2019, umwaka w’impundu mu barimu, umweyo n’induru muri kaminuza zigenga

Yanditswe na Ferdinand Maniraguha
Kuya 26 Ukuboza 2019 saa 09:42
Yasuwe :
0 0

Umwaka wa 2019 uragana ku musozo usatira 2020, umwaka u Rwanda rwari rwarihayemo icyerecyezo cyo kuba rumaze gutera imbere mu nzego zose, urw’uburezi ruri ku isonga.

Ni urwego rwaranzwe n’impinduka za hato na hato mu myaka 25 ishize, rurangwa no kutavugwaho rumwe cyane cyane mu bijyanye n’ireme ry’uburezi. Si igitangaza kuko ni rumwe mu nzego zikomeye nyuma y’urw’umutekano n’ubuzima, kuvugwaho cyangwa kutumvwa kimwe si igitangaza.

Umwaka wa 2019 watangiye hari akanyamuneza cyane cyane ku barimu bo mu mashuri abanza n’ayisumbuye bawutangiye batangarizwa ko imishahara yabo yongereweho 10 %.

Inama y’abaminisitiri yateranye ku wa 28 Mutarama 2019 kandi yemeje igabanywa ry’amafaranga yishyurwa mu mashuri yisumbuye nderabarezi (TTC) ndetse no kwemerera abarimu bamaze kugira uburambe runaka mu kazi gukomeza muri Kaminuza ku buntu.

Ibi bitangirana no kugabanyirizwa amafaranga y’ishuri yishyurwa mu ishuri ryisumbuye nderabarezi (TTC), hamwe n’ivugururwa ry’integanyanyigisho ifasha abarangije kwiga mu nderabarezi gukomeza mu mashuri makuru na Kaminuza.

Muri iyi gahunda biteganyijwe ko umwarimu urangije mu nderabarezi akigisha imyaka itatu mu mashuri abanza, azajya yemererwa buruse itishyurwa n’amafaranga atunga umunyeshuri byo gukomeza mu cyiciro cya kabiri cya Kaminuza (Bachelors) mu ishami ry’Uburezi.

Urangije Kaminuza mu ishami ry’uburezi, akigisha imyaka itanu mu mashuri yisumbuye, azajya yemererwa buruse itishyurwa n’amafaranga atunga umunyeshuri byo gukomeza mu cyiciro cya gatatu cya Kaminuza mu ishami ry’Uburezi.

Ni inyoroshyo ikomeye izatuma benshi bagana ayo mashuri nderabarezi yari atangiye kugaragara nk’adashamaje ku banyeshuri bafite icyerecyezo cyo kwiteza imbere iyo bakubitaga agatima ku mushahara wa mwalimu udahagije n’amahirwe make aboneka muri mwuga.

Kubera ubwo buke bw’umushahara kandi, uwize inderabarezi utabonye buruse ya Leta kubona ubushobozi bwo kwirihira byasaga nko kubona ya mizi y’urutare!.

Uwavuga ko uyu mwaka wabaye uw’ibisubizo ku barimu ntiyaba abeshye kuko nubwo bamwe bagiye bavuga ko izo mpinduka zidahagije, mu kinyarwanda baravuga ngo n’agato kava ku yaguye!.

Bye bye abarimu batize uburezi!

Uyu mwaka niwo wa nyuma mu yari yahawe abarimu bigisha ibyo batize cyangwa se batize ibijyanye n’uburezi kuba barangije kuzuza ibisabwa cyangwa bagasezererwa.

Kwigisha ibyo utize utarize n’uburezi ni kimwe mu byo inzego zishinzwe uburezi zakunze gutunga agatoki kuba ku isonga y’ireme ry’uburezi rikemangwa mu mashuri abanza n’ayisumbuye.

Umwaka ushize, Umuyobozi Mukuru w’Ikigo cy’Igihugu gishinzwe uburezi (REB), Dr Dr Ndayambaje Irenée mu kiganiro na IGIHE yagize ati “Ireme ry’uburezi ubwaryo urishakira mu uritanga ntabwo umwarimu yatanga icyo adafite nta n’ubwo umwarimu yatanga icyo atari cyo. Kuba dufite abarimu batigiye uburezi cyangwa badashoboye, bishobora gukoma mu nkokora rya reme ry’uburezi, bashobora kuba nyirabayazana ituma ireme ry’uburezi rikemangwa.”

Iminsi isigaye irabarirwa ku ntoki ku waba yarigishaga ariko atarize uburezi akaba nta n’aho yabwihuguye mu gihe bari bahawe cy’inzibacyuho.

Muri Gicurasi uyu mwaka, Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Dr Munyakazi Isaac yabwiye abadepite bagize Komisiyo y’uburezi, ikoranabuhanga, umuco n’urubyiruko ko abarezi mu mashuri abanza bize kwigisha bagera kuri 98.6% naho abo mu mashuri yisumbuye bujuje ibisabwa bakaba ari 76.5%.

Munyakazi yavuze ko abarimu bahawe igihe gihagije cyo kwitegura, bityo ko uzaba utabyujuje umwaka utaha atazemererwa kwigisha.

Kaminuza nshya z’ubuvuzi, umweyo n’imvururu muri Kaminuza zigenga

Uyu mwaka mu bijyanye n’uburezi bwa kaminuza cyane cyane izigenga ntiwagenze neza cyane, nubwo ku rundi ruhande igihugu cyungutse ebyiri nziza z’ubuvuzi ziri ku rwego mpuzamahanga.

Ku ikubitiro tariki 25 Mutarama 2019, Perezida Paul Kagame i Butaro mu Karere ka Burera yafunguye ku mugaragaro Kaminuza mpuzamahanga y’ubuvuzi, University of Global Health Equity (UGHE).

Ni kaminuza yitezweho guhugura inzobere mu buvuzi, ikaziha ubushobozi bwo guhangana n’ibibazo bishya bibangamiye ubuzima cyane cyane mu bice by’icyaro.

Muri Nzeri uyu mwaka kandi Perezida Kagame yafunguye ishami ry’ubuvuzi rya Kaminuza y’abadiventiste b’umunsi wa karindwi, AUCA ryitezweho gutangira umwaka utaha rikigisha inzobere mu buvuzi ku rwego mpuzamahanga.

Nubwo Kaminuza nshya zavutse, mu zisanzwe ibibazo byarakomeje ndetse bimwe byari bigeze aho kuzisenya udasize n’izafunzwe.

Kaminuza ya UGHE iherereye ku misozi yitaruye ya Butaro mu karere ka Burera

Rwaserera hagati ya Gitwe na HEC

Tariki 29 Mutarama 2018, nibwo Mineduc yafashe umwanzuro wo gufunga burundu udushami tubiri twa Kaminuza y’Abadivantiste b’Umunsi wa karindwi ya Gitwe (ISPG), nyuma yo gusanga ibyo bayisabye gukosora itarabikosoye.

Amashami yafunzwe arimo iry’ibijyanye n’ubuvuzi bw’abantu no kubaga “Medicine and Surgery” ndetse n’iry’ikoranabuhanga rya laboratwari “Medical Laboratory Technology.

Gufunga kwaje nyuma y’urunturuntu hagati y’Uwari Umuyobozi Mukuru wa HEC, Dr Emmanuel Muvunyi n’uhagarariye Kaminuza ya Gitwe mu mategeko akaba n’umwe mu banyamigabane, Urayeneza Gérard wavugaga ko HEC iri kwiyenza ku ishuri rye kuko ngo ibyo yasabwe yari yabikosoye.

Urayeneza yareze HEC hafi mu nzego zose ayishinja kumwiyenzaho ariko birangira umwanzuro ubaye ndakuka, amashami ya ISPG ari nayo yayizaniraga abanyeshuri benshi arafungwa.

Iyo nkubiri ya Gitwe yasize abanyeshuri benshi badafite aho kwiga, baza gusaranganywa mu mashuri makuru na Kaminuza yari afite amasomo ahuye n’ayo bari barize, abandi bigaga ubuvuzi bajyanwa muri Kaminuza y’u Rwanda n’ubu rukigeretse kuko bavuga ko badafatwa nk’abandi banyeshuri bigamo.

Uhagarariye Kaminuza ya Gitwe mu mategeko akaba n'umwe mu banyamigabane, Urayeneza Gérard yashinje HEC kwihisha inyuma yo gufungirwa, HEC yo ikabihakana

Ibya Musenyeri Nzakamwita na Padiri Nyombayire, na UNIK mu madeni y’abarimu yambuye

Ibibazo muri Kaminuza zigenga byaje kwimukira muri Kaminuza y’ikoranabuhanga n’ubugeni ya Byumba, yafatwaga nk’ituje mu maboko ya Kiliziya Gatolika iri mu bufatanye bwo kuyicunga.

Ibibazo byasandaye mu Ugushyingo uyu mwaka, ubwo Umushumba wa Diyosezi ya Byumba, Mgr Nzakamwita Servilien akaba n’uhagarariye UTAB mu by’amategeko yahinduriraga ubutumwa Padiri Dr Nyombayire Faustin wari Umuyobozi w’iyo kaminuza.

Musenyeri Nzakamwita yahinduriye ubutumwa Padiri Dr Nyombayire nyuma y’ibibazo byari bimaze iminsi bivugwa muri iyo kaminuza birimo ukutumvikana mu bayiyobora byari binatangiye kuyigiraho ingaruka mu musaruro.

Padiri Dr Nyombayire yatunguranye yandikira ibaruwa Musenyeri Nzakamwita, amumenyesha ko atishimiye guhagarikwa mu kazi ashinjwa guteza ibibazo muri kaminuza, avuga ko byakoranywe akavuyo kandi nibiba ngombwa azasaba kurenganurwa.

Ni ibaruwa itarakiriwe neza cyane muri rubanda, bagaragaje ko Padiri Nyombayire yubahutse umushumba we ari na we ufite inshingano zo kumushyira mu butumwa ashatse.

Mu nama yabaye mu mpera z’Ugushyingo igahuza inzego zitandukanye zirimo Minisiteri y’Uburezi, iy’ubutegetsi bw’igihugu n’izindi, hafashwe icyemezo cyo gukuraho abari abayobozi ba UTAB, kubera umwuka mubi uri hagati yabo ndetse na Perezida w’Inama y’ubutegetsi Dr Ndahiro Alfred avanwaho asimburwa n’uwari umwungirije kuko ntacyo yakoze mu gukemura ikibazo.

Hahise hashyirwaho abayobozi bashya barimo Dr Niyonzima Eliezer wagizwe umuyobozi w’agateganyo.

Musenyeri Nzakamwita yavuze ko Padiri Nyombayire afite uruhare mu bibazo bya UTAB ari nayo mpamvu yamuhagaritse
Padiri Dr Nyombayire yavuze ko ibaruwa imuhagarika yahawe na Musenyeri ivangavanze ndetse ngo ashobora gusaba kurenganurwa

Bombori bombori muri kaminuza zigenga yakomereje muri Kaminuza ya Kibungo (UNIK). Iyi Kaminuza kugeza mu Ukuboza uyu mwaka, yari ifite ibirarane by’abarimu by’amezi umunani. Hejuru y’ibyo hariho ideni rya miliyoni 360 Frw nayo yatanzwe n’abarimu nubwo bamaze icyo gihe cyose badahembwa.

Ukurikije ibimenyetso n’imibare, ibibazo bya UNIK si ibitangiye vuba. Iyi kaminuza yatangiye mu 2003, mu minsi yayo ya mbere yakiraga nibura abanyeshuri 4500, gusa ubu isigaranye abatagera no ku gihumbi.

Minisitiri w’Uburezi, Dr Mutimura Eugène aherutse kunyarukirayo asanga kaminuza ifite umwenda munini haba ku baturage no mu bigo bya leta birimo icy’Ubwiteganyirize n’icy’Imisoro n’Amahoro. Ubuyobozi bwayo buvuga ko Kaminuza ifite umwenda wose wa miliyari 2.5 Frw.

Umuyobozi wa Kaminuza ya UNIK, Prof. Karuranga Gahima Egide, yavuze ko koko bafite ibibazo bitandukanye we asanga biterwa n’uko iyi kaminuza yanditse ku bantu benshi ariko abarimu bakavuga ko ahubwo ibibazo bituruka ku kuba kaminuza imeze nk’aho nta nyirayo ifite, buri muyobozi azana agashya ke rimwe na rimwe kahomba ntabibazwe.

Minisitiri w’Uburezi yari yatanze ibyumweru bibiri kugira ngo hakorwe igenzura rya kinyamwuga harebwe ibibazo byose biyirimo bizashingirweho hatangwa umurongo.

Impinduka zidasanzwe mu buyobozi bwa HEC

Tariki 14 Ukwakira 2019 Minisitiri w’Uburezi Dr Eugène Mutimura, yasohoye itangazo rivuga ko Muhizi Kageruka Benjamin ariwe wagizwe umuyobozi w’agateganyo wa HEC, asimbuye Dr Muvunyi Emmanuel.

Kageruka na we yaje gusimburwa na Dr Rose Mukankomeje ari na we uyoboye HEC kuri ubu.

Itangazo risimbuza Dr Muvunyi ryateje ururondogoro mu baturage kuko ubusanzwe umuyobozi wo ku rwego nk’urwo bizwi ko ashyirwaho n’inama y’abaminisitiri akaba ari nayo imukuraho cyangwa se akaba yagenwa na Perezida wa Repubulika cyangwa Minisitiri w’Intebe.

Dr Muvunyi azwi cyane mu nkubiri zo kugenzura no gufunga Kaminuza zitujuje ibisabwa, inkubiri yakomeye cyane mu Ukwakira 2017 ubwo Kaminuza ya Nile Source Polytechnic of Applied Sciences (NSPA), Rusizi International University na STES (Singhad ) zafungwaga burundu nyuma yaho byari byakozwe by’agateganyo ngo zibanze zikosore ibitari bitunganye ariko ntizibikore.

Azwi kandi mu kibazo cya Kaminuza ya Gitwe cyasize amwe mu mashami yayo afunzwe, ubuyobozi bwayo bugatangaza ko izize kutavuga rumwe na we aho kuba amakosa bayishinjaga, nubwo Muvunyi yakunze kubihakana, agaragaza ko amakosa y’iyo kaminuza yagaragajwe n’impuguke mu buvuzi zakoze igenzura.

Ngiyo incamake y’amakuru y’urwego rw’uburezi mu Rwanda mu mwaka wa 2019, tubifurije umwaka mushya muhire wa 2020.

Dr Muvunyi Emmanuel yasimbuwe ku buyobozi bwa HEC mu buryo budasanzwe
Tariki 25 Mutarama 2019 ubwo Perezida Kagame yafunguraga ku mugaragaro Kaminuza mpuzamahanga y’ubuvuzi, University of Global Health Equity (UGHE), iherere i Butaro mu Karere ka Burera.
Perezida Kagame yafatanyije n’Umuyobozi w’Itorero ry’Abadiventisiti ku Isi, Dr Ted Wilson bafungura Ishuri ry’Ubuvuzi rya Kaminuza y’Abadiventisiti b’Umunsi wa Karindwi ya AUCA
Ishuri ry'ubuvuzi ry'abadiventiste ryazanywe mu Rwanda kubera icyerekezo cyarwo mu guteza imbere ubuvuzi n’izindi nzego.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .