Iki gikorwa cyaranzwe n’ibiganiro bitandukanye byatanzwe n’abarimo Magaju Aimable uhagarariye Abanyarwanda batuye muri North Dakota, Umugwaneza Nkurunziza Providence warokotse Jenoside yakorewe Abatutsi watanze ubuhamya n’abandi benshi.

Ni igikorwa cyitabiriwe n’ingeri zose z’abatuye North Dakota barimo President wa DSU University, Abanyamadini, Abayobozi b’ibigo, abanyamakuru, abahagarariye imiryango itegamiye kuri Leta,abana, urubyiruko n’ababyeyi bose bari bahurijwe hamwe no Kwibuka ku nshuro ya 30 Jenoside yakorewe Abatutsi.

Aimable Magaju, Umuyobozi wa Diaspora y’Abanyarwanda batuye muri North Dakota yibukije abitabiriye uyu muhango ko Kwibuka Jenoside yakorewe Abatutsi ari inshingano z’Isi yose.

Ati “Ni ngombwa kandi bikaba inshingano zacu kwibuka Jenoside yakorewe Abatutsi, mu rwego rwo kwirinda ko yazongera kubaho ukundi cyane ko n’abakiri bato bagira amahirwe yo kurushaho kumenya amateka bityo bikadufasha guhangana n’abayagoreka.”

Ubusanzwe Isi yose yibuka Jenoside yakorewe Abatutsi tariki 7 Mata, umunsi watangiriyeho ubwicanyi, icyakora bitewe n’uko muri North Dakota haba hakonje cyane, kuva mu 2015 Abanyarwanda batuye muri North Dakota batangiye Kwibuka mu mpera za Mata kugira ngo buri wese agire umwanya wo kwitabira iki gikorwa nta birantega agize nkuko byemejwe na Magaju.

Umunyamakuru Ally Soudy Uwizeye wari witabiriye iki gikorwa yavuze ko by’umwihariko ari ibyingenzi kuba iki gikorwa cyitabiriwe n’abakiri bato kuko ari umwanya mwiza kuri bo kwiga amateka ya Jenoside yakorewe Abatutsi.

Ati “Kwibuka Jenoside yakorewe Abatutsi uretse kuba ari uguha icyubahiro abarenga miliyoni bishwe, ni na bumwe mu buryo bwo kurwanya abayihakana ariko tunigisha abakiri bato ayo mateka twirinda ko yazongera kubaho ukundi.”

North Dakota ituwe n’Abanyarwanda barenga 300, Magaju akaba yashimiye inshuti zabo zifatanyije nabo, ahamya ko babana mu bihe bitandukanye bityo ari byiza ko bitabiriye iki gikorwa bakabafata mu mugongo.

Iki gikorwa cyatangijwe n'urugendo rwo Kwibuka

Abana bari mu bari bitabiriye uyu muhango ari benshi mu rwego rwo kwiga amateka

Abanyarwanda batuye muri North Dakota bibutse ku nshuro ya 30 Jenoside yakorewe Abatutsi

Iki gikorwa cyabimburiwe n'umunota wo Kwibuka Abishwe muri Jenoside yakorewe Abatutsi

Iki gikorwa cyitabiriwe n'inshuti z'Abanyarwanda zituye muri North Dakota

Providence Umugwaneza Nkurunziza, warokotse Jenoside yakorewe Abatutsi yaganirije abitabiriye uyu muhango ubuhamya bwe, uyu ni nawe washinze umuryango Kabeho Neza Initiative

Aimable Magaju uhagarariye Abanyarwanda batuye muri North Dakota ageza ijambo ku bitabiriye iki gikorwa

Abitabiriye iki gikorwa baganirijwe ku mateka ya Jenoside yakorewe Abatutsi mu 1994

Umubyinnyi wubatse izina mu mbyino gakondo, Icakanzu Contente yari mu bitabiriye iki gikorwa

Umunyamakuru Ally Soudy nawe ari mu bitabiriye iki gikorwa