00:00:00 IGIHE NETWORK KN KINYARWANDA EN ENGLISH FR FRANCAIS

Prince Kid mu ipingu, Castar yongera kubona izuba- Ibyaranze icyumweru mu mafoto

Yanditswe na IGIHE
Kuya 16 May 2022 saa 11:58
Yasuwe :

Inkuru zirimo gutangira kuburana kwa Ishimwe Dieudonné ’uzwi nka Prince Kid’ ndetse no gufungurwa kwa Bagirishya Jean de Dieu uzwi nka ‘Jado Castar’ ziri mu zihariye icyumweru gishize cyo ku wa 9-15 Gicurasi 2022.

Prince Kid yitabye Urukiko rw’Ibanze rwa Kicukiro ku wa 11 Gicurasi 2022. Yatangiye kuburana ku ifungwa n’ifungurwa ry’agateganyo, ku byaha by’ihohotera rishingiye ku gitsina bikekwa ko yakoreye bamwe mu bakobwa bitabiriye irushanwa rya Miss Rwanda yari amaze igihe ategura.

Uyu musore agaragaye bwa mbere yambaye ipingu, aregwa ibyaha bitatu birimo gukoresha undi imibonano mpuzabitsina ku gahato, gusaba cyangwa gukoresha ishimishamubiri rishingiye ku gitsina no guhoza undi ku nkeke bifitanye isano n’imibonano mpuzabitsina.

Kuri uwo munsi kandi kuri urwo rukiko, hatangiye kuburanishirizwa urubanza rwa Micomyiza Jean Paul "Mico" ukekwaho uruhare muri Jenoside yakorewe Abatutsi mu 1994. Na we yatangiye kuburana ku ifungwa n’ifungurwa ry’agateganyo.

Micomyiza akekwaho ibyaha byo kwica nk’icyaha cya Jenoside, gutera ubumuga bw’umubiri cyangwa bwo mu mutwe nk’icyaha cya Jenoside, ubufatanyacyaha muri Jenoside no gusambanya ku gahato nk’icyaha cyibasiye inyokomtuntu.

Indi nkuru yaranze icyumweru ni iyirekurwa rya Bagirishya Jean de Dieu. Uyu yarekuwe nyuma y’iminsi 235 afunzwe nyuma yo guhamywa ibyaha byo gukoresha inyandiko mpimbano.

Icyaha yari akurikiranyweho gifitanye isano n’isanganya yabaye ku Ikipe y’Igihugu y’u Rwanda y’Abagore yasezerewe mu Gikombe cya Afurika cya Volleyball cyaberaga i Kigali hagati ya tariki ya 10 n’iya 20 Nzeri 2021, ishinjwa gukinisha abakinnyi bakomoka muri Brésil batujuje ibisabwa.

Ku wa 14 Gicurasi 2022, ni bwo yongeye kubona izuba ryo hanze. Kuri uwo munsi yakiriwe na Bayingana David bakorana kuri radio bashinze, B &B FM.

Ku wa Mbere w'iki cyumweru, tariki ya 9 Gicurasi 2022, ni bwo hatashywe ubwato bubiri bwahawe abaturage batuye ku Kirwa cya Bugarura, kigizwe n’imidugudu ibiri mu Murenge wa Boneza mu Karere ka Rutsiro
Ku wa Kabiri, tariki 10 Gicurasi 2022, Gen Kazura yakiriye mugenzi we wa Mali, Gen Oumar Diarra bagirana ibiganiro byabereye kuri Minisiteri y’Ingabo. Gen Kazura yanamugeneye impano
Ishimwe Dieudonné 'Prince Kid' yitabye Urukiko rw'Ibanze rwa Kicukiro ku wa 11 Gicurasi 2022, atangira kuburana ku ifungwa n'ifungurwa ry'agateganyo
Micomyiza Jean Paul "Mico" ukekwaho uruhare muri Jenoside yakorewe Abatutsi mu 1994, ku wa 11 Gicurasi 2022, yitabye Urukiko rw'Ibanze rwa Kicukiro ngo aburane ku ifungwa n'ifungurwa ry'agateganyo. Yari acungiwe umutekano ku buryo bukomeye
Umunya-Maroc, Adil Mohammed utoza APR FC (iburyo) n'Umunya-Portugal Jorge Paixão basuhuzanya nyuma y'umukino wa 1/2 cy'Igikombe cy'Amahoro amakipe yabo yanganyijemo 0-0 ku wa 11 Gicurasi 2022. Aba bombi bari bagaragaye bashondana kuri uyu mukino
Perezida Paul Kagame ku wa 11 Gicurasi 2022 yakiriye Umugaba Mukuru w’Ingabo za Mali, Gen Oumar Diarra, wagiriye uruzinduko rw’akazi rw’iminsi itatu mu Rwanda
Ku mugoroba wo ku wa 12 Gicurasi 2022, mu duce dutandukanye mu Mujyi wa Kigali, aba-Rasta bibutse Bob Marley wabaye umwe mu bahanzi bubatse amateka mu Njyana ya Reggae
Ku wa 12 Gicurasi 2022, inkongi yibasiye Akabari ka Bauhaus gaherereye mu Murenge wa Nyamirambo mu Karere ka Nyarugenge
Ku wa Gatanu, tariki 13 Gicurasi 2022, Perezida wa Tanzania, Samia Suluhu Hassan yakiriye ubutumwa yohererejwe na mugenzi we w’u Rwanda, Paul Kagame, yashyikirijwe na Minisitiri w’Ububanyi n’Amahanga n’Ubutwererane, Dr Biruta Vincent
Ikipe ya Kiyovu SC yatsinze APR FC ibitego 2-1 mu mukino w’umunsi wa 27 wa shampiyona, wabereye kuri Stade ya Kigali i Nyamirambo ku wa 15 Gicurasi 2022. Byatumye amakipe yombi anganya amanota 60 kuri 60
Bagirishya Jean de Dieu ‘Castar’ yarekuwe nyuma y’iminsi 235 yari amaze afungiye ibyaha byo gukoresha inyandiko mpimbano. Akirekurwa yakiriwe na mugenzi we bakorana kuri B&B FM- Umwezi, Bayingana David
Ibuka-France ifatanyije n’ubuyobozi bw’Umujyi wa Paris, Abanyarwanda batuye muri icyo gihugu n’inshuti zabo, ku wa 13 Gicurasi 2022, batashye agace kitiriwe Aminadabu Birara uri mu bayoboye ibikorwa byo kwihagararaho byabereye mu Bisesero, ubwo Abatutsi bageragezaga gukiza amagara yabo muri Jenoside
Ku wa 14 Gicurasi 2022, habaye umuhango wo kwimika Musenyeri Musengamana Papias, wabereye muri Stade ya Byumba. Witabiriwe na Minisitiri w’Intebe w’u Rwanda, Dr Ngirente Edouard

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .