Abakora ingendo Kigali-Rubavu bagiriwe inama mu gihe Musanze hafashwe ingamba zihariye

Yanditswe na Ferdinand Maniraguha
Kuya 16 Ukuboza 2020 saa 12:12
Yasuwe :
0 0

Minisitiri w’Ubutegetsi bw’igihugu, Prof Shyaka Anastase, yavuze ko abakora ingendo Kigali-Rubavu bakwiriye guhindura imikorere, mu gihe Umujyi wa Musanze washyizwe ku ngamba zihariye kubera ubwandu bwa Coronavirus bumaze iminsi bwiyongera muri uwo mujyi.

Inama y’Abaminisitiri yateranye ku wa 14 Ukuboza 2020, yashyizeho ingamba nshya zigamije gukumira ubwiyongere bw’icyorezo cya Coronavirus, gusa ni ingamba zigaragaramo umwihariko wahawe Umujyi wa Musanze ugereranyije n’ibindi bice bitandukanye by’igihugu.

Mu ngamba zihariye zafatiwe Umujyi wa Musanze harimo ko ingendo zibujijwe guhera saa moya z’ijoro kugeza saa kumi za mu gitondo mu gihe ahandi zibujijwe guhera saa mbiri z’ijoro, harimo kandi ko inama zibujijwe mu gihe cy’ibyumweru bitatu uhereye ku itariki ya 15 Ukuboza 2020.

Kubera izo ngamba, bivuze ko imodoka ivuye Rubavu ijya i Kigali ishobora kugera mu Mujyi wa Musanze isaha zageze, nyamara aho igana isaha zo kuva mu nzira zitaragera bikabangamira abagenzi.

Mu kiganiro n’abanyamakuru kuri uyu wa Gatatu, Minisitiri Shyaka yavuze ko abagenzi bakwiriye gufata ingamba zirimo kunyura mu duce tutafatiwe ingamba zihariye.

Yagize ati “Hari uburyo bubiri niba uva Rubavu ujya Kigali, ushobora kunyura Ngororero, Muhanga ugakomeza. Ushaka gukomeza guca Musanze, twafatanyije na Polisi n’izindi nzego bihabwa umurongo.”

Minisitiri Shyaka yavuze ko iyo bigaragara ko aho ujya uranyura aho Musanze itangirira n’aho irangirira “Polisi iraguherekeza ariko ntabwo aribyo dushyize imbere […] ubundi uw’inkwakuzi na saa moya yaba yageze mu rugo.”

Umuvugizi wa Polisi y’u Rwanda, CP John Bosco Kabera yavuze ko atari ngombwa gutegereza ko Umujyi wa Musanze bawufunga ngo abantu bakore ingendo, ahubwo ashishikariza abagenzi banyura muri izo nzira guhaguruka kare kugira ngo bahanyure hatarafungwa.

Minisiteri y’Ubuzima yatangaje ko Musanze yahawe amabwiriza yihariye kuko ubushakashatsi bwahakozwe mu cyumweru gishize, bwasanze 13 % by’abapimwe, baranduye Coronavirus. Ni ibimenyetso Minisitiri Dr Ngamije Daniel yavuze ko biteye inkeke mu bijyanye no kwirinda icyorezo ariyo mpamvu hafashwe ingamba zidasanzwe.

Umujyi wa Musanze washyizwe mu ngamba zihariye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .