira ry’iki cyorezo.

Ingabire ahuza izamuka rya ruswa mu nzego z’ibanze n’uko inzego z’ibanze ari zo zari zifite inshingano zo gukurikirana iyubahirizwa ry’amabwiriza, hakaba rero hari aho byatumye bamwe babyitwaza bakarya ruswa kandi ijisho ryo kugenzura ko batarya ruswa rikaba ryari riri muri guma mu rugo.

Ati “Byatewe n’ubundi n’uko abantu batari inyangamugayo noneho bakabona ikintu kimeze nk’igicucu bihishamo. Muri iyi minsi ya COVID-19, twakunze kuba turi mu rugo rimwe na rimwe, abasaba ruswa nabo rero bakabona uko bayisaba kuko nta jisho ribahanzeho ribareba kandi abantu nabo barashaka uko bava mu muhanda nabo bagatanga iyo ruswa.”

Yakomeje agira ati “Ikindi nacyo ni uko nk’abari bemerewe ibyo bagomba gukora, ntabwo bari benshi uwagombaga kubaha urwo ruhushya yarabavunaga kuko yabaga azi ko bakeneye kugira ngo babikore vuba abandi bazajye kuva mu rugo baramaze kuvanamo ayabo.”

Ingabire avuga ko icyo abona cyakorwa kugira ngo ruswa igabanyuke mu Rwanda ari ukwimakaza umuco wo kubaza no kubazwa inshingano ndetse n’abayobozi bakajya bakurikirana abo bayobora.

Ku rundi ruhande ariko avuga ko atazigera ahwema kwamagana abantu bose bafite umugambi wo kwimakaza ruswa cyangwa kurenganya abaturage mu buryo bumwe cyangwa ubundi.

Ati “Ikintu ntazakora; sinzabeshya, ntawe nzibasira, ntawe nzasebya nta n’ubwo nzajya mu bishobora kuba byica amategeko y’iki gihugu. Ariko ibindi byose uko mbibona niko nzabivuga.”

Amafoto na Video: Mushimiyimana Azeem


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .