Ni igikorwa cyabaye kuri uyu wa 23 Mata 2025, mu rugo rw’Impinganzima ya Huye iherereye mu Murenge wa Mukura, mu Karere ka Huye, aho abanyamuryango ba Unity Club bagejeje kuri abo babyeyi b’ Intwaza ubutumwa bw’ihumure, banabashimira ko bagize ubutwari bwo kubaho bakaganza urupfu n’ishavu.

Ni igikorwa cyaranzwe no gusoma amazina y’abari bagize imiryango ya buri Ntwaza ituye mu Mpinganzima ya Huye, nubwo harimo abibagiwe amazina yabo kubera ihungabana.

Intwaza Karwera Anastasie warokokeye mu Murenge wa Munini mu Karere ka Nyaruguru, yatanze ubuhamya avuga akaga yahuye na ko muri Jenoside kugeza ubwo ateshejwe agaciro na muramu we wamurutishije ihene.

Intwaza Karwera yakomeje avuga ko nyuma yo kurokoka ubwicanyi bwo muri Kiriziya ya Musebeya, atiyumvishaga ko hari undi mututsi warokotse mu gihugu, ndetse bituma ashimira Leta y’Ubumwe bw’Abanyarwanda.

Ati “Muri Jenoside nta mututsi wari ukigenda hakibona, ubuzima bwari bwazimye maze Inkotanyi ziraseruka twongera kubaho. Ubu twarateteshejwe, turishimye.”

Intwaza zishimira cyane Perezida Kagame ukomeza kuziha inkunga zibafasha kubaho neza, zikanashimira Unity Club Intwararumuri yazubakiye urugo rw’Impinganzima.

Umuyobozi Nshingwabikorwa ushinzwe Ubumwe n’Ubudaheranwa muri Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), Kayumba Uwera Marie Alice, yagaragaje ko kwibuka byerekana ubutwari Intwaza zagize zikongera kubaho.

Intwararumuri Amb. Christine Nkurikiyinka, yibukije Intwaza ko Unity Club Intwararumuri yumva neza umubabaro zagize kandi bazihoza ku mutima.

Ati "Umubabaro wanyu turawumva, mwabuze abana, mubura inshuti. Mwarwanye n’ubuzima muratsinda, none ubu n’urubyiruko ruri kubigiraho. Intwararumuri twaje kubabwira ko mutari mwenyine. Abayobozi b’Igihugu cyacu barabumva, babateze amatwi kandi babafite ku mutima."

Unity Club Intwararumuri yifatanyije n’abandi bafatanyabikorwa barimo Ibitaro bya Kaminuza bya Butare (CHUB), Ubuyobozi bw’Akarere ka Huye, AVEGA, Ibuka, Inzego z’Umutekano ndetse na Corps Africa Rwanda.

Corps Africa Rwanda ku bufatanye na Unity Club Intwararumuri izakomeza gutera inkunga uru rugo rw’Impinganzima ya Huye. Mu by’ibanze byo kwitabwaho ni ugushaka ibikoresho byo mu Mpinganzima no kuguma kuba hafi aba babyeyi.

Urugo rw’Impinganzima rwa Huye, rutuyemo ababyeyi 107 barimo abakecuru 99 n’abasaza umunani baturutse hirya no hino mu Ntara y’Amajyepfo.

Abagera kuri 662 bo mu miryango y'intwaza batuwe indabo nk'ikimenyetso cy'urukundo

Byari agahinda ubwo hibukwaga Abatutsi bishwe muri Jenoside

Hibutswe abagera kuri 662 bishwe muri Jenoside yakorewe Abatutsi bo mu miryango y'Intwaza 107 zituye i Huye

Imvura yaguye ntiyakomye mu nkokora umuhango wo kwibuka abo mu miryango y'Intwaza

Intwarararumuri Amb. Nkurikiyinka Christine, yifatanya n'abo mu Ntwaza kwibuka banatura indabo ababo bishwe

Intwararumuri Amb. Nkurikiyinka Christine, na we afatanya n'Intwaza gucana urumuri rw'icyizere

Intwarararumuri Amb. Nkurikiyinka Christine, yavuze ko Unity Club yumva neza umubabaro w'intwaza wo kubura ababo bose muri Jenoside

Intwararumuri, Makuza Bernard, afatanya n'Intwaza gucana urumuri rw'icyizere

Intwararumuri Eng. Uwase Patricie mu gikorwa cyo kwibuka abagize imiryango y'Intwaza bishwe mu 1994

Intwararumuri, Makuza Bernard, na we ari mu batuye indabo abishwe muri Jenoside bo mu miryango y'Intwaza z'i Huye

Intwaza Karwera Anastasie, yatanze ubuhamya bw'inzira ikomeye yanyuzemo mu gihe cya Jenoside yakorewe Abatutsi

NUbwo Intwaza zahuye n'akaga muri Jenoside, zakomeje gutwaza no guhamya ko barokotse bakongera guhobera ubuzima

Intwaza zishimira igihugu cyakomeje kuziba hafi nyuma yo kurokoka Jenoside

Perezida wa AVEGA Agahozo, Kayitesi Immaculée, yashimye Unity Club Intwararumuri na Leta y'u Rwanda byita ku buzima bw'abapfakazi ba Jenoside n'izi Ntwaza zirimo

Inzego z'umutekano na zo zifatanije n'Intwaza kwibuka

Intwararumuri zifatanyije n'Intwaza kwibuka ku nshuro ya 31 Jenoside yakorewe Abatutsi

Perezida wa Ibuka mu Karere ka Huye, Siboyintore Théodate afatanya na Kayumba Uwera Marie Alice wo muri MINUBUMWE gucana urumuri rw'icyizere

Umunyamabanga Nshingwabikorwa wa Unity Club Intwararumuri, Uwacu Julienne, acana urumuri rw'icyizere

Umuyobozi muri MINUBUMWE, Kayumba Uwera Marie Alice, yagaragaje ko kwifatanya n’Intwaza kwibuka ari ukongera gushimangira ubutwari bagize bwo gukomeza kubaho

Rumanyika Patrick wari uhagarariye ubuyobozi bwa Corps Africa, yavuze ko bazakomeza ubufatanye na Unity Club Intwararumuri mu kuba hafi Intwaza

Umuyobozi muri MINUBUMWE, Kayumba Uwera Marie Alice, yifatanya n’Intwaza gucana urumuri rw'icyizere

Umwe mu Ntwaza acanirwa urumuri rw'icyizere

Umwe mu Ntwaza ziba mu rugo rw'Impinganzima rwa Huye, yibuka abe akanabatura ururabo

Umuyobozi w'Agateganyo wa CHUB, Dr. Ngarambe Christin, mu gikorwa cyo kwibuka abo mu miryango y'Intwaza i Huye

Unity Club Intwararumuri ni yo yubatse urugo rw'Impinganzima rwa Huye n'izindi zo mu tundi turere

Urutonde rw'abibutswe bishwe muri Jenoside bakomoka mu miryango y'Intwaza zo mu rugo rw'Impinganzima rwa Huye