KCC yatatswe ibara ry’umutuku mu kwizihiza Umunsi Mpuzamahanga wo kurwanya SIDA

Yanditswe na IGIHE
Kuya 1 Ukuboza 2020 saa 10:53
Yasuwe :
0 0

Ku mugoroba wo kuri uyu wa Kabiri, inyubako ya Kigali Convention Centre yatatswe mu ibara ry’umutuku mu kuzirikana Umunsi Mpuzamahanga wo kurwanya SIDA.

Kuri uyu wa 1 Ukuboza 2020, u Rwanda rwifatanyije n’Isi ku Munsi Mpuzamahanga wahariwe kurwanya icyorezo cya Sida.

Kigali Convention Centre yatatswe amatara yaka mu mutuku mu kuzirikana uyu munsi wizihijwe mu nsanganyamatsiko igira iti “Guhashya Sida ni inshingano zanjye nawe.”

Imibare mishya igaragaza ko mu Rwanda buri mwaka abantu 5.400 bashya bandura virusi itera SIDA, naho abagera ku 200.000 bakaba bafata imiti igabanya ubukana, mu gihe abahitanwa nayo buri mwaka barenga abantu 3000.

Mu Rwanda, umurwayi wa mbere wa virusi itera Sida yagaragaye mu Bitaro bya CHUK mu 1983, icyo gihe hari icyumba cy’ibitaro bitaga muri kane habaga harwariye abayanduye, bakararana ari babiri bizwi ko bucya umwe yapfuye.

Kubera imiti ifasha mu kugabanya ubukana bwa virusi, abantu basigaye babaho neza bagakomeza gutanga umusanzu mu kubaka igihugu, ku buryo abafite virusi itera sida badakwiye gucika intege.

Ubu intego ni uko mu kurandura Sida mu 2030, hazaha hari 95% bafite virusi bazi uko bahagaze, 95% bipimishije bagasanga bafite virusi bafata imiti, na 95% by’abafata imiti bafite virusi nkeya cyane mu maraso.

Imibare y’Ishami ry’Umuryango w’Abibumbye ryita ku buzima, OMS, igaragaza ko kugeza muri Kamena 2020 abantu miliyoni 26 bafataga imiti igabanya ubukana hirya no hino ku Isi, mu gihe abanduye bose bari miliyoni 38.

Sida ihitana abagera ku 690 000 buri mwaka hagendewe ku mibare yo mu 2019.

Kigali Convention Centre yatatswe ibara ry’umutuku mu kwizihiza Umunsi Mpuzamahanga wo kurwanya SIDA
Iyi foto yafatiwe kuri KBC witegeye Kigali Convention Centre

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .