Abadepite basabye HEC gukemura ikibazo cy’abize i Burundi bagatinda kubona ‘Equivalences’

Yanditswe na Ferdinand Maniraguha
Kuya 4 Ukuboza 2019 saa 08:32
Yasuwe :
0 0

Abadepite bagize Komisiyo y’Uburezi, Ikoranabuhanga, Umuco n’Urubyiruko basabye Inama y’Amashuri Makuru na za Kaminuza (HEC) gukemura vuba ikibazo cy’abanyeshuri bize i Burundi bagatinda guhabwa ibyemeza ko Impamyabumenyi bahawe zemewe gukoreshwa mu Rwanda (equivalences).

Abanyeshuri bageze ku icyenda bize ubuforomo muri Hope Africa University y’i Burundi bandikiye iyo Komisiyo bavuga ko HEC yatinze kubaha equivalence zabo, bikaba biri kubagiraho ingaruka zo kuba batabasha kujya gushaka akazi.

Bimwe mu byo abo banyeshuri bavuga nkuko baherutse kubitangariza IGIHE, ngo ni uko HEC yanze kubaha equivalences zabo kubera ko uburyo bw’imyigire bukoreshwa i Burundi butandukanye n’ubwo mu Rwanda.

Abo banyeshuri bashaka Impamyabumenyi y’Icyiciro cya Kabiri cya Kaminuza bavuze ko bize uduce tw’amasomo (credits) 180 mu gihe mu Rwanda biga uduce tw’amasomo 480.

Abo banyeshuri bavuze ko nubwo bize uduce tw’amasomo tutangana n’utwo mu Rwanda, ngo buri gace bakigaga amasaha akubye kabiri ayo mu Rwanda bigisha, bakavuga ko ntacyo mu Rwanda bigisha bo batize.

HEC yasabaga abo banyeshuri gutegereza Kaminuza bizeho igatanga inyandiko zigaragaza birambuye amasomo bigisha nuko bayigisha kugira ngo bagenzure niba ibyo mu Rwanda bigisha ari nabyo iyo kaminuza yigishije.

Umuyobozi wa HEC, Dr Rose Mukankomeje, yavuze ko batinangiye gutanga equivalences nkuko abo banyeshuri babivuga ahubwo ngo batinze gusubizwa n’ubuyobozi bwa kaminuza y’i Burundi bituma no gusubiza abanyeshuri bitinda.

Yagize ati “Mu ibaruwa ya bariya banyeshuri bavugaga ko barenganyijwe, ko bibwe equivalence kandi barize, ntabwo ari byo. Ibyo bavuga ko bazibuze sibyo wenda koko twakererewe. Uburyo utanga equivalence ntabwo ari ikintu cy’ako kanya, urabanza ukareba niba umunyeshuri yaragiye afite ibyangombwa, ukareba ibyo yize n’izo porogaramu ukazigereranya.”

Yakomeje agira ati “Uburyo bwo gutanga equivalence ni ikintu gisaba ubushishozi kigasaba no gukorana n’aho umunyeshuri yize.”

Umuyobozi w’Ishami rishinzwe guteza Imbere Uburezi muri HEC, Dr. Ndikubwimana Théoneste, yavuze ko babanje no gusuzuma ibyo umunyeshuri aba yarize mu mashuri yisumbuye kugira ngo barebe niba bihura n’ibyo yize muri Kaminuza.

Yavuze ko muri abo banyeshuri, hari abo basanze barize indimi cyangwa ubuvuzi bw’amatungo mu mashuri yisumbuye nyamara bakajya kwiga ubuvuzi bw’abantu muri kaminuza, ibintu bidakorwa mu Rwanda.

Mukankomeje yavuze ko bagiye gushyiramo ingufu, bagashaka abantu bose bize kuri Hope Africa University batabonye equivalence zabo, ibyangombwa byabo bigasuzumwa buri wese akamenya aho ahagaze.

Ati “Twavuze ko tugiye gushaka abantu bize kuri iyi kaminuza ya Hope turebe abasabye, turebe abo twahaye turebe n’abo tutaraha tubabwire impamvu. Icyo turagikora vuba bishoboka.”

Yavuze ko bari gukorana n’ubuyobozi bw’amashuri makuru na Kaminuza mu Burundi, gusa yumvikanisha ko uzaba atujuje ibyo mu Rwanda basaba batazamuha equivalence.

Perezida wa Komisiyo y’Abadepite ifite Uburezi mu nshingano, Nyabyenda Damien, yasabye HEC kwihutisha ibisubizo kuri abo banyeshuri n’udahawe equivalence akamenya impamvu ntakomeze gutegereza.

Ati “Kuri twe ubwo gutinda ni ukubera itumanaho ritagenze neza n’aho bize, hari ibyangombwa byari bitaraboneka. Ikindi nuko hari abatarazibona kubera ko batujuje ibyo bagombaga kuba barize, byihutishwe.”

Abanyeshuri baganiriye na IGIHE bafite ikibazo bavuze ko basaga 20, mu gihe abandikiye Inteko ari icyenda, abageze kuri HEC bakaba batandatu. Hari abamaze guhabwa equivalences zabo nyuma yo gusanga bujuje ibisabwa, nkuko HEC yabitangaje.

Abadepite basabye ko abize ubuforomo kuri Hope Africa University basubizwa vuba bakamenya niba impamyabumenyi zabo zizemerwa mu Rwanda cyangwa zitazemerwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza