00:00:00 IGIHE NETWORK KN KINYARWANDA EN ENGLISH FR FRANCAIS

Menya Abanyafurika 10 bamamaye ku ruhando rwa sinema mpuzamahanga (Amafoto)

Yanditswe na Kubwimana Yvan
Kuya 3 June 2022 saa 01:38
Yasuwe :

Uruganda rwa sinema rugenda rukura buri munsi, abakinnyi bamwe baraza bakakanyuzaho bakubaka izina ndetse bakanarikuramo amafaranga menshi.

Hari bamwe mu Banyafurika bafatiranye ayo mahirwe, aho bahindutse ibyamamare mu buryo bukomeye, babikesha impano yabo yo gukina filime neza.

Twifashishije ibitangazamakuru bitandukanye, tugiye kugaruka kuri bamwe mu Banyafurika bamaze kubaka izina ku ruhando mpuzamahanga muri sinema.

- Benjamin Onyango Ochieng

Benjamin Onyango ni umugabo ukomoka muri Kenya, wamamaye cyane muri sinema ku ruhando mpuzamahanga. Urugendo rwa Onyango rwatangiye ubwo yari amaze kwihugura mu bijyanye n’ikoranabuhanga, ariko akiyumvamo impano yo gukina filime.

Onyango watangiye gukina filime mu 1999, yamenyekanye muri filime zakunzwe ku rwego rw’Isi nka ’Default’, ’Tears of the Sun’ ndetse na ’God’s Not Dead’. Yashakanye na Elizabeth Onyango babyarana abana batatu ari bo Evelyn, Ida na Mary Onyango. Afite umutungo ubarirwa muri miliyoni 1,2$.

Benjamin Onyango Ochieng akomoka muri Kenya

- Chip Chung

Chipo Chung akomoka muri Zimbabwe, ni umwe mu byamamare muri sinema ya Amerika aho amaze kubaka izina rikomeye. Uyu mugore wavutse tariki ya 17 Kanama 1977, yari impunzi muri Tanzania ari naho ababyeyi be bari barahungiye.

Nyina ni Umushinwa mu gihe se ari we ukomoka muri Zimbabwe. Chung w’imyaka 44 yamamaye muri filime zitandukanye nka ‘In the Loop’, ‘Sun shine’, ‘Proof of The Badlands’, ‘Thomas & Friends’ n’izindi nyinshi. Yagiye mu rukundo inshuro imwe gusa ndetse kugeza ubu nta muntu bizwi bakundana. Abarirwa umutungo wa miliyoni 1,5$.

Chip Chung akomoka muri Zimbabwe

- Edi Gathegi

Ni umugabo ukomoka muri Kenya wamamaye cyane kubera ubuhanga budasanzwe agaragaza mu gukina filime. Yavukiye i Nairobi mu 1979, nyuma baza kwimukira i California muri Leta Zunze Ubumwe za Amerika.

Inkuru y’uyu mugabo iratangaje kuko yatangiye gukina filime mu buryo atari yarigeze ateganya, kuko yabanje guhura n’imvune yatumye adakomeza gukora siporo, ibintu yumvaga azagira umwuga. Yatangiye kujya kureba filime, birangira yisanze azikina.

Mu 2006 ni bwo bwa mbere yagaragaye muri filime, yamamara mu zirimo ’Pimp’, ’Prince of the Low’, ’The Watch’, ’The Harder They Fall’ ndetse n’izindi zitandukanye zamwinjirije akayabo, akaba abarirwa umutungo wa miliyoni 3$.

Edi Gathegi akomoka muri Kenya

- Tanit Phoenix

Tanit Phoenix akomoka muri Afurika y’Epfo, akaba ari umwe mu bakinnyi bakomeye cyane mu ruganda rwa sinema, aho abifatanya no kuba umunyamideli kandi ukomeye. Yamenyekanye muri filime nka ‘Lost Boys: The Thirst’, ‘Spud and Death Race: Frankenstein Lives’ n’izindi.

Tanit yavutse mu 1980, mu Mujyi ka Durban muri Afurika y’Epfo. Yinjiye mu bigendanye na sinema mu 2003, mu 2016 ashakana na Sharlto Copley babyaranye umwana umwe.

Abarirwa umutungo wa miliyoni 5$.

Tanit Phoenix akomoka muri Afurika y’Epfo

- Peter Mensah

Yamamaye muri filime zitandukanye nka ‘Avatar’, ‘300 rise of Empire’, ‘The Incredible Hulk’, n’izindi, ni umwe mu bagabo Isi yamenye bitewe n’ubuhanga bwe mu gukina filime, umwuga yatangiye mu 1995.

Yavukiye muri Ghana mu gace ka Chira, mu Burasirazuba bw’icyo gihugu, hari tariki ya 27 kanama 1959, ubu afite imyaka 62. Kuva yatangira gukina filime, amaze kwinjiza akayabo ka miliyoni 3$.

Mensah yigeze kuvugwa cyane mu itangazamakuru ubwo yabazwaga impamvu adashaka umugore, akavuga ko atabona umwanya wo kwita ku muryango we no gukundana.

Peter Mensah akomoka muri Ghana

- Liya Kebede

Liya Kebede ni umwe mu bagore b’Abanyafurika bamamaye cyane muri sinema ku rwego mpuzamahanga. Yakinnye muri filime nka ‘Desert flowers’, ‘Lord War’, ‘The Best Offer’ n’izindi. Ni umwe mu bagore bake b’Abirabura bakunda kugaragara muri filime zo muri Aziya.

Kebebe usanzwe ari n’umunyamideli ukomeye, yavutse tariki ya 1 werurwe mu 1978, i Addis Ababa muri Ethiopia. Mu 2015, Ikinyamakuru Afrizap cyamushyize mu banyamideli 10 ba mbere beza muri Afurika, bituma ubwamamare bwe burushaho kwiyongera.

Ni umwe mu bagore b’Abanyafurika bakize, aho abarirwa umutungo wa miliyoni 18$. Mu 2000 yashakanye na Kassy Kebede baza gutandukana mu 2015 bamaze kubyarana abana babiri.

Liya Kebede akomoka muri Ethiopia

- Arnold Vosloo

Arnold Vosloo akomoka muri Afurika y’Epfo, yavukiye mu muryango w’indwanyi kuko se umubyara yari umwe mu barwana bagahabwa amafaranga. Ibi byatumye nawe abikuriramo, ariko amaze gusoza amasomo, ahitamo kwinjira mu mwuga wo gukina sinema.

Ku myaka 59 afite, Vosloo yatangiye ibigendanye na sinema ahagana mu 1984, amaze kubikuramo akayabo ka miliyoni 4$. Yamamaye muri filime zirimo ‘The Mummy’, ‘The Rise of the Cobra and The Precious One’ n’izindi.

Yashakanye na Nancy Mulford mu 1988, batandukana nyuma y’imyaka itatu. Bongeye gukundana baza gushyingiranwa mu 1998, kugeza ubu baracyari kumwe. Arnold afite umwana umwe w’umuhungu.

Arnold Vosloo akomoka muri Afurika y’Epfo

- Lupita Nyong’o

Uretse no mu bakinnyi ba filime, Lupita ni umwe mu Banyafurika bazwi cyane ku rwego rw’Isi. Uyu mukobwa ukomoka muri Kenya ni umwe mu bakinnyi beza ku Isi muri sinema.

Lupita yavutse ku tariki ya 1 Werurwe mu 1983, avukira mu Mujyi wa Mexico muri Mexique aho umuryango we wari warahungiye kubera impamvu za politike. Uyu mukobwa avuka mu muryango w’abana batandatu, akaba uwa kabiri.

Ataruzuza umwaka umwe, we n’umuryango we bongeye gusubira iwabo muri Kenya maze uyu mukobwa yongera kuhava amaze kugira imyaka 18, asubira muri Mexique kwiga ururimi rwa Espagnol.

Mu 2005 nibwo yatangiye urugendo rwa sinema maze akina muri filime zirimo ‘Queen of Katwe’, ‘The star wars’, ‘Us’, ‘Black Panther’ ndetse n’izindi nyinshi zatumye yinjiza akayabo k’asaga miliyoni 10$.

Lupita Nyong'o akomoka muri Kenya

- Djimon Hounsou

Djimon Hounsou ni umukinnyi wamamaye cyane ku Isi mu gukina filime, akaba akomoka muri Benin. Yavutse tariki ya 24 Mata 1964, avukira mu Murwa Mukuru w’icyo gihugu, Cotonou.

Djimon Hounsou w’imyaka 58, yatangiye urugendo rwa sinema mu 1986, ubwo we n’umuvandimwe we Edmond bari bimukiye i Paris mu Bufaransa. Hounsou yaje kuva mu ishuri, ariko aza kugira amahirwe yo guhura n’umufotozi wabafashije kubahindura abanyamideli, batangira kwamamara gutyo.

Mu 1989 yatangiye kujya agaragara mu mashusho y’indirimbo z’abahanzi zirimo ‘Straight up’ ya Paula Abdul, ‘Love will never do (without you)’ ya Janet Jackson ndetse n’izindi zo muri ibyo bihe.

Mu mwaka wakurikiyeho, uyu mugabo yaje kuva mu Mujyi wa Paris yimukira muri Leta Zunze Ubumwe za Amerika, aho yahuriye na Sandra Bernhard nawe akamufasha kwinjira muri filime zisetsa (comedy), atangirira ku yitwa ‘Without you I’m nothing.’

Uyu mugabo yakinnye muri filime zirimo Blood Diamond’, ‘Guardians of the Galaxy’, ‘Gladiator’ ndetse n’izindi zitandukanye.

Mu rugendo rwe rw’urukundo, Djimon Hounsou yashakanye na Kimora Lee Leissner babyarana umwana umwe. Uyu mugabo amaze kugwiza akayabo ka miliyoni 12$.

Djimon Hounsou akomoka muri Benin

- Charlize Theron

Charlize Theron akomoka muri Afurika y’Epfo, akaba ari umwe mu bagore ba mbere bahembwa agatubutse mu gukina filime, kuko ashobora gukorera hagati ya miliyoni 12$ kugera kuri miliyoni 18$ kugira ngo agaragare muri filime wamutumiyemo.

Uyu mugore yabitangiye ari umubyinnyi ndetse n’umunyamideli ku ishuri yigagaho muri Leta ya New York muri Amerika, gusa aza kubivamo atangira gukina filime. Yamamaye mu zirimo ‘Men of Honor’, ‘Aeon Flux’, ‘Hancock’, ‘Monster’ ndetse n’izindi zitandukanye.

Kuva yatangira gukina filime, amaze gukorera asaga miliyoni 170$. Mu 2002 yashakanye na Stuart Townsend batandukana mu 2009. Mu 2013 yashakanye na Sean Penn bamarana imyaka ibiri nawe baratandukana. Charlize afite abana babiri.

Charlize Theron akomoka muri Afurika y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .