00:00:00 IGIHE NETWORK KN KINYARWANDA EN ENGLISH FR FRANCAIS

Abamunzwe n’ingengabitekerezo ya Jenoside, abirengagiza ukuri, Kwibuka mu bihe bya Covid-19…Ikiganiro na Dr Bizimana

Yanditswe na Akayezu Jean de Dieu
Kuya 4 Mata 2021 saa 07:20
Yasuwe :
0 0

Kuva tariki 7 Mata buri mwaka, Abanyarwanda bifatanya n’Isi yose gutangira icyumweru cyahariwe Kwibuka Jenoside yakorewe Abatutsi mu 1994, igahitana ubuzima bw’inzirakarengane z’Abatutsi barenga miliyoni bishwe bazira uko baremwe.

Kwibuka Jenoside yakorewe Abatutsi mu 1994 byemejwe n’Umuryango w’Abibumbye ariko by’umwihariko mu Rwanda, kwibuka biteganywa n’Itegeko Nshinga ndetse mu 2018, hagiyeho itegeko ryihariye ryerekeranye n’icyaha cy’ingengabitekerezo ya jenoside n’ibyaha bifitanye isano na yo.

Komisiyo y’Igihugu yo kurwanya Jenoside, CNLG itangaza ko n’ubwo hategerejwe icyemezo cy’abagize Guverinoma ku bijyanye n’uburyo kwibuka ku nshuro ya 27 Jenoside yakorewe Abatutsi bizakorwa, imyiteguro ijyanye no kubikora hubahirizwa amabwiriza yo kwirinda ikwirakwira rya Covid-19 igeze kure.

Mu kiganiro cyihariye na IGIHE, Umunyamabanga Nshingwabikorwa wa CNLG, Dr Bizimana Jean Damascène yagarutse ku bijyanye n’uburyo buteganywa gushyirwaho ibyo bikorwa byose byakorwamo, abagaragaraho ibikorwa by’ingengabitekerezo mu bihe byo kwitegura kwibuka n’ibindi.

Dr Bizimana avuga ko Kwibuka Jenoside yakorewe Abatutsi bigomba kuba kuko biteganywa n’itegeko ariko hakazabaho kubahiriza amabwiriza yo kwirinda icyorezo cya Covid-19.

Ati “Igikorwa cyo kwibuka kizaba, icyo ni icya mbere twashimangira, ariko kizaba hubahirizwa amabwiriza yo kwirinda Covid-19 uko azaba ateye. Ngira ngo biranagaragara ko gushobora kujya kwibukira ahantu hiciwe abantu uko twajyaga tubigenza byo ntibizakunda.”

CNLG kandi iherutse kumurika igitabo kigaruka ku mateka ya Jenoside yakorewe Abatutsi muri buri gace by’umwihariko aho kitezweho kwifashishwa muri ibi bihe byo kwibuka mu rwego rwo gukomeza kwibutsa amateka.

Dr Bizimana avuga kandi ko mu bihe byo kwibuka hazifashishwa ikoranabuhanga mu guha urubuga abantu batandukanye bagiye bandika ibitabo n’abakoze ubushakashatsi kuri Jenoside yakorewe Abatutsi.

Ibikorwa bitegura kwibuka mu buryo bushya

Mu rwego rwo kwitegura kwibuka Jenoside yakorewe Abatutsi, hari bimwe mu bikorwa byajyaga bijyana n’imyiteguro birimo icyiswe ‘Rubyiruko menya Amateka’, cyakorwaga na CNLG ku bufatanye na Minisiteri y’Urubyiruko n’Umuco.

Urubyiruko ruturutse hirya no hino rwasuraga Urwibutso rwa Jenoside rwa Kigali ruri ku Gisozi, bakanasura Ingoro Ndangamurage y’Urugamba rwo Kubohora Igihugu no Guhagarika Jenoside iri ku Nteko Ishinga Amategeko y’u Rwanda.

Banahabwaga ibiganiro ku mateka ya Jenoside ndetse no ku rugamba rwo kubohora igihugu. Iki gikorwa kimwe n’ibindi , umwaka ugiye kuba uwa kabiri bitabasha kuba ndetse n’ibikorwa byo kwibuka biba mu buryo budasanzwe kubera icyorezo cya Covid-19.

Dr Bizimana avuga ko n’ubwo ibikorwa bitegura kwibuka by’umwihariko kuri iyi nshuro ya 27 bigeze igihe u Rwanda kimwe n’Isi yose ruhanganye n’icyorezo cya Covid-19, hari uburyo bwo kwifashisha ikoranabuhanga mu gutanga ibiganiro by’umwihariko mu mashuri makuru na za kaminuza.

Ati “Twanakomeje ibikorwa mu rubyiruko twifashishije imbuga nkoranyambaga duhugura imiryango, amashyirahamwe atandukanye mu kubaha ubumenyi kuri Jenoside kuko ikibazo kinini bafite, abenshi bavutse Jenoside yarabaye […]ubumenyi bayifiteho si bwinshi, twafashe umwanya tubaha amahugurwa tubinyujije mu ikoranabuhanga.”

Avuga ko ubusanzwe n’ubwo icyorezo cya Covid-19 cyakomye mu nkokora gahunda zitandukanye ariko muri rusange ibiganiro bitangwa mu mashuri by’umwihariko urubyiruko bitanga umusaruro ukomeye cyane.

Ati “Tunabirebera mu bibazo abana babaza, kuko usanga batugaragariza ko ibiganiro tubaha bituma bongera ubumenyi kubwo bavana mu ngo zabo n’ubwo bigishwa mu mashuri kuko mu mashuri nta mwanya uhagije […] yego hari isomo ry’amateka ariko ntabwo ari iryihariye kuri Jenoside.”

Yakomeje agira ati “Ikindi gifasha, urubyiruko ruri mu gihugu babona kiyobowe neza, kibaha ubwisanzure, kibaha ibyo gishoboye kubona kugira ngo imibereho yabo itungane. Ugasanga barifuza kuba bahabwa ibiganiro kenshi, bakifuza gusura inzibutso. Ubu twari twarabitangiye ariko kubera Covid-19, twasabye ko abanyeshuri basura inzibutso z’aho begereye bagasangayo abakozi baho bakabasobanurira amateka.”

Dr Bizimana avuga ko ubu buryo bwo kujyana abantu ku nzibutso bagasobanurirwa amateka yaho bari batekereje uburyo byakwagurwa ku buryo n’inama zitandukanye z’abaturage zajya zibera ku nzibutso, abakora inama bakaganirizwa ku mateka y’urwo rwibutso n’aya jenoside muri rusange.

Imyaka 27…hari abakirengagiza ukuri

Ubushinjacyaha bw’u Rwanda buherutse gushyira hanze icyegeranyo kigaragaza ishusho y’ingengabitekerezo ya Jenoside n’ibyaha bifitanye isano nayo mu myaka itatu ishize, aho kugeza muri Kamena 2020, amadosiye 949 ajyanye n’ingengabitekerezo ya Jenoside yinjiye mu bushinjacyaha, akurikiranywemo abantu 1172.

Ni umubare uri hejuru cyane ko kuri ubu hashize imyaka 27, Jenoside yakorewe Abatutsi ibaye, abantu bose by’umwihariko abanyarwanda bagakwiye kuba bazi ukuri kw’ibyabaye ndetse baharanira ko bitazongera.

Dr Bizimana avuga ko iyo urebye amateka y’ingengabitekerezo ya Jenoside yakorewe Abatutsi mu Rwanda usanga ari maremare ku buryo yasize ibisigisigi.

Ati “Ubundi nta mpamvu yagombye kuba ihari ituma ukuri kuri Jenoside yakorewe Abatutsi hari ukwirengagiza n’umwe.”

Amateka agaragaza ko gutangira kwigisha urwango ku batutsi ku mugaragaro byatangiye mu 1957 bitangirana n’inyandiko yiswe Manifeste y’abahutu yasohotse tariki 24 Werurwe muri uwo mwaka ikaba yaranditswe n’abantu icyenda biganjemo abize mu Iseminari.

Mu byari bikubiye muri iyo Manifeste y’Abahutu harimo ko ibibazo by’akarengane Abahutu bagiriwe byaterwaga n’Abatutsi kandi mu by’ukuri ari ibibazo byazanywe n’Abakoloni na bamwe mu Bamisiyoneri.

Dr Bizimana ati “Iyo ngengabitekerezo rero yatangiye ityo noneho mu 1959 irakomera, hajyaho amashyaka ya politiki ashingira ku moko noneho aza yigisha urwango ku batutsi.”

Yifashishije urugero rw’Ishyaka riharanira Iterambere n’Imibereho myiza y’Abahutu, Parmehutu, avuga ko ryaje no kuba ariryo riyobora igihugu [Kuva mu 1962-1973, riyobowe na Kayibanda] kandi icyo gihe ngo utari Umuhutu ntabwo washoboraga kuryinjiramo.

Ati “Banashyiraho n’uburyo bwo gukoresha iryo cengezamatwara yabo, banakoresha abahanzi […] Parmehutu yari ifite korali y’abahanzi bitaga Abanyuramatwi, bakaririmba iyo politiki igaragaza ko abahutu barenganye ko igihugu kigomba kuba icyabo. Iyo ngengabitekerezo urumva hari abantu yagiyemo rwose bakabifata nk’ukuri.”

Dr Bizimana agaragaza ko hagiye habaho guhererekanya iyo ngengabitekerezo abari abana barakura barayikurana biza kugeza no kuri Jenoside yakorewe Abatutsi.

Ati “Murumva ko abo bantu rero, ni nabo bateguye Jenoside mu 1994, FPR irabarwanya irabatsinda. Abize ni bake cyane bagize uruhare muri Jenoside banayemera, bigaragara rero ko ibyo bisigisigi bigihari.”

Yakomeje agira ati “Ni abayivukiyemo cyangwa abo bayitoje badashaka kuyireka. Ariko icyo dushima ni uko abo bantu ni bake cyane, ikindi n’iyo unagiye mu mateka ya za Jenoside zose, igice cy’ipfobya kiza aricyo gisoza ikorwa rya Jenoside. Ipfobya rero ribaho ariko abo ni ababa birengagiza ukuri.”

Ku rundi ruhande ariko hari abahakana bakanapfobya Jenoside yakorewe Abatutsi kubw’inyungu runaka. Nk’abanyamakuru cyangwa abashakashatsi bumva ko babivanamo ubushakashatsi bubahemba.

Muri abo harimo Umushakashatsi w’Umubiligi Filip Reyntjens, wigize inzobere mu mateka y’u Rwanda ndetse wanagize uruhare mu kwandika Itegeko Nshinga ku bwa Perezida Habyarimana mu 1978, itegeko ryimikaga ko hagomba kubaho ishyaka rimwe rukumbi, hagomba gutegeka ubwoko bumwe gusa ndetse n’Abatutsi bageze mu mashuri bakaba bagomba kutarenga 10%.

Dr Bizimana ati “Ugasanga rero mu bushakashatsi bwe ariyita umushakashatsi ariko muby’ukuri icyo akomeza ni ya ngengabitekerezo y’urwango, y’ivangura, ya Jenoside yanakoze igihe yari mu Rwanda ari Umujyanama wa Perezida Habyarimana.”

Hari abandi barimo Umunyamakuru Judi River umaze iminsi asohoye igitabo kivuga ngo ‘L’éloge du sang, Les crimes du Front Patriotique Rwandais’ , ashaka kuvuga ugenekereje mu Kinyarwanda ngo ‘Ibigwi by’Amaraso’ aho avugamo ko mu Rwanda habaye za Jenoside ebyiri.

Dr Bizimana ati “Abapfobya icyo nicyo kintu bitwaza, bafata abahagaritse Jenoside, nabo bakavuga ko bakoze ubwicanyi kugira ngo nabo bateshe agaciro ya Jenoside.”

Yakomeje agira ati “Ibi byose rero nta mpungenge bidutera. Buriya abantu bapfobya bakanahakana Jenoside ni abantu bake cyane ariko iyo umuntu asenya ibyo akora biragaragara kurusha ibyiza. Niko bimeze ibibi bigaragara kenshi kurusha ibyiza. Urubyiruko rwinshi dufite bamaze kugenda basobanukirwa amateka by’umwihariko baziko Jenoside yabaye ni imwe, Jenoside yakorewe Abatutsi mu 1994.”

Abamunzwe n’Ingengabitekerezo ya Jenoside barye bari menge

By’umwihariko iyo itariki yo kwibuka abazize Jenoside yakorewe Abatutsi yegereje, usanga ba bandi bagize uruhare mu kuyitegura, abayikoze bakihishahisha mu mahanga n’abandi bafashe umurongo wo kujyana nabo badukana ingengabitekerezo. Ibi byose abenshi babikorera ku mbuga nkoranyambaga.

Uko umutima w’ibyo bakoze ubakomanga, niko bagerageza gutoneka abarokotse Jenoside cyangwa bakagerageza gushaka kuyipfobya ariko byose usanga babikora kubw’ipfunwe baba bagira ngo bakomeretse abarokotse, kugira ngo barebe uko baha intebe ikinyoma.

Dr Bizimana ati “Bene abo rero bagira n’ababafasha, hari abanyamahanga baba barakoranye na Leta, abayifashije gushyiraho iriya politiki y’urwango, abahaye leta intwaro zo kwica. Abo rero bafite ubufatanyacyaha, nabo baragira ngo bahishe ubufatanya cyaha bwabo.”

Iterambere ry’ikoranabuhanga rigendana n’ibibi byinshi birimo abarikoresha mu nyungu zabo zigamije kuyobya rubanda cyangwa kubacengezamo amatwara, imyumvire n’ibitekerezo byabo birimo n’ingengabitekerezo ishobora kuganisha kuri Jenoside cyangwa kwibasira igice cy’abantu runaka.

Dr Bizimana atanga ingero z’imiyoboro ya YouTube inyuzwaho imvugo zinyuranya n’ibiteganywa n’itegeko ry’ingangabitekerezo ya Jenoside, guhakana no kuyipfobya.

Muri Gashyantare 2021, nibwo uwitwa Idamange Iryamugwiza Yvonne [kuri ubu ukurikiranywe n’inkiko ku byaha bitandukanye], yifashishije imbuga nkoranyambaga by’umwihariko YouTube atangaza amagambo arimo menshi agaragazwa nk’apfobya Jenoside yakorewe Abatutsi nk’aho yavuze ko imibiri y’abazize Jenoside iri mu nzibutso yabaye igicuruzwa.

Uyu mubyeyi w’imyaka 43 yavuze ko Coronavirus ari iturufu igihugu gikoresha nk’uko Jenoside yakorewe Abatutsi ari iturufu ndetse akanongeraho ko imibiri y’Abatutsi bishwe muri Jenoside iri ku nzibutso icuruzwa igihugu kikavanamo amadovize ngo abarokotse Jenoside babayeho nabi.

Dr Bizimana avuga ko kimwe n’abandi bose abagikomeje kubatwa n’ingengabitekerezo ya Jenoside, bakwiye kumenya ko itegeko rihari kandi bazagongana naryo.

Itegeko ryo mu 2018 ryerekeranye n’icyaha cy’ingengabitekerezo ya jenoside n’ibyaha bifitanye isano na yo rivuga ko guhakana Jenoside bishingiye ku kuvuga cyangwa kugaragaza ko jenoside atari jenoside; kugoreka ukuri kuri jenoside agamije kuyobya rubanda;kwemeza ko mu Rwanda habaye
jenoside ebyiri no kuvuga cyangwa kugaragaza ko Jenoside itateguwe.

Rikomeza rivuga ko gupfobya Jenoside bigizwe no kugabanya uburemere cyangwa ingaruka za jenoside; koroshya uburyo jenoside yakozwemo no kugaragaza imibare itari yo y’abazize Jenoside.

Uhamijwe icyaha cyo gupfobya Jenoside cyangwa kuyihakana kuri buri kimwe ahanishwa igifungo kitari munsi y’imyaka itanu ariko kitarenze imyaka irindwi n’ihazabu y’amafaranga y’u Rwanda atari munsi y’ibihumbi magana atanu ariko atarenze miliyoni imwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .