OIF yatanze miliyari 3 Frw mu kigega cyo kugoboka abagore b’Abanyafurika bahungabanyijwe na COVID-19

Yanditswe na Uwimana Abraham
Kuya 2 Mutarama 2021 saa 12:37
Yasuwe :
0 0

Umunyamabanga Mukuru w’Umuryango w’Ibihugu bivuga Ururimi rw’Igifaransa (OIF), Louise Mushikiwabo, yahamagariye imiryango itegamiye kuri Leta, abaturage bafite ishyaka na za leta z’ibihugu gutanga inkunga mu kigega cya “La Francophonie avec Elles”, cyashyiriweho gufasha abagore bagizweho ingaruka n’icyorezo cya COVID-19.

OIF irangajwe imbere na Mushikiwabo muri icyo kigega yatanzemo miliyoni 3 z’Amayero, akabakaba miliyari 3 Frw kugira ngo ibashe gutera inkunga imishinga 1 400 imaze kwakira ivuye mu bihugu bya Afurika, Haiti na Liban.

Ni igikorwa kigikomeza hashakishwa inkunga ihagije yo kugoboka abagore bo muri Afurika bahungabanyijwe n’ingaruka za Covi-19.

Mu nyandiko Mushikiwabo wabaye Minisitiri w’Ububanyi n’Amahanga w’u Rwanda yanyujije kuri Jeune Afrique, yagaragaje ko abagore bagira ubwitange buhambaye, bitangira imiryango yabo na sosiyete muri rusange, ko bahora bashyira imbaraga mu gushakira ibyiza ababegereye no gutuma babaho batekanye.

Yagize ati “Bita ku bakuze, bita ku myigire y’abana babo, hakiyongeraho gukora imirimo imwe n’imwe idatekanye. Nibo babyuka mbere y’abandi bantu bose kandi bakaryama nyuma ya bose, bagira umunaniro n’uburibwe bwinshi kandi buri gihe aho kugira ngo binube ahubwo basubizanya inseko.”

Yakomeje avuga ko abagore bakora imirimo itandukanye harimo abikorera, abanyabugeni n’abahinzi bari mu bashegeshwe cyane n’icyorezo cya COVID-19.

Ati “Aba barwiyemezamirimo b’abagore, abanyabugeni, abahinzi, aba bakobwa bato bavuye mu ishuri, bari guhura n’ingaruka zikomeye za COVID-19. Ntibashoboye kugira aho bajya, kugurisha ibicuruzwa byabo cyangwa kurangura, abenshi muri bo batakaje aho binjirizaga, ntibabashije kubona serivisi z’ibanze cyangwa ngo hageho ingamba zo kubafasha.”

Yongeyeho ati “Nibo bagize 70% y’abakora mu nzego z’ubuzima ku Isi yose, ikindi kandi nibo bahora ku murongo w’imbere mu rugamba rwo guhangana n’icyorezo.”

Mushikiwabo yavuze ko usanga ahanini abagore batari mu myanya yo gufata ibyemezo bijyanye no guhangana n’icyorezo, mu gihe aribo cyagiye gikoraho cyane kuko ahanini usanga ari bo biganje mu bakora imirimo itanditse.

Imirimo itanditse ikunze kuba yiganjemo abagore kurusha abagabo, biterwa n’uko akenshi usanga aribo bafite ikigero cy’amashuri bize kiri hasi.

Mushikiwabo ati “Nk’uko byagiye bigenda no mu bindi biza, abagore berekanye kwihangana, gutekereza no guhanga udushya, kugira ngo babone ibyangombwa nkenerwa. Birihutirwa cyane rero uyu munsi, gushyigikira aba bagore n’abakobwa bashegeshwe n’icyorezo, ubuzima bwabo burababaje, by’umwihariko muri Afurika.”

Yongeyeho ko ubukungu bwa Afurika muri rusange bwagizweho ingaruka n’icyorezo, ubucuruzi bwambukiranya imipaka, inkunga zigamije iterambere n’ihererekanywa ry’amafaranga biragabanuka ndetse ibyiciro byose by’umwihariko imibereho y’abagore b’Abanyafurika byasubiye inyuma.

Ati “Kugira ngo rero babashe gusohoka muri izi ngaruka bemye bifashishije ubumenyi karemano, aba babyeyi, aba bakobwa, aba ba nyogokuru, izi nshuti, aba bashiki bacu bakuru, baradukeneye cyane kuruta mbere.”

“Ni ku bwabo niyemeje gukora ubukangurambaga muri OIF. Kuva mu mpeshyi ya 2020 no ku bufatanye bw’ibihugu binyamuryango, twatangije ikigega “La Francophonie avec Elles”, gitanga ubufasha bw’amafaranga ndetse n’ubwa tekiniki ku bagore n’abakobwa barenga ibihumbi batishoboye.”

Mushikiwabo yakomeje ashishikariza imiryango itegamiye kuri leta, abaturage bafite ubushake, imiryango mpuzamahanga, za leta na za guverinoma, gushyigikira iki kigega.

Ati “Uyu munsi aba bagore n’abakobwa barabakeneye kuruta mbere, bakeneye ibikorwa bifatika mu gushyigikira iterambere ryabo, ubukangurambaga bwa buri wese ni ingenzi ku bwo gushyigikira iki kigega na gahunda yacyo y’igihe kirekire.”

Yongeyeho ati “Ushobora gutanga inkunga ako kanya mu kigega, kubikora ni ugufasha abandi bagore n’abakobwa kugera ku bushobozi bwabo bwuzuye, no kugira uruhare bakaba umusemburo mwiza w’impinduka n’iterambere, bakagira uruhare mu kubaka Isi ibereye buri wese.”

“Reka duhuze imbaraga n’ubushobozi, tubikoreye kandi tubikoranye n’abagore n’abakobwa.”

Ingaruka z’icyorezo cya COVID-19 ku bagore no mu Rwanda zagiye zigarukwaho ndetse hashyirwaho gahunda zigamije kubafasha. Imibare yo mu Ugushyingo 2020 igaragaza ko iki cyorezo cyazamuye umubare w’ubushomeri mu bagore kuko nyuma yo gusubukura imirimo abagore basubiye mu kazi bangana na 1.7% mu gihe abagabo bagasubiyemo ari 4.6%.

Umunyamabanga Mukuru wa OIF, Louise Mushikiwabo, yasabye abatuye Isi gufasha abagore b'Abanyafurika bagizweho ingaruka na COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .