Abatangaza amakuru bifashishije YouTube bagaragaje impungenge nyuma yo gusabwa kwiyandikisha

Yanditswe na Uwimana Abraham
Kuya 18 Ukuboza 2020 saa 07:07
Yasuwe :
0 0

Urwego rw’Abanyamakuru Bigenzura (RMC) rwasohoye itangazo ryibutsa abafite imiyoboro ya YouTube (channels) ikoreshwa mu gutangaza amakuru, kwihutira kuyandikisha vuba.

Iri tangazo rigisohoka abantu batandukanye ntibavuze rumwe ku byo kwandikisha Youtube channels. Hari abagaragaje ko YouTube ari urubuga nkoranyambaga rutagendera ku mahame y’itangazamakuru ku buryo rwagenzurwa na RMC.

RMC yasobanuye ko imiyoboro ya YouTube yasabwe kwiyandikisha ari ikora nk’ibitangazamakuru byigenga gusa, ni ukuvuga ibinyamakuru, bikora akazi ka buri munsi ko gutara inkuru mu baturage, kuzitunganya no kuzitangaza hakoreshejwe umuyoboro wa YouTube.

Ngo impamvu yo gutangira kugenzura za YouTube channels zikora nk’ibitangazamakuru byigenga, ni uko gutara inkuru no kuzitangaza bigomba gukorwa kinyamwuga, hisunzwe itegeko rigenga itangazamakuru mu Rwanda, itegeko ryo kubona amakuru, n’amahame y’umwuga w’itangazamakuru.

Urwo rwego kandi ngo rwafashe uwo mwanzuro bivuye ku birego by’abaturage RMC yagiye yakira, aho byinshi muri byo ngo ari ibyaregegaga abakora itangazamakuru ryo kuri murandasi, aho ngo bashinjwaga kwica zimwe mu ngingo z’amahame agenga umwuga w’itangazamakuru.

Nyuma y’uko RMC isabye YouTube Channels kujya kwiyandikisha guhera mu mpera za 2019, hari bamwe bihutiye kujyayo, gusa abenshi mu bakorera mu murongo w’itangazamakuru ntibarajyayo, ariyo mpamvu RMC yongeye kubibakangurira.

Umunyamabanga Nshingwabikorwa wa RMC, Mugisha Emmanuel yakuyeho urujijo rwa bamwe asobanura ko abasabwa kwiyandikisha ari abashaka gukoresha YouTube bakora itangazamakuru kinyamwuga.

Yagize ati “Ni ukuvuga ngo twebwe abo dukeneye ni abashaka kuza mu mwuga w’itangazamakuru, kugira ngo bakore kinyamwuga kandi bakorere Abanyarwanda, undi wese rero washaka kubikoresha mu nyungu zo kugira ngo yangize, hari inzego zibishinzwe, hari inzego zibihanira, bazaba barebwa n’izo nzego.”

Bamwe mu bafite YouTube Channels baganiriye na IGIHE bagaragaje ko hari aho batumva kimwe na RMC kuri iyi ngingo yo kubasaba kwandikisha Youtube Channels zabo, gusa bagaragaza ko hari icyo bishobora gukemura.

Rugerinyange Eric, afite iyitwa Inkuru z’Ubuzima yavuze ko iyi gahunda yo kwandikisha channel bayishimiye kuko ngo bizafasha mu gutuma barushaho gukora kinyamwuga.

Yagize ati “Ni byiza kuko bizafasha mu guca akajagari, n’abantu bakamenya gutandukanya abanyamakuru koko n’abandi babyiyitirira, ndetse bizanafasha kuba abantu babona amahugurwa, ni icyemezo twishimiye.”

Undi utashatse ko amazina ye atangazwa, yavuze ko RMC itagakwiye kwinjira mu kugenzura YouTube Channels kuko ari imbuga nkoranyambaga nk’izindi, bityo ko gushaka kuzigenzura byaba ari ukuvogera.

Yagize ati “YouTube channel ni social media, ntabwo umuntu azaba afite Instagram ngo ajye kuyandikisha, abe afite Facebook ajye kuyandikisha, kandi dushyiraho ibintu bitandukanye, kuyandikisha rero ari social media sinzi icyo byamarira, kuko ni umutungo bwite w’umuntu yashyiraho icyo ashatse cyose.”

Ku rundi ruhande ariko Ukurikiyimfura Leonce, ufite umuyoboro yise Express Online Tv unyuzwaho amakuru atandukanye, yavuze ko kwandika YouTube channels hari icyo bizakemura, nko gufasha ababikoraga kinyamwuga kugira urwego rubareberera koko.

Ati “Umuntu ufite channel akiyandikisha, ashobora kuba yahabwa amahugurwa, ashobora kuba yagenzurwa, kuko ushobobora kuba utagenzurwa ukaba washyiraho content ukaba wayizira, ikiza rero ni uko wagenzurwa, waba warenze imipaka runaka ukaburirwa kugira ngo bitaza kugukurikirana ubyita imikino ngo ni social media.”

Mugisha yavuze ko kwiyandikisha bifitiye inyungu cyane abazabikora kuko ngo bibafasha no kubona amahugurwa ndetse no kurengerwa ubwo baba bagize ikibazo kirebana n’umwuga.

Ati “Abo twe twibandaho ni abashaka gukoresha ibitangazamakuru mu rwego rwa kinyamwuga, bakorera Abanyarwanda mu nyungu rusange, abo ngabo barengerwa n’amategeko, abo ngabo bagira uburenganzira bubarengera, bahabwa amahugurwa, bahabwa ubufasha butandukanye, niyo mpamvu dukeneye kumenya abo ari bo kugira ngo dufatanye gukora kinyamwuga.”

Ikindi kibazo cyagaragajwe n’abafite imiyoboro ya YouTube nk’icyababera inkomyi mu kwiyandikisha, ni igiciro cyashyizweho na RMC cya 50.000 Frw yo kwiyandikisha. Bamwe bavuze ko ari menshi, kuko YouTube nyinshi zidafite ubushobozi nk’ubw’ibitangazamakuru bisanzwe.

Kuri ibi Mugisha yavuze ko gushyiraho iki giciro babitekerejeho neza, ngo kuko bashakaga ko hiyandikisha abafite gahunda koko.

Ati “Ni ibintu twaganiriyeho, si ibintu navuga ko byavuye iriya bikikubita aho ngaho, byaganiriweho, ariko ikintu nyamukuru cyatumye afatwa si uko ari amafaranga menshi, ahubwo ni uko tuvuga tuti uzaba afite ubushake bwo kuyishyura, azaba afite mu by’ukuri impamvu ikomeye ituma aza mu mwuga w’itangazamakuru.”

Yongeyeho ati “Si umuntu wese uzaza ngo agiye gutanga ayo mafaranga, ngo narangiza ajye gukinisha itangazamakuru, ni ukuvuga ngo uwemeye kwishyura ayo mafaranga aba azi uburyo agiye gukora uwo mwuga, aba azi ukuntu agiye kubyungukamo.”

Mu byo ufite YouTube channel asabwa kugira ngo yiyandikishe muri RMC, uretse amafaranga 50.000 Frw, harimo kugaragaza umurongo igenderaho wayo (editorial line), kuba afite ikiranga ko ari umunyamakuru (ikarita ya RMC yemewe), mu gihe atari umunyamakuru asabwa kuba afite umunyamakuru wemewe uzajya uyikoraho bafitanye amasezerano y’akazi.

Umunyamabanga Nshingwabikorwa wa RMC, Mugisha Emmanuel yavuze ko kwiyandikisha bizafasha uwabikoze kuba yarengerwa n'amategeko nk'umunyamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .